އިސްރާއީލުގެ ޕާލަމެންޓް (ކްނެސެޓް) ގެ 67 މެންބަރެއްގެ ތާއީދާއެކު، އާ ސަރުކާރެއް އެކުލަވާލުމުގެ ފުރުޞަތު ގާޑީ އެއިޒެންކޮޓަށް ދެއްވުމަށް ރައީސް އައިޒެކް ހަރްޒޮގް ނިންމަވައިފިއެވެ.
ރައީސްގެ ތަރުޖަމާނު ވިދާޅުވި ގޮތުގައި މި ނިންމުން ހޮނިހިރު ދުވަހު އެއިޒެންކޮޓަށް އަންގާފައިވާއިރު، ސަރުކާރު އެކުލަވާލުމުގެ ރަސްމީ މެންޑޭޓް އޭނާއާ ހަވާލުކުރުމަށް ހަމަޖެހިފައިވަނީ އާދީއްތަ ދުވަހު ބާއްވާ ރަސްމިއްޔާތެއްގައެވެ.
އޮކްޓޫބަރު 27 ގައި ބޭއްވުނު އާންމު އިންތިޚާބުގައި 120 ގޮނޑީގެ ތެރެއިން އެއްވެސް ފަރާތަކަށް ސަރުކާރެއް އެކުލަވާލުމަށް ބޭނުންވާ 61 ގޮނޑީގެ އަޣުލަބިއްޔަތު ލިބިފައެއް ނުވެއެވެ. އެ އިންތިޚާބުގައި އެއިޒެންކޮޓް އިސްވެ ހުންނެވި 4 ޕާޓީގެ އިއްތިހާދަށް 48 ގޮނޑި ލިބުނުއިރު، ނަތަންޔާހޫގެ ކަނާތުފިޔައިގެ އަދި ދީނީ ބްލޮކަށް ލިބުނީ 53 ގޮނޑިއެވެ. އަނެއްކޮޅުން، ފަލަސްތީނު ދަރިކޮޅުގެ ރައްޔިތުން ތަމްސީލުކުރާ އަރަބި ޕާޓީތަކުން ވަނީ ރެކޯޑު އަދަދަކަށް، އެއީ 19 ގޮނޑި ކާމިޔާބުކޮށްފައެވެ.
ސަރުކާރެއް އުފެއްދުމުގެ ފުރުޞަތު އެއިޒެންކޮޓަށް ލިބިވަޑައިގަތީ އަރަބި ޕާޓީތަކުގެ ތާއީދާއެކު ޖުމްލަ 67 މެންބަރުންގެ އަޣުލަބިއްޔަތު ހޯއްދެވުމުންނެވެ. އޭނާއާ ވާދަކުރެއްވި ނަތަންޔާހޫއަށް ލިބިވަޑައިގަތީ 46 މެންބަރުންގެ ތާއީދެވެ.
އެއިޒެންކޮޓަށް ތާއީދުކުރި 67 މެންބަރުންގެ ތެރޭގައި އަރަބި ޕާޓީތައް ހިމެނުނު ނަމަވެސް، އެ ޕާޓީތަކާއެކު ސަރުކާރެއް އެކުލަވާނުލައްވާނެ ކަމަށް އޭނާ ވަނީ ވިދާޅުވެފައެވެ. އަނެއްކޮޅުން އިދިކޮޅު އިއްތިހާދުގެ ބައެއް ޔަހޫދީ ޕާޓީތަކުން އަރަބި ޕާޓީތަކާ ގުޅުމަށް ދެކޮޅުހަދާއިރު، ހަމާސްއަކީ ޓެރަރިސްޓް ޖަމާޢަތެއް ކަމަށް ބެލުމަށް އެއިޒެންކޮޓް ކުރައްވާ ޝަރުތަށް ބައެއް އަރަބި ޕާޓީތަކުން އެއްބަހެއް ނުވެއެވެ. ނަތަންޔާހޫ ވެސް ގެންދަވަނީ އަރަބި ޕާޓީތަކުގެ ތާއީދާއެކު އުފައްދާ ސަރުކާރަކަށް ފާޑުވިދާޅުވަމުންނެވެ.
އެހެންކަމުން އެއިޒެންކޮޓަށް 61 ގޮނޑީގެ އަޣުލަބިއްޔަތު ހަމަކުރެވެން އޮތީ ދީނީ ދެ ޕާޓީ ކަމަށްވާ ޔުނައިޓެޑް ތޯރާ ޖުޑާއިޒަމް އަދި ޝާސްގެ ތާއީދު ހޯއްދަވައިގެންނެވެ. މީގެ އިތުރުން ކްނެސެޓްގެ އިތުބާރު ހޯއްދަވައިގެން ކުޑަ އަޣުލަބިއްޔަތެއް އޮންނަ ސަރުކާރެއް އެކުލަވާލުމުގެ އިޚްތިޔާރުވެސް އޮތްކަން ފާހަގަކުރެވެއެވެ.
ކަނޑައެޅިފައިވާ މުއްދަތުގެ ތެރޭގައި އެއިޒެންކޮޓަށް ސަރުކާރެއް އެކުލަވާނުލެވިއްޖެނަމަ، ރައީސް ހަރްޒޮގް އެ ފުރުޞަތު ދެއްވާނީ އެހެން ކެންޑިޑޭޓަކަށެވެ. އެއަށްފަހުވެސް ސަރުކާރެއް ނުއުފެއްދިއްޖެނަމަ 90 ދުވަހުގެ ތެރޭގައި އަލުން އާންމު އިންތިޚާބެއް ބާއްވަން ޖެހޭނެއެވެ. އަދި އާ ސަރުކާރެއް އެކުލަވާލެވެންދެން ވަގުތީ ބޮޑުވަޒީރުގެ މަޤާމުގައި ދެމިހުންނަވާނީ ނަތަންޔާހޫއެވެ.
