ރާއްޖޭގެ ވިޔަފާރި ބަނދަރު ތިލަފުށްޓަށް ބަދަލުކުރުމުގެ މަޝްރޫއަކީ 2040 ވަނަ އަހަރަށް ރާއްޖެ ތަރައްގީވެފައިވާ ގައުމަކަށް ހެދުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ގެންގުޅުއްވާ ތަސައްވުރު ހަގީގަތަކަށް ހެދުމަށް އެޅޭ އެންމެ ވަރުގަދަ އެއް ބިންގާ ކަމަށް އިގްތިސާދީ ތަރައްގީއާއި ވިޔަފާރިއާ ބެހޭ ވަޒީރު މުހައްމަދު ސައީދު ވިދާޅުވެއްޖެއެވެ.
ރައީސުލްޖުމްހޫރިއްޔާގެ އަރިހުގައި ތިލަފުށީގެ ޕޯޓް މަޝްރޫޢުގެ މަސައްކަތްތައް ބައްލަވާލެއްވުމަށް ކުރެއްވި ޒިޔާރަތުގައި ވަޒީރު ފާހަގަކުރެއްވި ގޮތުގައި، މި މަޝްރޫއު ނުހިނގާ އެތައް އަހަރެއް ވޭތުވެދިޔުމަކީ އިގްތިސާދީ ކުރިއެރުމަށް އެޅުނު ބޮޑު ހުރަހެކެވެ. ނަމަވެސް ސަރުކާރުގެ އަމާޒަކީ އަންނަ އަހަރުގެ ނޮވެމްބަރުގެ ނިޔަލަށް ފުރަތަމަ ފިޔަވަހި ނިންމައި، 2028 ވަނަ އަހަރުގެ ނޮވެމްބަރަށް މުޅި މަޝްރޫއު އެއްކޮށް ނިންމާލުމެވެ.
މި މަޝްރޫއުގެ ސަބަބުން ޕްރައިވެޓް ސެކްޓަރާއި ޓޫރިޒަމް ދާއިރާގެ 11 ބިލިއަން ޑޮލަރުގެ އިންވެސްޓްމަންޓްތަކަށް ބޭނުންވާ މުދާ ލިބުމުގައި ދިމާވާ ދަތިތަކަށް ދާއިމީ ހައްލެއް ލިބި، އާންމު ރައްޔިތުންގެ ދިރިއުޅުމުގެ ހަރަދުތަކަށް ބޮޑު ލުޔެއް ލިބިގެންދާނެއެވެ. އެގޮތުން، މާލޭ ޕޯޓުގައި ކާބޯތަކެއްޗާއި ތަރުކާރީ ފަދަ ނާޒުކު ތަކެތި ކްލިއާކުރުމަށް މިހާރު ހޭދަވާ 7-8 ދުވަހުގެ މުއްދަތު ކުރުވެ، ބޯޓުން ބާލާތާ 24 ގަޑިއިރު ތެރޭގައި ތާޒާކަންމަތީ ފިހާރަތަކަށް މުދާ ފޯރުކޮށްދެވޭނެ އިންތިޒާމު ހަމަޖެހޭނެއެވެ.
މަޝްރޫއު ނިމޭއިރު ބައިނަލްއަގުވާމީ ފެންވަރުގެ ކީވޯލްތަކާއި ޒަމާނީ ބަނދަރެއް ގާއިމުވެ، ބާޒާރުމަތީގައި ހުރި އަތޮޅު ފިހާރަތަކާއި، ގުދަންތަކާއި ފްރީޒޯންތައް ތިލަފުށްޓަށް ބަދަލުވެގެންދާނެއެވެ. މީގެއިތުރުން، ބްރިޖް މެދުވެރިކޮށް އެއްގަމު މަގުން ކާގޯ އުފުލުމާއި، ހުޅުމާލެއަށް އިންބައުންޑް މުދާ ފޮނުވުމުގެ އިތުރުން ވެލާނާ އިންޓަނޭޝަނަލް އެއާޕޯޓަށް ސީ-ޓު-އެއާ ކާގޯގެ ހިދުމަތް ދިނުމަށް މަގުފަހިވެގެންދާނެއެވެ.
