ށ.މަރޮށި ސިއްޙީ މަރުކަޒުގައި ލެބޯޓަރީގެ ޚިދުމަތް ރަސްމީކޮށް ފަށައި، އެ ރަށު ރައްޔިތުންނަށް ބޮޑު ލުޔެއް ހޯދައިދީފިއެވެ.
މި ޚިދުމަތް ރަސްމީކޮށް އިފްތިތާޙުކޮށްދެއްވީ އެކަމަށްޓަކައި ޅައިމަގުގައި ބޭއްވި ޚާއްޞަ ރަސްމިއްޔާތެއްގައި ސިއްޙަތާއި ޢާއިލާއާއި އިޖުތިމާޢީ އެހީއާ ބެހޭ ވަޒީރު ޤީލާ ޢަލީއެވެ. މި ރަސްމިއްޔާތުގައި ސިއްޙީ ވުޒާރާގެ އިސްވެރިންގެ އިތުރުން މަރޮށި ކައުންސިލާއި ސިއްޙީ މަރުކަޒުގެ އިސް ފަރާތްތަކުން ބައިވެރިވެވަޑައިގެންނެވިއެވެ.
މި ޚިދުމަތަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފާއިތުވި އަހަރު ޅައިމަގަށް ކުރެއްވި ޒިޔާރަތުގައި އެރަށުގެ ސިއްޙީ ޚިދުމަތް ފުޅާކޮށްދެއްވާނެކަމަށް ވެވަޑައިގެންނެވި ވަޢުދުފުޅުގެ ދަށުން ފެށުނު ޚިދުމަތެކެވެ.
އެގޮތުން ސިއްޙީ މަރުކަޒުގެ އައު އިމާރާތާއެކު ޚިދުމަތް 16 ގަޑިއިރަށް ބަދަލުކުރުމާއި، 4 އެނދުގެ ޖާގައާއެކު ލެބޯޓަރީގެ ވަސީލަތްތައް ޤާއިމުކުރުމަށް ސަރުކާރުން ވަނީ ނިންމާފައެވެ. މުޅި ރާއްޖޭގެ މީހުން ދިރިއުޅޭ ހުރިހާ ރަށެއްގައި ލެބޯޓަރީގެ ޚިދުމަތް ދިނުމަށް ރައީސް ވެވަޑައިގެންފައިވާ ރިޔާސީ ވަޢުދުފުޅުގެ ދަށުން، ލެބޯޓަރީ ނެތް 76 ރަށުގައި އެ ޚިދުމަތް ދިނުމުގެ މަސައްކަތް ބާރަށް ކުރިއަށްދާއިރު، ޅައިމަގުގައި ހުޅުވުނު ލެބޯޓަރީއަކީ އަތޮޅުތެރޭގައި ސަރުކާރުން ޤާއިމުކުރި 20 ވަނަ ލެބޯޓަރީއެވެ.
ލެބޯޓަރީގެ ޚިދުމަތް ޅައިމަގުގައި ފެށުމާއެކު، އާންމު ޓެސްޓުތަކާއި ލޭގެ ޓެސްޓުތައް ހެދުމަށް އެހެން ރަށްރަށަށް ކުރަންޖެހުނު ދަތުރުތަކަށް ނިމުމެއް އައިސް، ރައްޔިތުންނަށް ބޮޑު ފަސޭހައެއް ވަނީ ލިބިފައެވެ.
މީގެ ކުރިން ކުޑަ ޓެސްޓެއް ހަދާލުމަށްވެސް ކަނޑުދަތުރުކޮށްފައި އެހެން ރަށަކަށް ދާންޖެހުމުގެ ތަކުލީފު އުފުލި ނަމަވެސް، މިހާރު އަމިއްލަ ރަށުން އެ ފަރުވާ ލިބޭނެ މަގު ވަނީ ފަހިވެފައެވެ. މީގެ ސަބަބުން ދަތުރުފަތުރަށް ހިނގާ ޚަރަދާއި ހޭދަވާ ވަގުތު ސަލާމަތްވެ، މާލީ ގޮތުންނާއި ޖިސްމާނީ ގޮތުން ބޮޑު ލުޔެއް ލިބިގެންގޮސްފައިވާއިރު، ޚާއްޞަކޮށް އުމުރުން ދުވަސްވީ މީހުންނާއި ކުޑަކުދިން ގޮވައިގެން ދަތުރުކުރަން ނުޖެހޭތީ ރަށުގެ ރައްޔިތުން ވަނީ އެކަމާ މެދު އުފާކުރާކަން ހާމަކޮށްފައެވެ.
