ހުޅުމާލޭގައި ތަރައްގީކޮށްފައިވާ "އަމާން އުދަރެސް" އަދި "އަމާން ދޯދި" ސޯޝަލް ހައުސިން ޓަވަރުތަކުގެ ތެރެއިން 500 އަށްވުރެ ގިނަ ފްލެޓުން ކުލި ނުދައްކާ މައްސަލައެއް ފަހު ދިރިއުޅުން ކޯޕަރޭޝަން (އެފްޑީސީ) އިން ހާމަކޮށްފިއެވެ.
އެފްޑީސީގެ ތަފާސްހިސާބުތަކަށް ބަލާއިރު، 3،362 ޔުނިޓަކުން ގަވާއިދުން ކުލި ދައްކަމުން ދިޔަނަމަވެސް، އެއްބަސްވުމާ އެއްގޮތަށް ކުލި ނުދައްކާ 564 ޔުނިޓެއް އަދިވެސް އެބަހުއްޓެވެ.
އެހެންކަމުން، ސޯޝަލް ހައުސިންގެ ހިދުމަތްތައް ދެމެހެއްޓެނިވި ގޮތެއްގައި ކުރިއަށްގެންދިއުމަށްޓަކައި އެއްބަސްވުމާ އެއްގޮތަށް ގަވާއިދުން ފައިސާ ދެއްކުމަށް އެ ކޯޕަރޭޝަނުން ވަނީ އިލްތިމާސްކޮށްފައެވެ.
ކުލީގެ މައްސަލައިގެ އިތުރުން، އެޕާޓްމަންޓްތަކުގައި ދިރިއުޅޭ ފަރާތްތަކުގެ މެދުގައި އަވަށްޓެރިންނަށް އުނދަގޫވާ ގޮތަށް އަޑުގަދަކުރުމާއި، އިމާރާތުގެ އާންމު އުސޫލުތަކާ ހިލާފުވުން ފަދަ ތަފާތު ޝަކުވާތައް ވެސް އެފްޑީސީއަށް ދަނީ ލިބެމުންނެވެ.
އެގޮތުން އަޑުގަދަވެގެން ހުށަހެޅުނު 2 މައްސަލައެއް ބަލައި ނިންމާފައިވާއިރު، ރަސްމީ އެންގުންތަކަށް ބޯނުލެނބުމުގެ ސަބަބުން އިތުރު 2 މައްސަލައެއްގެ ތަހުގީގު މިހާރުވެސް ދަނީ ކުރިއަށްދާ ކަމަށް އެފްޑީސީން މައުލޫމާތު ދެއެވެ.
އެފްޑީސީން ބުނީ އެންމެންނަށް ވެސް ހިތްފަސޭހަ، އަމާން އަދި ރައްކާތެރި މާހައުލެއް ގާއިމުކޮށްދިނުމަށްޓަކައި މިފަދަ މައްސަލަތައް ވަރަށް ސީރިއަސްކޮށް ބަލަމުންދާ ކަމަށާއި، އެންމެހައި ރައްޔިތުންވެސް އިމާރާތުގެ ގަވާއިދުތަކަށް ފުރިހަމައަށް ބޯލެނބުމަކީ ނުހަނު މުހިންމު ކަމެއް ކަމަށެވެ.
