ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ކުރިއަށްގެންދާ މަސައްކަތްތަކާ ގުޅޭގޮތުން ރައްޔިތުންނަށް މައުލޫމާތު ދިނުމަށާއި، އާންމުންގެ ސުވާލުތަކަށް ޖަވާބުދެއްވުމަށް ބާއްވާ "އަހާ" ފޯރަމްގެ 8 ވަނަ އެޑިޝަން މިރޭ 21:00 ގައި ބޭއްވުމަށް ވަނީ ހަމަޖެހިފައެވެ.
ރައީސް އޮފީހާއި ޕަބްލިކް ސާވިސް މީޑިއާ (ޕީއެސްއެމް) ގުޅިގެން ސަލްޓަން ޕާކުގެ އިވެންޓް އޭރިއާގައި ބާއްވާ، ދެ ގަޑިއިރުގެ މި ފޯރަމްގައި މިފަހަރު ބައިވެރިވެވަޑައިގަންނަވާނީ އިކޮނޮމިކް މިނިސްޓަރު މުހައްމަދު ސައީދާއި، ޑިފެންސް މިނިސްޓަރު ހަސަން ރަޝީދުގެ އިތުރުން އެޓާނީ ޖެނެރަލް އަޙްމަދު އުޝާމެވެ.
މި ފޯރަމްގައި ވަޒީރުންނާ ސުވާލުކުރުމުގެ ފުރުސަތު އާންމުންނަށް ވަނީ ވަރަށް ފުޅާކޮށް ހުޅުވާލެވިފައެވެ.
އެގޮތުން ފޯރަމް ކުރިއަށްދާ ތަނަށް ހާޒިރުވެގެން ސުވާލުކުރުމުގެ އިތުރުން، ފޯނުން ގުޅައިގެންނާއި، މީސްމީޑިއާ އަދި "ޕީއެސްއެމް އެއަރ" އެޕްލިކޭޝަން މެދުވެރިކޮށް ވެސް ސުވާލު ހުށަހެޅޭނެއެވެ.
އަދި އެސްއެމްއެސް މެދުވެރިކޮށް ސުވާލު ފޮނުއްވަން ބޭނުންފުޅުވާ ފަރާތްތަކުން AH ޖެހުމަށްފަހު ހުސްތަންކޮޅެއް ދޫކޮށް، ސުވާލު ލިޔުއްވުމަށްފަހު 300 އަށް އެސްއެމްއެސް ކުރުމުން ފޯރަމަށް ސުވާލު ފޮނުވޭނެއެވެ.
ސަރުކާރުގެ ސިޔާސަތުތަކާ ގުޅޭގޮތުން ސީދާ ވަޒީރުންނާ ސުވާލުކުރެވޭ ގޮތަށް ކުރިއަށްގެންދާ މި ސިލްސިލާ ފޯރަމްގެ ފުރަތަމަ ހަރަކާތް ބޭއްވުނީ މިދިޔަ އަހަރުގެ ޖެނުއަރީ މަހުގެ ތެރޭގައެވެ.
