އއ. ރަސްދޫގައި ސަރުކާރުން ތަރައްގީކުރަމުންދާ އާ ހޮސްޕިޓަލުގެ "ރީ-ސެޓިންގ އައުޓް" ގެ މަސައްކަތްތައް އެއްކޮށް ނިމި، އަމަލީ މަސައްކަތްތައް ބާރުދުވެލީގައި ކުރިއަށްދާ ކަމަށް އެމްޓީސީސީއިން ހާމަކޮށްފިއެވެ.
މި މަޝްރޫއުގެ މިހާރުގެ އަދާހަމައަށް ބަލާއިރު، ސްޓްރިޕް ފުޓިންގ -03 ގެ ފައުންޑޭޝަން ކޮނުމުގެ މަސައްކަތްތަކުގެ އިތުރުން އިމާރާތުގެ ރައްކާތެރިކަމަށްޓަކައި ކުރަންޖެހޭ ޝޯރިންގގެ މުހިންމު މަސައްކަތްތައް ވަނީ ފަށައިގެން ކުރިއަށްގެންގޮސްފައެވެ.
ޖުމްލަ 185 މިލިއަން ރުފިޔާގެ ބަޖެޓަކުން ކުރިއަށްގެންދާ މި މަޝްރޫއަކީ 780 ދުވަހުގެ ތެރޭގައި އެއްކޮށް ނިންމާލުމަށް އެމްޓީސީސީއާ ހަވާލުކޮށްގެން ކުރިއަށްދާ ބިޔަ މަޝްރޫއެކެވެ.
މި މަޝްރޫއަކީ ރަސްދޫގެ އިތުރުން މުޅި އަތޮޅުގެ ސިއްހީ ނިޒާމު އިތުރަށް ފުޅާކޮށް، އާންމު ރައްޔިތުންނަށް ފެންވަރު ރަނގަޅު، ޒަމާނީ ސިއްހީ ހިދުމަތްތަކެއް ފަސޭހަކަމާއެކު ލިބޭނެ މަގުފަހިކުރުމަށް ސަރުކާރުން ހާއްސަ އިސްކަމެއް ދީގެން ކުރިއަށްގެންދާ މަޝްރޫއެކެވެ.
ރަސްދޫ ހޮސްޕިޓަލްގެ އާ އިމާރާތުގެ ބިންގާ އަޅުއްވައިދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެ ރަށަށް ކުރެއްވި ރަސްމީ ޒިޔާރަތުގެ ތެރެއިން ބޭއްވި ހާއްސަ ރަސްމިއްޔާތެއްގައެވެ.
ސަރުކާރުން އަންނަނީ ރާއްޖޭގެ އެކި ކަންކޮޅުތަކުގައި ސިއްހީ ދާއިރާއާއި އުމްރާނީ ތަރައްގީގެ ބޮޑެތި މަޝްރޫއުތަކެއް ހިންގައި، ރައްޔިތުންނަށް ރަށުގައި ތިބެގެން އަސާސީ ހިދުމަތްތައް ލިބޭނެ ގޮތް މަގުފަހިކޮށްދެމުންނެވެ
