ދިރިއުޅުމުގެ އެކި ގޮންޖެހުންތަކާއި ހާސްކަންކަމުން ނަފުސަށް ހަމަޖެހުމާއި އުފާވެރިކަން ހޯދައިދޭ އެންމެ ކުރު އަދި އެންމެ ފަސޭހަ މަގަކީ ﷲ ތަޢާލާ މަތީން ގިނަގިނައިން ޛިކުރުކުރުން ކަމަށާއި، ކޮންމެ ހާލަތެއްގައިވެސް ތަޤުވާވެރިކަން އިސްކުރުމަށް މިއަދުގެ ހުކުރު ޚުޠުބާގައި އިލްތިމާސްކޮށްފިއެވެ.
ޚުޠުބާގައި ފާހަގަކުރައްވާފައިވާ ގޮތުގައި، ޛިކުރުކުރުމަކީ ދުލުން ﷲ އަށް ޙަމްދާއި ޘަނާ ކިޔުމާއި، ކީރިތި ޤުރްއާން ކިޔެވުމާއި، ދުޢާކުރުމާއި، ކީރިތި ރަސޫލާ ﷺ ސަލާމާއި ޞަލަވާތް އިތުރުކުރުމުގެ އިތުރުން އެކަލާނގެ މަތިވެރި ކުޅަދުންވަންތަކަމާމެދު ފުންކޮށް ވިސްނައި ފިކުރުކުރުމެވެ. މީގެއިތުރުން، ސޫރަތުއްރަޢުދުގެ 28 ވަނަ އާޔަތް ހަވާލާދީ ޚުޠުބާގައި ބަޔާންކުރެއްވީ "ދަންނާށެވެ! ހިތްތައް ހަމަޖެހެނީ ﷲ ހަނދުމަކުރުމުންނެވެ." މިއީ އިލާހީ ޙަޤީޤަތެއް ކަމަށާއި، ޛިކުރުކުރުމަކީ އިންސާނާގެ ހަށިގަނޑަށް ދިރުމާއި އިލާހީ ކުއްތަންވުން ގެނެސްދޭ ކަމެއް ކަމަށެވެ.
މި މުހިންމު މައުޟޫޢަށް އަލިއަޅުވާލައްވަމުން، ﷲ ތަޢާލާ ހަނދުމަކުރާ މީހާއާއި ހަނދުމަނުކުރާ މީހާގެ ތަފާތު ބަޔާންކުރައްވައި ކީރިތި ރަސޫލާ ﷺ ޙަދީޘް ކުރައްވާފައިވާ ބަސްފުޅެއްގެ މާނަ ޚުޠުބާގައި ހިއްސާކުރެއްވިއެވެ.
އެކަލޭގެފާނު ޙަދީޘް ކުރެއްވިއެވެ: "އެކަލާނގެ ރަސްކަންފުޅު ހަނދުމަކުރާ މީހާއާއި، އެކަލާނގެ ރަސްކަންފުޅު ހަނދުމަނުކުރާ މީހާގެ މިޘާލަކީ، ދިރިހުރި މީހާއާއި މަރުވެފައިވާ މީހާގެ މިޘާލެވެ." (ރިވާކުރެއްވީ ބުޚާރީ އަދި މުސްލިމް).
މީގެއިތުރުން، ﷲ ތަޢާލާ ދީލަތިވެވޮޑިގެންވާ މިންވަރާއި، އަޅާ އެކަލާނގެއަށް ކުއްތަންވާ މިންވަރަށްވުރެ އިތުރަށް އެކަލާނގެ ރަޙްމަތް އަޅާއަށް ދެއްވާކަން ބަޔާންކުރައްވާ ޤުދްސީ ޙަދީޘެއްގެ މާނަވެސް ޚުޠުބާގައި ވަނީ ބަޔާންކޮށްދެއްވާފައެވެ. އެ ޙަދީޘްގައި ﷲ ތަޢާލާ ވަޙީކުރައްވާފައިވެއެވެ: "ތިމަންރަސްކަލާނގެ ވޮޑިގެންވަނީ، ތިމަންރަސްކަލާނގެއާމެދު ތިމަންރަސްކަލާނގެ އަޅާ ހީކުރާ ގޮތެއްގެ މަތީގައެވެ. އޭނާ ތިމަންރަސްކަލާނގެ ހަނދުމަކުރާ ވަގުތު ތިމަންރަސްކަލާނގެ އޭނާއާއެކު ވޮޑިގެންވަމެވެ. ... އަދި އޭނާ ތިމަންރަސްކަލާނގެއަށް މުށެއްގެ މިންވަރަށް ކުއްތަންވެއްޖެނަމަ، ތިމަންރަސްކަލާނގެ އޭނާއަށް ކަލަނބެއްގެ މިންވަރަށް ކުއްތަންވެވޮޑިގަންނަވަމެވެ. އަދި ކަލަނބެއްގެ މިންވަރަށް ކުއްތަންވެއްޖެނަމަ، ބޮމައެއްގެ މިންވަރަށް ކުއްތަންވެވޮޑިގަންނަވަމެވެ. އަދި އޭނާ ތިމަންރަސްކަލާނގެއަށް ހިނގާފައި އައިސްފިނަމަ، ތިމަންރަސްކަލާނގެ އެއަށްވުރެ ހަލުއި ފިޔަވަޅުގައި (އަވަސްވެވޮޑިގަންނަވާ ހާލު) އޭނާއަށް ޢަފޫކުރައްވައި ރަޙްމަތްލެއްވުމާއިގެން އަވަސްވެވޮޑިގަންނަވަމެވެ." (ރިވާކުރެއްވީ މުސްލިމް).
ޚުޠުބާ ނިންމަވާލައްވަމުން، އިންސާނާގެ ދިރިއުޅުމުގެ ހުރިހާ ވަގުތެއްގައިވެސް ހިނގާބިނގާވެ އުޅޭއިރު، ސަވާރީގައި ދަތުރުކުރާއިރު، އޮށޯވެ އޮންނައިރު އަދި މަސައްކަތުގައި އުޅޭއިރުވެސް ދޫ ﷲ މަތީން ހަނދުމަކުރުމުގައި ތެތްކަންމަތީ ބެހެއްޓުމަށް ނަސޭހަތްތެރިވިއެވެ.
އެކަމަށް ބާރުއެޅުމުގެ ގޮތުން ކީރިތި ރަސޫލާ ﷺ ޞަޙާބީއަކަށް ދެއްވި އިރުޝާދެއްގެ މާނަ ފާހަގަކުރެއްވިއެވެ. އެކަލޭގެފާނު ޙަދީޘް ކުރެއްވިއެވެ: "ﷲ ތަޢާލާ ހަނދުމަކުރުމުން ތިބާގެ ދޫ އަބަދުވެސް ތެތްކަންމަތީ ބަހައްޓާށެވެ!" (ރިވާކުރެއްވީ ތިރްމިޛީ).
އެހެންކަމުން، ހެނދުނާއި ހަވީރުގެ ދުޢާތަކާއި، ނަމާދުގެ ފަހުގައި ކުރާ ޛިކުރުތަކަށް ސަމާލުކަންދީ، އަބަދުވެސް ﷲ މަތީން ހަނދުމަކުރާ ބަޔަކަށްވުމަށް މިއަދުގެ ހުކުރު ޚުޠުބާގައި ވަނީ ގޮވާލައްވާފައެވެ.
