ރާއްޖޭގެ ތިމާވެށި ހިމާޔަތްކުރުމަށާއި ދިރުންތަކުގެ ނަސްލުތައް ރައްކާތެރިކުރުމަށްޓަކައި މުހިންމު މަޝްރޫޢުތަކެއް ކުރިއަށް ގެންދިއުމަށްޓަކައި، މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީ (އެމްއޯސީސީއީއީ) އާއި ޔުނައިޓެޑް ނޭޝަންސް ޑިވެލޮޕްމަންޓް ޕްރޮގްރާމް (ޔޫއެންޑީޕީ) އާ ދެމެދު އެއްބަސްވުމުގައި (ލެޓާސް އޮފް އެގްރީމަންޓް) މިއަދު ސޮއިކޮށްފިއެވެ.
ގްލޯބަލް އެންވަޔަރަންމަންޓް ފެސިލިޓީ (ޖީއީއެފް) ގެ މާލީ އެހީތެރިކަމާއެކު ކުރިއަށްގެންދާ މި މަޝްރޫޢުތަކުގެ މައިގަނޑު އަމާޒަކީ ރާއްޖޭގެ ތިމާވެށި ރައްކާތެރިކުރުމުގެ ޤައުމީ ސިޔާސަތުތައް އިތުރަށް ހަރުދަނާކޮށް، ދުނިޔޭގެ ފެންވަރުގައި ތިމާވެށި ހިމާޔަތްކުރުމަށް ކުރެވޭ މަސައްކަތްތަކުގައި ރާއްޖޭގެ ހިއްސާ ބޮޑުކުރުމެވެ.
އެގޮތުން، މި އެއްބަސްވުމުގެ ދަށުން ރާއްޖޭގެ "ނެޝަނަލް ބަޔޯޑައިވަރސިޓީ ސްޓްރެޓެޖީ އެންޑް އެކްޝަން ޕްލޭން" ޒަމާނީ މިންގަނޑުތަކަށް މުރާޖަޢާކޮށް އަދާހަމަކުރުމުގެ މަސައްކަތް ކުރިއަށްދާނެއެވެ. މީގެއިތުރުން، ކޮންވެންޝަން އޮން ބަޔޮލޮޖިކަލް ޑައިވަރސިޓީ (ސީބީޑީ) އަށް ރާއްޖެއިން ހުށަހަޅަންޖެހޭ 7 ވަނަ ޤައުމީ ރިޕޯޓު ތައްޔާރުކުރުމުގެ މަސައްކަތްވެސް މި މަޝްރޫޢުގެ ތެރެއިން ކުރިއަށްދާނެއެވެ.
ތިމާވެށީގެ ދިރުންތައް ރައްކާތެރިކޮށް ދެމެހެއްޓެނިވި ގޮތެއްގައި އެކަންކަން ކުރިއަށް ގެންދިއުމަށްޓަކައި، ބޭނުންވާ މާލީ ވަސީލަތްތައް ހޯދޭނެ މަގުފަހިކުރުމުގެ ގޮތުން "ބަޔޯޑައިވަރސިޓީ ފައިނޭންސިންގ ޕްލޭން" އެކުލަވާލުމަކީވެސް މި އެއްބަސްވުމުގެ މުހިންމު ބައެކެވެ. އެންވަޔަރަންމަންޓް މިނިސްޓްރީން ފާހަގަކުރި ގޮތުގައި، މިއީ ރާއްޖޭގެ ނާޒުކު ތިމާވެށި ހިމާޔަތްކުރުމަށާއި، ބައިނަލްއަޤްވާމީ މައިދާނުގައި ތިމާވެށީގެ ހެޔޮ ބަދަލުތަކަށް އެއްބާރުލުން ދިނުމަށް ދިވެހި ސަރުކާރުން ކުރަމުންދާ މަސައްކަތްތަކަށް ލިބުނު ވަރަށް ބޮޑު ކުރިއެރުމެކެވެ.
