މ. މުލަކަށް ދިމާވެފައިވާ ރަށްގިރުމުގެ ބޮޑު މައްސަލައަށް ދާއިމީ ހައްލެއް ހޯދައިދިނުމުގެ ގޮތުން ކުރިއަށްގެންދާ ގޮނޑުދޮށް ހިމާޔަތްކުރުމުގެ މަޝްރޫއުގެ ދެވަނަ ފިޔަވަހީގެ ދަށުން، ރިވެޓްމެންޓް ޕްރޮފައިލިންގ ނުވަތަ ހިލަތައް އެއްވަރުކުރުމުގެ މަސައްކަތްތައް ސައިޓުގައި މިހާރު ކުރިއަށްދާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ހާމަކޮށްފިއެވެ.
މި ސަރަހައްދުގައި ކުރިން ކުރިއަށްދިޔަ ރިވެޓްމެންޓް ކޮންސްޓްރަކްޝަން ނުވަތަ ހިލަ އެތުރުމުގެ ބޮޑެތި މަސައްކަތްތައް މިހާރު ވަނީ އަމަލީ ގޮތުން ނިންމާލެވިފައެވެ.
ރަށުގެ ގިރާ ސަރަހައްދުތައް ހިމާޔަތްކޮށް، ގޮނޑުދޮށް ރައްކާތެރިކުރުމުގެ ގޮތުން ސަރުކާރުން ކުރިއަށްގެންދާ މި މަޝްރޫއުގެ ދެވަނަ ފިޔަވަހި އެމްޓީސީސީއާ ހަވާލުކޮށްފައިވަނީ 23 އޮގަސްޓް 2022 ގައެވެ.
ޖުމްލަ 38.96 މިލިއަން ރުފިޔާ ޚަރަދުކޮށްގެން ހިންގާ މި މަޝްރޫއުގެ ދަށުން ރަށުގެ ގޮނޑުދޮށަށް ބޮޑެތި ބަދަލުތަކެއް އަންނާނެއެވެ. އެގޮތުން 343 މީޓަރުގެ ސަރަހައްދެއްގައި ރިވެޓްމެންޓް ޖެހުމާއި، 539 މީޓަރުގެ ސަރަހައްދެއްގައި ބޭރުތޮށި ލުމުގެ އިތުރުން، 14،548.25 އަކަމީޓަރުގެ ސަރަހައްދަކަށް ވެލިއަޅައި ގޮނޑުދޮށް ރީތިކުރުމުގެ މަސައްކަތް ހިމެނެއެވެ.
މުލަކުގެ ގޮނޑުދޮށް ހިމާޔަތްކުރުމުގެ ފުރަތަމަ ފިޔަވަހީގެ މަސައްކަތްތައް އޭރުގެ މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗާގެ ފަރާތުން އެމްޓީސީސީއާ ހަވާލުކުރީ 29 މާރިޗު 2021 ގައެވެ. 17.66 މިލިއަން ރުފިޔާގެ އެ މަޝްރޫއުގެ ދަށުން 411.90 މީޓަރުގެ ސަރަހައްދެއްގައި ޖިއޯ ބޭގް ރިވެޓްމެންޓް ޖަހައި، 105 ދުވަހުގެ ތެރޭގައި މަސައްކަތް ނިންމާލުމަށްފަހު، 2021 ވަނަ އަހަރުގެ ޑިސެމްބަރު މަހު ވަނީ ކާމިޔާބުކަމާއެކު ނިންމާލާފައެވެ.
ފުރަތަމަ ފިޔަވަހީގެ ކާމިޔާބީއަށްފަހު ފެށުނު ދެވަނަ ފިޔަވަހީގެ މަސައްކަތް ނިމުމުން، މުލަކުގެ ގޮނޑުދޮށަށް ދިމާވެފައިވާ ގިރުމުގެ ނުރައްކަލަށް ދާއިމީ ހައްލެއް ލިބި، ރަށުގެ އިގްތިސާދީ އަދި އިޖުތިމާއީ ހަރަކާތްތަކަށް ބޮޑު އުފަލަކާއި ރައްކާތެރިކަމެއް ލިބިގެންދާނެ ކަމަށް އުއްމީދުކުރެވެއެވެ.
