ޔަމަނުގެ ހޫތީ ހަނގުރާމަވެރިން ސައޫދީ އަރަބިއްޔާގެ އިރުމަތީ ސަރަހައްދުން ރަތްކަނޑުގެ ޔަންބު ބަނދަރަށް ތެޔޮ އުފުލާ މައި ހޮޅިލައިނާއި ތެޔޮ ވަސީލަތްތަކަށް އަމާޒުކޮށް ވަރުގަދަ ހަމަލާތަކެއް ދީފައިވާ ކަމަށް ބުނެފިއެވެ. މިއީ 2019 ވަނަ އަހަރު ސައޫދީ އަރާމްކޯގެ އިރުމަތީ މަރުކަޒުތަކަށް ދިން ހަމަލާތަކަށްފަހު، އެ ގައުމުގެ އިރުމަތީ ސަރަހައްދުގެ ތެޔޮ ވަސީލަތްތަކަށް އަމާޒުކޮށް ހޫތީން ހަމަލާދިން ފުރަތަމަ ފަހަރެވެ.
ހޫތީންގެ އަސްކަރީ ތަރުޖަމާނު ޔަހްޔާ ސަރީއާ ވިދާޅުވި ގޮތުގައި، މި ހަމަލާތައް ދީފައިވަނީ ޑްރޯން އަދި މިސައިލް ބޭނުންކޮށްގެން، ސައޫދީގެ އިރުމަތީ ސަރަހައްދާއި ހުޅަނގުގެ ޔަންބު ބަނދަރު ގުޅުވައިދޭ ތެޔޮ އުފުލާ ނިޒާމުގެ މުހިންމު ސައިޓުތަކަށެވެ. މިއީ ސައޫދީގެ އަސްކަރީ އުޅަނދުތަކުން ޔަމަނުގެ ވައިގެ ސަރަހައްދަށް ވަދެ ދެމުންދާ ހަމަލާތަކަށް ރައްދުދިނުމުގެ ގޮތުން ދިން ހަމަލާތަކެއް ކަމަށްވެސް އޭނާ ވިދާޅުވިއެވެ.
އީރާނާއެކު އުފެދިފައިވާ ހަނގުރާމައިގެ ސަބަބުން ހޯރމުޒް ކަނޑުއޮޅި ބަންދުވެފައިވާއިރު، ސައޫދީން ވަނީ އެ ގައުމުގެ ތެޔޮ ބޭރުކުރުމަށް އިރުމަތިން ހުޅަނގަށް ގުޅާލެވިފައިވާ އިސްތްރާތީޖީ ހޮޅިލައިން މެދުވެރިކޮށް ޔަންބު ބަނދަރަށް ތެޔޮ ބަދަލުކުރަން ފަށާފައެވެ. ނަމަވެސް ހޫތީންގެ މި ހަމަލާތަކުގެ ސަބަބުން ސައޫދީގެ މި އަލްޓަނޭޓިވް މަގަށްވެސް ވަނީ ބޮޑު ނުރައްކަލެއް ކުރިމަތިވެފައެވެ.
"އަހަރެމެންގެ ހަމަލާތައް އަމާޒުވާނީ ސައޫދީގެ އިގްތިސާދީ އަދި އަސްކަރީ މުހިންމު ވަސީލަތްތަކަށް. ސައޫދީން ޔަމަނަށް ދޭ ހަމަލާތައް ނުހުއްޓުވައިފިނަމަ ކުރިއަށް އޮތް ދުވަސްތަކުގައި މި ފިޔަވަޅުތައް އިތުރަށް ވަރުގަދަކުރާނަން." ހޫތީންގެ އަސްކަރީ ތަރުޖަމާނު ޔަހްޔާ ސަރީއާ
މި ހަމަލާތަކާއެކު ދުނިޔޭގެ ތެލުގެ ބާޒާރުގައި ސާމް މާކެޓް އަގުތައް ވަނީ އިތުރަށް އުފުލިފައެވެ. އަދި ސައޫދީ އަރާމްކޯއިން މި ހަމަލާތަކާ ގުޅިގެން ރަސްމީކޮށް ވަކި އެއްޗެއް ބުނެފައިނުވި ނަމަވެސް، ސައޫދީގެ ވައިގެ ދިފާއީ ނިޒާމުތަކުން ވަނީ ބައެއް މިސައިލްތަކާއި ޑްރޯންތައް ވައިގެ ތެރޭގައި ގޮއްވާލާފައެވެ.
