ރާއްޖޭގެ ފަތުރުވެރިކަމުގެ ސިނާއަތް އިތުރަށް ކުރިއަރުވައި، ދެމެހެއްޓެނިވި ގޮތެއްގައި ތަރައްގީކުރުމަށް ސަރުކާރުގެ ފުރިހަމަ އެއްބާރުލުމާއި އެހީތެރިކަން އަބަދުވެސް އެ ދާއިރާގެ ހުރިހާ ފަރާތްތަކަށް ލިބެމުންދާނެ ކަމަށް ފަތުރުވެރިކަމާއި މަދަނީ އުދުހުންތަކާ ބެހޭ ވަޒީރު މުހައްމަދު އަމީން ވިދާޅުވެއްޖެއެވެ.
ގައުމީ ފަތުރުވެރިކަމުގެ ދުވަހުގެ މުނާސަބަތުގައި ވަޒީރު ޝާއިއުކުރެއްވި ހާއްސަ މެސެޖެއްގައި، ފަތުރުވެރިކަމުގެ ސިނާއަތުގެ ހުރިހާ ބައިވެރިންނަށާއި، ދިވެހިރާއްޖެއަކީ ދުނިޔޭގެ އެއްވަނަ ފަތުރުވެރި މަންޒިލްގެ ގޮތުގައި ދެމެހެއްޓުމަށް ރެއާއި ދުވާލު އިހުލާސްތެރިކަމާއެކު މަސައްކަތްކުރައްވާ އެންމެހައި ފަރާތްތަކަށް ހެޔޮއެދުމާއި ތަހުނިޔާ ފޮނުއްވާފައިވެއެވެ.
ވަޒީރު ފާހަގަކުރެއްވި ގޮތުގައި ފަތުރުވެރިކަމުގެ ސިނާއަތަކީ ދިވެހިންގެ އެންމެ ބޮޑު އެއް ފަހުރެވެ. އަދި މިއީ ދުނިޔެއާއި ރާއްޖެ ގުޅުވައިދޭ، ރާއްޖޭގެ އިގްތިސާދުގެ މައިނާރު ކަމުގައިވުމުގެ އިތުރުން، ދިވެހި ރައްޔިތުންނަށް މަންފާކުރަނިވި ގިނަގުނަ ވަޒީފާއާއި ވިޔަފާރީގެ ފުރުސަތުތަކެއް ފަހިކޮށްދޭ އެންމެ މުހިންމު ދާއިރާއެވެ. އެހެންކަމުން މި ސިނާއަތް އިތުރަށް ކުރިއަރުވައި، އައު ލަނޑުދަނޑިތަކާއެކު ދާއިމީ ކާމިޔާބީއާ ހަމައަށް ވާސިލުވުމަށް ކުރެވޭ މަސައްކަތްތަކަށް އެއްބާރުލުން ދިނުމުގައި ސަރުކާރުން އަބަދުވެސް ސާބިތުކަމާއެކު ދެމިއޮންނާނެކަމަށް ވަޒީރު ވިދާޅުވިއެވެ.
ކޮންމެ އަހަރެއްގެ އޮކްޓޯބަރު މަހުގެ 3 ވަނަ ދުވަސް ގައުމީ ފަތުރުވެރިކަމުގެ ދުވަހުގެ ގޮތުގައި ފާހަގަކުރަނީ، ކ. ވިހަމަނާފުށީގައި ރާއްޖޭގެ ފުރަތަމަ ރިސޯޓު ކަމަށްވާ ކުރުނބާ ވިލެޖު (މިހާރު ކުރުނބާ މޯލްޑިވްސް) ހުޅުވި ތާރީހީ ދުވަހާ ގުޅުވައިގެންނެވެ. އެގޮތުން ކުރުނބާ ވިލެޖު ރަސްމީކޮށް ހުޅުވާފައިވަނީ 1972 ވަނަ އަހަރުގެ އޮކްޓޯބަރު މަހުގެ ތިންވަނަ ދުވަހު ކަމަށްވާއިރު، ފާއިތުވެދިޔަ ފަސް ދަހަރަށްވުރެ ގިނަ ދުވަހުގެ ތެރޭގައި ރާއްޖޭގެ ފަތުރުވެރިކަން ވަނީ މުޅި ދުނިޔޭގެ ސަމާލުކަން ލިބިފައިވާ ބޮޑު ސިނާއަތަކަށް ބަދަލުވެފައެވެ.
