އެމެރިކާ އާއި އީރާނާ ދެމެދު އެކުލަވައިލެވޭ ސުލްހައިގެ އޮނިގަނޑު ސޮއިކުރުމަށް ތައްޔާރުވެފައިވާ ކަމަށާއި، ކުރިއަށް އޮތް 24 ގަޑިއިރުގެ ތެރޭގައި މި އެއްބަސްވުން ފައިނަލް ކުރެވޭނެ ކަމަށް ޕާކިސްތާނުގެ ބޮޑުވަޒީރު ޝެހްބާޒް ޝަރީފް ހޮނިހިރު ދުވަހު އިއުލާނު ކުރައްވައިފިއެވެ.
މަސްތަކެއް ވަންދެން ޕާކިސްތާނުން މެދުވެރިއެއްގެ ދައުރު އަދާކޮށްގެން ކުރިއަށްގެންދިޔަ މަސައްކަތްތަކަށްފަހު ވާހަކަ ދައްކަވަމުން، ޝަރީފް ވިދާޅުވީ މެދުއިރުމަތީގެ ހަމަނުޖެހުންތައް ނިމުމަކަށް ގެނައުމަށް އަމާޒުކޮށްފައިވާ މި އެއްބަސްވުމުގެ ފަހު ދަަރުލިޔުމާ މެދު ދެ ފަރާތުން ވެސް މިހާރު އެއްބަސްވެފައިވާ ކަމަށެވެ. އަދި ވަރަށް އަވަހަށް އިލެކްޓްރޯނިކްކޮށް ސޮއިކުރުމުގެ ރަސްމިއްޔާތެއް ބޭއްވުމަށް ޕާކިސްތާނުން ތައްޔާރުވަމުންދާ ކަމަށް ވެސް އެމަނިކުފާނު ވިދާޅުވިއެވެ.
މި އިއުލާނު އައިސްފައިވަނީ އެމެރިކާ އާއި އިސްރާއީލުން ދިން ހަމަލާތަކާއި، އޭގެ ރައްދުގައި އީރާނުން ދިން ހަމަލާތަކުގެ ސަބަބުން ތިން މަހަށްވުރެ ގިނަ ދުވަހަށް ދެމިގެންދިޔަ ހަނގުރާމައާއި، ހޯމްޒް ކަނޑުއޮޅީގައި އުޅަނދުފަހަރަށް ކުރިމަތިވި ހުރަސްތަކުގެ ސަބަބުން މަސްރަހު ވަރަށް ބޮޑަށް ނުތަނަވަސްވެފައިވާ ދަނޑިވަޅެއްގައެވެ. ނުސީދާކޮށް ކުރިއަށްދިޔަ މި މަޝްވަރާތައް ކާމިޔާބުކުރުމުގައި ޕާކިސްތާނުން ވަނީ އިސް ދައުރެއް އަދާކޮށްފައެވެ.
މިކަމާ ގުޅޭގޮތުން އިސްލާމްއާބާދުގައި ބޮޑު އުންމީދެއް އޮތް ނަމަވެސް، އީރާނުގެ ފޮރިން މިނިސްޓްރީން ވަނީ އެއްބަސްވުމުގެ ސުންގަޑިއާ މެދު ސަމާލުވުމަށް އިލްތިމާސްކޮށްފައެވެ. ހަމައެއާއެކު، އެމެރިކާގެ ބައެއް އޮފިޝަލުން ވަނީ، ހާއްސަކޮށް ނިއުކްލިއާ މައްސަލަތަކާ ގުޅޭގޮތުން އަދިވެސް ނުނިމި ހުރި ބައެއް ކަންތައްތަކެއް ހުރިކަން ފާހަގަކޮށްފައެވެ. މަސްރަހު ފިނިވެގެންދާނެ ކަމުގެ އުންމީދުގައި ދުނިޔޭގެ ބާޒާރުތަކުން މި ކުރިއެރުމަށް ފާރަވެރިވަމުންދާއިރު، ސަރަހައްދީ ހަލަބޮލިކަމުގެ ސަބަބުން ތެލުގެ އަގަށް ވަނީ ބޮޑެތި ލޮޅުންތަކެއް އަރާފައެވެ.
މި އެއްބަސްވުމަކީ ޕާކިސްތާނަށް ލިބޭނެ ހާރިޖީ ބޮޑު ކާމިޔާބީއަކަށް ވުމުގެ އިތުރުން، މުޅި ސަރަހައްދަށް އިންތިހާއަށް ބޭނުންވެފައިވާ ހަމަޖެހުން ގެނުވައިދޭނެ މުހިންމު ފިޔަވަޅަކަށް ވާނެ ކަމަށް ބެލެވެއެވެ.
