އުމުރުން ދުވަސްވީ މީހުންގެ ހައްގުތައް ރައްކާތެރިކޮށް، އެމީހުންގެ ދުޅަހެޔޮކަން ކަށަވަރުކުރުމަށްޓަކައި ގައުމީ އަޒުމެއް ކަނޑައަޅަންޖެހޭ ކަމަށް ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުހައްމަދު ވިދާޅުވެއްޖެއެވެ.
ބައިނަލްއަގުވާމީ ގޮތުން ފާހަގަކުރާ އުމުރުން ދުވަސްވީ މީހުންގެ ދުވަހުގެ މުނާސަބަތުގައި ސޯޝަލް މީޑިއާ މެދުވެރިކޮށް ފޮނުއްވި މެސެޖެއްގައި އެކަމަނާ ފާހަގަކުރެއްވީ، ދުވަސްވީ މީހުންނަކީ މުޖުތަމައުގެ އިޖުތިމާއީ އާދަކާދަތައް ދަމަހައްޓައި، ޖީލުތަކަށް އިލްމާއި ހިކުމަތް ފޯރުކޮށްދިނުމުގައި އަގުނުކުރެވޭފަދަ ބޮޑު ހިދުމަތްތަކެއް ކޮށްދެއްވާފައިވާ ބޭފުޅުން ކަމަށެވެ. އެހެންކަމުން، އެ ބޭފުޅުންގެ ހިދުމަތްތަކުގެ އަގުވަޒަންކުރުމާއެކު، އަބުރުވެރި ދިރިއުޅުމެއް އުޅެވޭނެ މަގު ފަހިކޮށްދިނުމަކީ މުޅި މުޖުތަމައުގެ ޒިންމާއެއް ކަމަށް މެޑަމް ސާޖިދާ ވިދާޅުވިއެވެ.
ދުނިޔޭގެ އާބާދީގައި އުމުރުން ދުވަސްވީ މީހުންގެ ނިސްބަތް އިތުރުވަމުންދާކަން ފާހަގަކުރައްވަމުން، ދިރިއުޅުމުގެ ކޮންމެ މަރުހަލާއެއްގައިވެސް އެކަކު އަނެކަކަށް އަޅާލައި އެހީތެރިކަން ފޯރުކޮށްދޭނެ ގޮތްތަކާ މެދު އަލުން ވިސްނާ، އާ ގޮތްތައް ހޯދަންޖެހިފައިވާ ކަމަށް ރައީސާގެ އަނބިކަނބަލުން ވިދާޅުވިއެވެ. އެގޮތުން، އުމުރުން ދުވަސްވީ މީހުން މުޖުތަމައާ އޮންނަ ގުޅުން ބަދަހިކޮށް، އެމީހުންނަށް އުފާވެރި، ދުޅަހެޔޮ އަދި އިއްޒަތްތެރި ދިރިއުޅުމެއް ކަށަވަރުކޮށްދިނުމަށްޓަކައި މުޖުތަމައުގެ ތެރެއިން އެކަށީގެންވާ ފުރުސަތުތައް ފަހިކޮށްދޭންޖެހޭ ކަމަށް އެކަމަނާ ފާހަގަކުރެއްވިއެވެ.
މީގެއިތުރުން، ސަރުކާރުގެ ސިޔާސަތުތައް ބައްޓަންކުރަންވާނީ އުމުރުން ދުވަސްވީ މީހުންގެ ދުޅަހެޔޮކަމަށް އަމާޒުކޮށްގެން ކުރެވޭ ދާއިމީ އިންވެސްޓްމަންޓްތަކާއި، ހަރުދަނާ ސިއްހީ ނިޒާމެއްގެ އިތުރުން، އިޖުތިމާއީ ރައްކާތެރިކަމާއި އިގްތިސާދީ ފުރުސަތުތައް ހިމެނޭ ގޮތަށް ކަމަށް މެޑަމް ސާޖިދާ ވިދާޅުވިއެވެ. ގައުމުގެ ތަރައްގީގެ މަރުހަލާތަކުގައި ދުވަސްވީ މީހުންގެ ފުރިހަމަ ބައިވެރިވުން ހިމެނުމަކީ އޯގާތެރި އަދި އެންމެންގެ ބައިވެރިވުން އޮންނަ މުޖުތަމައެއް ބިނާކުރުމަށް ކޮންމެހެން ބޭނުންތެރި ކަމެއްކަން ފާހަގަކުރައްވަމުން، ކޮންމެ މީހަކީވެސް އަބުރުވެރިކަމާއި، ސަލާމަތްތެރިކަމާއެކު އުމުރުން ދުވަސްވާ މީހަކަށް ހެދުމަށް އެންމެން ގުޅިގެން މަސައްކަތްކުރުމަށް އެކަމަނާ ގޮވާލެއްވިއެވެ.
