އާޓިފިޝަލް އިންޓެލިޖެންސް (އޭއައި) ބޭނުންކޮށްގެން މައްސަލަތަކަށް ގޮތް ކަނޑައެޅުމުގައި ފަނޑިޔާރުންގެ ދައުރު އެއްކޮށް އެފަރާތަށް ދޫކޮށްލެވޭނެކަމަށް ގަބޫލުފުޅު ނުކުރައްވާ ކަމަށް އުއްތަމަ ފަނޑިޔާރު އަބްދުލްޣަނީ މުހައްމަދު ވިދާޅުވެއްޖެއެވެ.
އުޒްބެކިސްތާނުގެ ސަމަރުގަންދުގައި ކުރިއަށްދާ އެސޯސިއޭޝަން އޮފް އޭޝިއަން ކޮންސްޓްޓިއުޝަނަލް ކޯޓްސް އެންޑް އިކުއިވަލަންޓް އިންސްޓްޓިއުޝަންސް (އޭއޭސީސީ) ގެ ހަތްވަނަ ކޮންގްރެސްގައި ތަގުރީރު ކުރައްވަމުން، ޑިޖިޓަލް ޓެކްނޮލޮޖީގެ އެހީގައި އަވަސް އަދި ހަރުދަނާ އިންސާފެއް ގާއިމުކުރުމުގެ މުހިންމުކަމުގެ މައްޗަށް އެމަނިކުފާނު އަލިއަޅުއްވާލެއްވިއެވެ. އެގޮތުން، ޓެކްނޮލޮޖީއާއި އޭއައި ކިތަންމެ ބާރަށް ކުރިއަރަމުން ދިޔަ ނަމަވެސް، ކޯޓަށް ހުށަހަޅާ މައްސަލައެއްގެ ގޮތް ނިންމުމުގައި ފަނޑިޔާރުންގެ ބަދަލުގައި އަލްގޯރިދަމްއަކަށް އެ ދައުރު ދޫކޮށްލުމަކީ ކުރެވޭނެ ކަމެއް ނޫން ކަމަށާއި، އޭއައި ފަދަ ވަސީލަތްތައް ތަރައްގީކުރަންވާނީ ޖުޑީޝަރީއަށް އެހީތެރިވެދޭ ވަސީލަތްތަކެއްގެ ގޮތުގައި ކަމަށް އުއްތަމަ ފަނޑިޔާރު ވިދާޅުވިއެވެ.
ރާއްޖޭގެ ޖުޑީޝަރީގައި ވެސް ވަށާޖެހޭ ކޭސް މެނޭޖްމަންޓް ސިސްޓަމެއް ބޭނުންކުރުމަކީ ހާސިލުކުރެވިދާނެ ތަސައްވުރެއްކަން ފާހަގަކުރައްވަމުން، މިހާރު ރާއްޖޭގެ ކޯޓުތަކުގައި ނުނިމި ހުރި މައްސަލަތަކުގެ ތަފާސްހިސާބުތައް އެމަނިކުފާނު ހިއްސާކުރެއްވިއެވެ. އެގޮތުން ރާއްޖޭގެ ކޯޓުތަކުގައި އެކި މަރުހަލާތަކުގައި ޖުމްލަ 13,032 މައްސަލަ ހުރިއިރު، އޭގެ ތެރެއިން 585 މައްސަލައަކީ 5 އަހަރަށްވުރެ ގިނަ ދުވަސްވެފައިވާ މައްސަލަތައް ކަމަށާއި، މީގެ ސަބަބުން އާބާދީގެ 3 އިންސައްތައަށް އަސަރުކުރާކަން ފާހަގަކުރެއްވިއެވެ.
ކޯޓުތަކުގެ ނިޒާމު ހަރުދަނާކޮށް މި އަހަރުގެ ނިޔަލަށް 6,185 މައްސަލަ ނިންމުމަށް އަމާޒުހިފާފައިވާއިރު، އަންނަ އަހަރުގެ ނިޔަލަށް ނުނިމި ހުރި ހުރިހާ މައްސަލައެއް ބަލައި ނިންމުމަށް ވަނީ ކަނޑައަޅާފައެވެ. އަދި މި ކޮންގްރެސްގެ ހަވާސާގައި ބޭއްވުނު މަޝްވަރާތަކަށްފަހު، ދުސްތޫރީ ކޯޓުތަކުގައި އޭއައި ބޭނުންކުރުމާ ބެހޭގޮތުން އެއްބەސްވާ ހަމަތަކުގެ މައްޗަށް ބިނާކޮށް "ސަމަރުގަންދު ޑިކްލަރޭޝަން" ގެ ނަމުގައި ގަރާރެއް ވަނީ ފާސްކޮށްފައެވެ.
