މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަޝްރޫއުގެ ދަށުން، މި ހިނގާ އޮކްޓޫބަރު މަހުގެ 27 ވަނަ ދުވަހު ތިލަފުށީގައި ޕޯޓުގެ އޮޕަރޭޝަންތައް ފެށުމަށް ތައްޔާރުވަމުންދާކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ މެނޭޖިން ޑިރެކްޓަރު ހުސެއިން ޝަފީގު ވިދާޅުވެއްޖެއެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒާއި އިކޮނޮމިކް މިނިސްޓަރު މުހައްމަދު ސައީދު ތިލަފުއްޓަށް ކުރެއްވި ޒިޔާރަތުގައި ވާހަކަދައްކަވަމުން ޝަފީގު ފާހަގަކުރެއްވީ، މި މަހުގެ 27 އިން ފެށިގެން މާލެއާ އެކުއެކީ ތިލަފުށީގައި ވެސް އޮޕަރޭޝަންތައް ކުރިއަށްދާނެ ކަމަށެވެ. އަދި މަސައްކަތްތައް އަވަސްކޮށް، 2027 ވަނަ އަހަރުގެ ނޮވެމްބަރުގެ ނިޔަލަށް މުޅި މަޝްރޫއު އެއްކޮށް ނިންމާލެވޭނެ ކަމަށް އޭނާ ވިދާޅުވިއެވެ.
ޝަފީގު ވިދާޅުވި ގޮތުގައި، މިހާރުވެސް ގިނަ އަދަދެއްގެ މުދާ އަންނަމުންދާއިރު ބަނދަރުގެ ހާލަތު ހުރިގޮތުން މުދާ ބޭލުމުގެ ވަސީލަތްތައް ނެތުމުން ގޮންޖެހުންތަކާ ކުރިމަތިލާންޖެހެއެވެ. 1986 ގައި ހިދުމަތް ދޭންފެށި މާލޭ ބަނދަރަކީ 2015 އިން ފެށިގެން ކެޕޭސިޓީއަށްވުރެ އިތުރަށް ހިދުމަތްދެމުންދާ ތަނެކެވެ. މާލޭގައި އެންމެ 5 ހެކްޓަރުގެ ޖާގައެއް ބޭނުންކުރާއިރު، ތިލަފުށީގައި ޕޯޓު ތަރައްގީކުރުމަށް ވަނީ 60 ހެކްޓަރުގެ ބޮޑު ބިމެއް ހަމަޖައްސާފައެވެ.
އެކި ފިޔަވަހިތަކަށް ބަހާލައިގެން ކުރިއަށްދާ މި މަޝްރޫއުގެ ދަށުން، މިދިޔަ އަހަރު ފެށި ފުރަތަމަ ފިޔަވަހީގެ 100 މީޓަރުގެ ޑޮމެސްޓިކް ކީވޯލްގެ މަސައްކަތް މިހާރު ވަނީ އެއްކޮށް ނިމިފައެވެ. އަދި އިންޓަނޭޝަނަލް ކީވޯލްގެ މަސައްކަތް ޗައިނާގެ ކުންފުންޏަކާ ހަވާލުކޮށްފައިވާއިރު، މި މުޅި މަޝްރޫއު ނިމޭއިރު 2 ކިލޯމީޓަރުގެ ބޮޑު ސަރަހައްދެއް ތަރައްގީކުރެވިގެންދާނެއެވެ.
