ކ. ގުރައިދޫގައި ޤާއިމުކޮށްފައިވާ ޚާއްޞަ އެހީއަށް ބޭނުންވާ މީހުންގެ މަރުކަޒު ޒަމާނީ ފެންވަރަށް ތަރައްޤީކޮށް، އެތަނުގެ ޖާގައާއި ޚިދުމަތުގެ ފެންވަރު މަތިކުރުމަށްޓަކައި 80 އެނދުގެ އައު ޢިމާރާތެއް އެޅުމަށް ބަޖެޓު ހަމަޖެހި، އެ މަސައްކަތް ކަމާބެހޭ ފަރާތާ ޙަވާލުކުރެވިފައިވާ ކަމަށް ސިއްހަތާއި، އާއިލާއާއި އިޖްތިމާއީ އެހީއާ ބެހޭ ވަޒީރު ޤީލާ ޢަލީ ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި ބޭއްވެވި ޚާއްޞަ ނޫސްވެރިންގެ ބައްދަލުވުމެއްގައި ވާހަކަދައްކަވަމުން ވަޒީރު ފާހަގަކުރެއްވި ގޮތުގައި، ގުރައިދޫ މަރުކަޒުގެ ޚިދުމަތްތައް ވީހާވެސް ފުރިހަމަ އަދި ޒަމާނީ ގޮތަކަށް ބައްޓަންކުރުމުގެ މަސައްކަތް ކުރިއަށްދާއިރު، މުޅި މަރުކަޒުގެ އުމްރާނީ އަދި ނިޒާމީ ބޮޑު ބަދަލަކަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އާ ގުޅިގެން ޚާއްޞަ މާސްޓަރ ޕްލޭނެއް އެކުލަވާލުމުގެ މަސައްކަތްވެސް މިހާރު ވަރަށް ބާރަށް ކުރިއަށްދާ ކަމަށެވެ.
މި މަރުކަޒުގައި ދެމުންދާ ފަރުވާ ފުރިހަމަކުރާ ފަރާތްތައް އަނބުރާ މުޖުތަމަޢަށް ނެރެ، އެމީހުންނަކީ އަމިއްލަ ފައިމައްޗަށް ތެދުވެވި އަބުރުވެރި ދިރިއުޅުމެއް އުޅެވޭނެ ބަޔަކަށް ހެދުމަށް ސަރުކާރުން ޚާއްޞަ އިސްކަމެއްދީގެން ގިނަގުނަ މަސައްކަތްތަކެއް ކުރަމުންދާކަން ވަޒީރު ފާހަގަކުރެއްވިއެވެ. އެގޮތުން، އެފަރާތްތަކަށް ބޭނުންވާ ހުނަރު ތަރައްޤީކުރުމާއި ވަޒީފާގެ ފުރުޞަތުތައް ފަހިކޮށްދިނުމުގެ މުހިންމު އެއްބަސްވުންތަކެއްގެ ދަށުން ވެމްކޯ އަދި މޯލްޑިވްސް ލިޓެކްނިކާ މިއަދު ފަހުމުނާމާއެއްގައި ސޮއިކުރެވިފައިވާ ކަމަށް ވިދާޅުވިއެވެ. މީގެ އިތުރުން، މުޖުތަމަޢުގެ ތެރެއަށް މިފަރާތްތައް ޝާމިލުކުރުމަށް (ކޮމިއުނިޓީ ރީއިންޓެގްރޭޝަން) ރާއްޖޭގެ އެކި ކަންކޮޅުތަކުގައި ހޭލުންތެރިކުރުމުގެ 12 ސެޝަނެއް ބާއްވައި، ޖުމްލަ 440 މީހުން ހޭލުންތެރިކޮށްފައިވާކަން ފާހަގަކުރެއްވިއެވެ. މިފަދަ ހަރުދަނާ ސިޔާސަތުތަކުގެ ސަބަބުން، 2023 ވަނަ އަހަރުގެ ނޮވެމްބަރު މަހުން ފެށިގެން މިހާތަނަށް މަރުކަޒީ ފަރުވާ ފުރިހަމަކުރި 66 ފަރާތެއް ވަނީ އެމީހުންގެ ޢާއިލާތަކާ އަލުން ގުޅުވައިދީ، މުޖުތަމަޢުގެ ތެރެއަށް ކާމިޔާބުކަމާއެކު ނެރެދެވިފައިވާ ކަމަށް ވަޒީރު ވިދާޅުވިއެވެ.
ޚާއްޞަ އެހީއަށް ބޭނުންވާ ފަރާތްތަކަށް އެކަށީގެންވާ ލޯތްބާއި، އޯގާތެރިކަމާއި، ފުރިހަމަ ޞިއްޙީ އަދި އިޖްތިމާޢީ އަޅައިލުން ފޯރުކޮށްދީ، މުޅި މަރުކަޒުގެ ނިޒާމު އިތުރަށް ހަރުދަނާކުރުމަށް ސަރުކާރުން އަބަދުވެސް ދަމަހައްޓާނީ ސާބިތު ޢަޒުމެއް ކަމަށް އެމަނިކުފާނު ޔަޤީންކޮށްދެއްވިއެވެ.
