ލެބަނޯނުގެ މަޝްރަހުގެ ތެރެއަށް ސީރިޔާއިން އަސްކަރީ ގޮތުން ވަނުމުގެ އެއްވެސް ގަސްދެއް ނެތް ކަމަށާއި، އިސްރާއީލާއެކު ސެކިއުރިޓީ އެއްބަސްވުމަކަށް އައުމަށް މެދުވެރިން މެދުވެރިކޮށް މަސައްކަތް ކުރަމުންދާ ކަމަށް ސީރިޔާގެ ރައީސް އަހްމަދު އަލް-ޝަރާއު ވިދާޅުވެއްޖެއެވެ.
އަލްޖަޒީރާއަށް ދެއްވި ހާއްސަ އިންޓަވިއުއެއްގައި އަލް-ޝަރާއު ވިދާޅުވީ، ލެބަނޯނުގެ ހަމަޖެހުން ގާއިމުކުރުމަށް ސީރިޔާއިން އެހީތެރިވެދޭނެ ނަމަވެސް، ސީރިޔާގެ ސިފައިން އެ ގައުމަށް ފޮނުވުމުގެ އެއްވެސް ވިސްނުމެއް ނެތް ކަމަށެވެ. އަދި ލެބަނޯނުގައި ދައުލަތުގެ ކަންކަމާއި، ހަތިޔާރު ގެންގުޅުމާއި، ހަނގުރާމައާއި ސުލްހައިގެ ނިންމުންތައް ނިންމުމުގެ ފުރިހަމަ ބާރު އޮންނަންޖެހޭނީ ހަމައެކަނި ލެބަނޯނުގެ ސަރުކާރަށް ކަމަށް އޭނާ ވިދާޅުވިއެވެ.
އިސްރާއީލާއެކު ސެކިއުރިޓީ އެއްބަސްވުން
އިސްރާއީލާއެކު އޮތް ގުޅުމާ ބެހޭގޮތުން ވާހަކަދައްކަވަމުން އަލް-ޝަރާއު ހާމަކުރެއްވި ގޮތުގައި، ދެ ގައުމުގެ ދެމެދުގައި ސެކިއުރިޓީ އެއްބަސްވުމެއް ގާއިމުކުރުމަށްޓަކައި އެކި ގައުމުތައް މެދުވެރިކޮށް މަޝްވަރާތައް ދަނީ ކުރެވެމުންނެވެ.
ސީރިޔާގެ ރައީސް އަހްމަދު އަލް-ޝަރާއު: "އިސްރާއީލާއެކު ވެވޭ ސެކިއުރިޓީ އެއްބަސްވުން ކާމިޔާބުވެއްޖެނަމަ، އެކަމުގެ ސަބަބުން ފުރިހަމަ ސުލްހައަކަށް މަގުފަހިވެގެންދާނެ. ނަމަވެސް، މީގެ މާނައަކީ އިސްރާއީލުން ހިފާފައިވާ ގޯލާން ހައިޓްސްއަށް އޮތް ސީރިޔާގެ ހައްގު ދޫކޮށްލުމެއް ނޫން."
އޭނާ އިތުރަށް ވިދާޅުވީ، ސީރިޔާއިން އިސްރާއީލާއެކު އަސްކަރީ ކުރިމަތިލުމަކަށް ދާން ބޭނުންނުވާ ކަމަށާއި، މަގުސަދަކީ ދެ ގައުމުގެ ދެމެދުގައި އޮތް ނުވަތަ އުފެދިދާނެ ނުވަތަނަވަސްކަން ކުޑަކޮށް ސުލްހަވެރި ހައްލެއް ހޯދުން ކަމަށެވެ.
