ރާއްޖެ އައި ޗަައިނާ ފަތުރުވެެރިންގެ އަދަދު ތިންލައްކައަށްވުރެ މައްޗަށް އަރައިފިއެވެ.
ފަތުރުވެރިކަމާ ބެހޭ ވުޒާރާއިން އާންމުކޮށްފައިވާ އެންމެ ފަހުގެ ތަފާސްހިސާބުތައް ދައްކާގޮތުން، ސެޕްޓެމްބަރު މަހުގެ 30 ވަނަ ދުވަހުގެ ނިޔަލަށް ރާއްޖެއަށް ޖުމްލަ 1،603،021 ފަތުރުވެރިން ޒިޔާރަތްކޮށްފައިވެއެވެ. މިއަހަރުގެ މިހާތަނަށް ރާއްޖެއަށް އެންމެ ގިނަ ފަތުރުވެރިން ޒިޔާރަތްކޮށްފައިވަނީ ޗައިނާއިންނެވެ. އެގޮތުން ޗައިނާއިން އެކަނިވެސް 300،977 ފަތުރުވެރިން އައިސްފައިވާއިރު، މިއީ ރާއްޖޭގެ ފަތުރުވެރިކަމުގެ މާކެޓުގައި ބޮޑު ހިއްސާއެއް އަދާކުރާ މުހިންމު މާކެޓެއްކަން ހާމަވެގެންދެއެވެ.
މި ތަފާސްހިސާބުތަކަށް ބަލާއިރު، ދެވަނައަށް އެންމެ ގިނަ ފަތުރުވެރިން ޒިޔާތްކޮށްފައިވަނީ ރަޝިއާއިންނެވެ. އެއީ 229،236 ފަތުރުވެރިންނެވެ. އަދި 119،968 ފަތުރުވެރިންނާއެކު ތިންވަނައަށް އެންމެ ގިނަ ފަތުރުވެރިން އައިސްފައިވަނީ އިނގިރޭސިވިލާތުންނެވެ. މީގެ އިތުރުން ދުނިޔޭގެ އެކި ކަންކޮޅުތަކުން ރާއްޖެއަށް ފަތުރުވެރިން އަންނަމުންދާއިރު، މިއަހަރުގެ މިހާތަނަށް ޒިޔާރަތްކުރި ފަތުރުވެރިންގެ އަދަދު މިދިޔަ އަހަރުގެ މި މުއްދަތާ އަޅާބަލާއިރު 3.4 އިންސައްތަ ދަށްވެފައިވާކަން ފާހަގަކުރެވެއެވެ. ތަފާސްހިސާބުތަކަށް ބަލާއިރު، މިދިޔަ އަހަރުގެ މި މުއްދަތުގައި 1،659،031 ފަތުރުވެރިން ރާއްޖެއަށް އައިސްފައިވެއެވެ. އަދި ހަމައެކަނި ސެޕްޓެމްބަރު މަހު ރާއްޖެއަށް 148،801 ފަތުރުވެރިން އައިސްފައިވާއިރު، މިއީ މިދިޔަ އަހަރުގެ ސެޕްޓެމްބަރު މަހު އައި 151،114 ފަތުރުވެރިންނާ އަޅާބަލާއިރު ކުޑަކޮށް ދަށް އަދަދެކެވެ.
ފަތުރުވެރިން އައިސްފައިވާ ވަސީލަތްތަކަށް ބަލާއިރު، ރާއްޖެއަށް މިހާތަނަށް އައި އެންމެ ގިނަ ފަތުރުވެރިން ޒިޔާރަތްކޮށްފައިވަނީ ގައުމީ ދޮރާށި ކަމަށްވާ ވެލާނާ އިންޓަނޭޝަނަލް އެއާޕޯޓް (ވީއައިއޭ) މެދުވެރިކޮށެވެ. ވީއައިއޭ މެދުވެރިކޮށް 1،569،214 ފަތުރުވެރިން އައިސްފައިވާއިރު، އޭގެ އިތުރުން ގަން އިންޓަނޭޝަނަލް އެއާޕޯޓް މެދުވެރިކޮށް 5،606 ފަތުރުވެރިން އަދި ސީޕޯޓުތައް މެދުވެރިކޮށް 15،583 ފަތުރުވެރިން ވަނީ ރާއްޖެއަށް ޒިޔާރަތްކޮށްފައެވެ.
އަދި މީގެއިތުރުން، ފަތުރުވެރިން ޗުއްޓީ ހޭދަކުރުމަށް ހިޔާރުކޮށްފައިވާ ތަންތަނުގެ ތަފާސްހިސާބުތަކަށް ބަލާއިރު، 1،158،404 ފަތުރުވެރިން މަޑުކޮށްފައިވަނީ ރިސޯޓުތަކުގައެވެ. އަދި 345،220 ފަތުރުވެރިން ގެސްޓްހައުސްތަކަށް ގޮސްފައިވާއިރު، ހޮޓެލްތަކަށް 36،106 ފަތުރުވެރިން ވަނީ ޒިޔާރަތްކޮށްފައެވެ. މި މައުލޫމާތުތަކުން ދައްކުވައިދެނީ ރާއްޖޭގެ ފަތުރުވެރިކަމުގެ ސިނާއަތް އަދިވެސް ވަރަށް ބާރަށް ކުރިއަށްދާކަމާއި، އެކި ގައުމުތަކުގެ ފަތުރުވެރިންގެ މެދުގައި ރާއްޖެއަކީ އަދިވެސް އެންމެ މަގުބުލު އެއް މަންޒިލް ކަމެވެ.
