މާލޭގެ ބޮޑުތަކުރުފާނު މަގު ޒަމާނީ ފެންވަރަށް ތަރައްޤީކުރުމުގެ ބިޔަ މަޝްރޫޢުގެ ދަށުން، ސުނާމީ ބިނާ ސަރަޙައްދުން ފެށިގެން މޯލްޑިވްސް ޕޯޓްސް ލިމިޓެޑް (އެމްޕީއެލް) އާ ހަމައަށް އޮތް ސަރަޙައްދުގައި ތާރުއަޅައިގެން މަގު ހެދުމުގެ ޢަމަލީ މަސައްކަތް ފެށުމަށްޓަކައި ވާންޖެހޭ އެންމެހައި ތައްޔާރީތައް ވަމުންދާކަމަށް މިނިސްޓްރީ އޮފް އިންފްރާސްޓްރަކްޗަރ، ހައުސިންގ އެންޑް އަރބަން ޑިވެލޮޕްމަންޓުން ބުނެފިއެވެ.
އިންފްރާސްޓްރަކްޗަރ މިނިސްޓްރީން މިރޭ އާންމުކުރި ހާމަކުރުމެއްގައި ބުނެފައިވަނީ، މަގު ހެދުމުގެ މަސައްކަތް އަމަލީގޮތުން ފެށުމަށްޓަކައި ސުނާމީ ބިނާއިން ފެށިގެން އެމްޕީއެލް ސަރަޙައްދާ ހަމައަށް ބޮޑުތަކުރުފާނު މަގުމަތީގައި ބަހައްޓާފައިވާ އެންމެހައި ތަކެއްޗާއި، ސުނާމީ ބިނާ ސަރަޙައްދުގެ ފަޅުތެރޭގައި އަޅާފައިވާ އުޅަނދުފަހަރުތައް އަންނަ ހޮނިހިރު ދުވަހުގެ ރޭގަނޑު 11:00 ގެ ކުރިން އެ ސަރަޙައްދުން ނަގައި ހުސްކުރަންޖެހޭ ކަމަށެވެ. އަދި ކަނޑައަޅާފައިވާ މުއްދަތު ހަމަވާއިރު ނުނަގައި ހުންނަ ތަކެއްޗާއި ކަނޑުއުޅަނދުފަހަރު، މަޝްރޫޢުގެ މަސައްކަތަށް މަގުފަހިކުރުމުގެ ގޮތުން މިނިސްޓްރީގެ އިސްނެގުމުގެ މަތިން ނަގަމުންދާނެކަމުގެ އިންޒާރުވެސް އެ މިނިސްޓްރީން ވަނީ ދީފައެވެ.
މާލޭގެ ދާއިރާގެ ދަތުރުފަތުރާއި ތޮއްޖެހުމަށް ލުޔެއް ހޯދައިދިނުމުގެ ގޮތުން ހިންގާ ބޮޑުތަކުރުފާނު މަގު ތަރައްޤީކުރުމުގެ މަޝްރޫޢުގެ ބޮޑުބައެއް މިހާރު ވަނީ ކާމިޔާބުކަމާއެކު ނިންމާލާފައެވެ. މީގެ ކުރިން ނިމުނު ބައިތައް ތަރައްޤީކޮށްފައިވަނީ ފަޅުތެރެއިން ބައެއް ހިއްކައިގެން މަގު ފުޅާކުރުމަށްފަހު، ފެންހިނދާނެ ނިޒާމާއެކު ޒަމާނީ ފެންވަރަށް ތާރުއަޅައިގެންނެވެ.
އެ ސަރަހައްދުގެ މަގުމަތީގެ ރައްކާތެރިކަން ދެމެހެއްޓުމަށާއި ޓްރެފިކް ތޮއްޖެހުން ކުޑަކުރުމަށްޓަކައި މަގުމަތީގައި ޕާކްކުރުން މަނާކޮށްފައިވީ ނަމަވެސް، އާންމުންނަށް ދިމާވާ ދަތިތަކަށް ހައްލެއްގެ ގޮތުން ބޭންކް އޮފް މޯލްޑިވްސް (ބީއެމްއެލް) ކުރިމަތީގައި 500 ސައިކަލުގެ ޖާގައިގެ ބޮޑު ޕާކިން ޒޯނެއް ވަނީ ގާއިމުކޮށްދީފައެވެ.
ސަރުކާރުގެ އަމާޒަކީ މުޅި ބޮޑުތަކުރުފާނު މަގު އެކީގައި ޒަމާނީ ފެންވަރަށް ތަރައްޤީކޮށް، މާލޭގެ ދަތުރުފަތުރުގެ ނިޒާމަށް އިންގިލާބީ ބަދަލެއް ގެނެސްދިނުމެވެ.
