ހާއްސަ އެހީއަށް ބޭނުންވާ ފަރާތްތަކަށް އަބުރުވެރި އަދި މުއްސަނދި ދިރިއުޅުމެއް ހޯދައިދީ، މުޖުތަމައުގައި އެމީހުން ބާރުވެރިކުރުވުމަށް ސަރުކާރުން ގެންގުޅުއްވާ ހަރުދަނާ ސިޔާސަތުގެ ދަށުން މިހާތަނަށް އެފަދަ 416 ފަރާތަކަށް ވަޒީފާގެ ފުރުސަތު ފަހިކޮށްދެވިފައިވާ ކަމަށް ސިއްހަތާއި، އާއިލާއާއި އިޖްތިމާއީ އެހީއާ ބެހޭ ވަޒީރު ގީލާ އަލީ ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި މިއަދު ބޭއްވެވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ވަޒީރު ފާހަގަކުރެއްވި ގޮތުގައި، ހާއްސަ އެހީ ބޭނުންވާ ފަރާތްތަކަކީ މުޖުތަމައުގައި އެކެދިވެރިވެ ބާކީވެގެންދާ ބަޔަކަށްވުމުގެ ބަދަލުގައި، އިއްޒަތާއި ގަދަރާ އެކު ދިރިއުޅޭ ބަޔަކަށް ހެއްދެވުމަކީ ރައީސް ޑރ. މުހައްމަދު މުއިއްޒުގެ ވަރަށް މުހިންމު ތަސައްވުރެކެވެ. އެ ތަސައްވުރާ އެއްގޮތަށް ދައުލަތުގެ އޮފީސްތަކާއި ވިޔަފާރި ކުންފުނިތައް މެދުވެރިކޮށް އެ ފަރާތްތަކަށް ވަޒީފާގެ ފުރުސަތުތައް ހޯދައިދިނުމަށް ޚާއްސަ މަސައްކަތްތަކެއް ކުރެވެމުންދާ ކަމަށް އެމަނިކުފާނު ވިދާޅުވިއެވެ.
ވަޒީފާތަކަށް މީހުން ހަމަޖެއްސުމުގެ އިތުރުން، މަސައްކަތުގެ މާހައުލަށް އެފަރާތްތައް އަހުލުވެރިކުރުމަށް ބޭނުންވާ ހާއްސަ ތަމްރީނު ޕްރޮގްރާމްތަކާއި، މަސައްކަތުގެ މާހައުލަކީ އެ ފަރާތްތަކަށް ރައްކާތެރި އަދި ފަސޭހަ ތަނަކަށް ހެދުމަށްޓަކައި އެހެނިހެން މުވައްޒަފުން ހޭލުންތެރިކުރުވުމުގެ ސެންސިޓައިޒޭޝަން ޕްރޮގްރާމްތަކާއި ހުނަރުވެރިކަން އިތުރުކުރުމުގެ ޕްރޮގްރާމްތައްވެސް ވަނީ ކާމިޔާބުކަމާއެކު ކުރިއަށް ގެންގޮސްފައެވެ.
ވަށާޖެހޭ އުސޫލަކުން މިފަދަ ފުރުސަތުތައް ފަހިވެގެން ދިއުމަކީ އެ ފަރާތްތަކުގެ އާއިލާތަކަށް ލިބިގެންދިޔަ ވަރަށް ބޮޑު ހިތްހަމަޖެހުމެއްކަން ފާހަގަކުރައްވަމުން، މި ސިޔާސަތުގެ މައިގަނޑު އަމާޒަކީ އެއްވެސް މީހަކު ބާކީނުކޮށް، އިގްތިސޯދީ ގޮތުން އެމީހުން ބާރުވެރިކޮށް މުޖުތަމައުގެ ކަންކަމުގައި ފުރިހަމައަށް ބައިވެރިކުރުން ކަމަށް ވަޒީރު ތަކުރާރުކޮށް ވިދާޅުވިއެވެ.
