ޓިކްޓޮކްގައި ބޮޑު މަގުބޫލުކަމެއް ހޯދާފައިވާ ފަޔާޒް ހަސަންގެ ހާއްސަ އެހީއަށް ބޭނުންވާ ދަރިފުޅު، ފައްޔާހް ހަސަން ފަޔާޒް (ދޮންކަލޯ) އަށް އެހީތެރިވުމުގެ ގޮތުން ޓިކްޓޮކްގެ ދިވެހި ކޮމިއުނިޓީން އިސްނަގައިގެން ކުރިއަށް ގެންދިޔަ ހާއްސަ ފަންޑްރެއިޒިން ލައިވް އިވެންޓުގައި ރެކޯޑް އަދަދަކަށް ފައިސާ ލިބިއްޖެއެވެ.
ޓިކްޓޮކްގެ ގިނަ އަދަދެއްގެ މަޝްހޫރު ހޯސްޓުންނާއި ކްރިއޭޓަރުން ގުޅިގެން ރޭ ކުރިއަށް ގެންދިޔަ މި ހަރަކާތް ނިންމާލިއިރު، އެހީގެ ގޮތުގައި 1.2 މިލިއަނަށްވުރެ ގިނަ ރުފިޔާ ވަނީ އެއްކުރެވިފައެވެ. މީގެއިތުރުން، އެކި ފަރާތްތަކުން ވަނީ ފައްޔާހުގެ އާއިލާއަށް ބޭނުންވާ ތަފާތު އެކި ދިރިއުޅުމުގެ ސާމާނާއި ތަކެތި ވެސް ހަދިޔާކޮށްފައެވެ.
އުމުރުން 19 އަހަރުގެ ފައްޔާހަކީ ނުކުޅެދުންތެރިކަން ހުންނަ ކުއްޖަކަށްވާއިރު، އޭނާ ދިވެހީންގެ މެދުގައި މަގުބޫލުވެގެން ދިޔައީ އޭނާގެ ބައްޕަ ފަޔާޒް ޓިކްޓޮކްގައި ހިއްސާކުރަން ފެށި ލޯބިވެތި ވީޑިއޯތަކާއި ލައިވްތަކުގެ ސަބަބުންނެވެ.
ފައްޔާހް ބެލެހެއްޓުމަށް މުޅި އުމުރު ހުސްކޮށްލައިގެން ހުރި އޭނާގެ ބައްޕަ، އެ ދެބަފައިންގެ ދިރިއުޅުމުގެ އެކި އުފާވެރި މަންޒަރުތައް ސޯޝަލް މީޑިއާގައި ހިއްސާކުރަމުންދާއިރު، ދަރިފުޅަށް އޭނާގެ ހިތުގައި އޮތް އިންތިހާ ލޯބީގެ ސަބަބުން އެތައް ހާސް ބައެއްގެ ތައުރީފާއި އިހުތިރާމް ފަޔާޒަށް ވަނީ ލިބިފައެވެ.
ޓިކްޓޮކް ކޮމިއުނިޓީން މިފަދަ ބޮޑު އެހީގެ ހަރަކާތެއް ރޭވީ، ފައްޔާހުގެ މުސްތަގުބަލަށްޓަކައި އޭނާގެ ބައްޕަ އަޅައިދޭން ފެށި ގޭގެ މަސައްކަތް މާލީ ދަތިތަކާ ހުރެ ނުނިމި ދިގުލައިގެން ގޮސްފައިވާތީ، އެ ގެ ނިންމައި އާއިލާއަށް އަމާން ދިރިއުޅުމެއް ހޯދައިދިނުމުގެ މަގުސަދުގައެވެ.
ރޭގެ ލައިވް ކުރިއަށް ދިޔައިރު، އެކި ވަގުތުތަކުގައި އެއްފަހަރާ 13،000 އަށްވުރެ ގިނަ މީހުން ލައިވް ބަލަމުން ދިޔައެވެ. އަދި އެތައް ހާސް އާންމުންނެއް ވަނީ އެމީހަކަށް ވެވުނު މިންވަރަކުން ފައިސާގެ އެހީ ފޮނުވައި، ދީލަތިކަމުގެ އިންތިހާ ނަމޫނާއެއް ދައްކާފައެވެ.
މިއީ ދިވެހިރާއްޖޭގެ ސޯޝަލް މީޑިއާގެ ތާރީޚުގައި، ހާއްސަކޮށް ޓިކްޓޮކް މެދުވެރިކޮށް އިޖުތިމާއީ ކަމަކަށް ފައިސާ ހޯދުމަށް މިހާތަނަށް ހިންގި އެންމެ ކާމިޔާބު އަދި އެންމެ ގިނަ ފައިސާ އެއްކުރެވުނު ހަރަކާތެވެ.
މި ހަރަކާތުން ދައްކުވައިދިނީ ދިވެހިންގެ ތެރޭގައި އޮތް އެކުވެރިކަމާއި، އެކަކު އަނެކަކަށް އެހީތެރިވުމުގެ ރޫހު އަދި ސޯޝަލް މީޑިއާ އެދެވޭ ހެޔޮ ކަންކަމުގައި ބޭނުންކުރެވިދާނެ މިންވަރެވެ.
