ރައްޔިތުންނަށް އަމިއްލަ ރަށުގައި ތިބެގެން ފެންވަރު ރަނގަޅު، އިތުބާރު ހުރި އަދި ޒަމާނީ ސިއްހީ ހިދުމަތް ފަސޭހަކަމާއެކު ލިބޭނެ އިންތިޒާމު ހަމަޖެއްސުމަށް ސަރުކާރުން ކުރަމުންދާ މަސައްކަތްތަކުގެ ދަށުން، އަތޮޅުތެރޭގެ ސިއްހީ ހިދުމަތްދޭ ތަންތަނުގެ އުމްރާނީ ތަރައްގީއަށް 5.98 ބިލިއަން ރުފިޔާގެމަޝްރޫއުތަކެއް ވަރަށް ހަލުވިމިނެއްގައި ކުރިއަށް ގެންދާކަމަށް ސިއްހަތާއި އާއިލާއާއި އިޖްތިމާއީ އެހީއާ ބެހޭ ވަޒީރު ގީލާ އަލީ ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި މިއަދު ބޭއްވެވި ހާއްސަ ނޫސްވެރިންގެ ބައްދަލުވުމެއްގައި ވާހަކަދައްކަވަމުން ވަޒީރު ފާހަގަކުރެއްވި ގޮތުގައި، ރާއްޖޭގެ އެކި ކަންކޮޅުތަކަށް ސިއްހީ ހިދުމަތް ފުޅާކޮށް، ބޭސްފަރުވާއަށް ރައްޔިތުން އުފުލަންޖެހޭ ބޮޑެތި ތަކުލީފުތަކާއި މާލީ ތަޅުވުންތަކަށް ދާއިމީ ލުޔެއް ހޯދައިދެއްވުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހާއްސަ އަހަންމިއްޔަތުކަމެއް ދެއްވައިގެން ޚާއްސަ ސިޔާސަތެއްގެ ދަށުން ކުރިއަށް ގެންދަވާ އެންމެ މުހިންމު އެއް މަސައްކަތެވެ.
މި ސަރުކާރުގެ ސިއްހީ ތަރައްގީގެ ދުވެލި މީގެ ކުރީގެ އަހަރުތަކާ އަޅައިބަލާއިރު ވަރަށް ބޮޑަށް އިތުރުވެފައިވާކަން ހާމަކުރައްވަމުން ވަޒީރު ވިދާޅުވީ، ރާއްޖޭގެ އެކި ސަރަހައްދުތަކުގައި 40 ހޮސްޕިޓަލެއްގެ އުމްރާނީ މަޝްރޫއުގެ މަސައްކަތް މިހާރު ފަށާފައިވާ ކަމަށެވެ. މިއާ ހިލާފަށް، ނިމިދިޔަ ސަރުކާރުގެ ފުރަތަމަ ތިން އަހަރުގެ ތެރޭގައި އަތޮޅުތަކުގައި އެއްވެސް އައު ހޮސްޕިޓަލެއްގެ މަސައްކަތް ފަށާފައި ނުވާކަން އެމަނިކުފާނު ފާހަގަކުރެއްވިއެވެ.
ހޮސްޕިޓަލްތަކުގެ އިތުރުން ރަށްރަށުގެ ސިއްހީ މަރުކަޒުތައް ޒަމާނީ ފެންވަރަށް ތަރައްގީކުރުމަށްވެސް ބޮޑެތި މަޝްރޫއުތައް ހިންގަމުންދާ ކަމަށާއި، އެގޮތުން މި ސަރުކާރުން 22 އާ ސިއްހީ މަރުކަޒެއްގެ އަމަލީ މަސައްކަތް ފަށާފައިވާއިރު، ވޭތުވެދިޔަ ސަރުކާރުގެ ފުރަތަމަ ތިން އަހަރު އެފަދަ ފެށިފައިވަނީ އެންމެ ދެ މަޝްރޫއު ކަމަށް ވިދާޅުވިއެވެ. އަދި މިހާރު ހިދުމަތް ދެމުންދާ ސިއްހީ މަރުކަޒުތަކުގެ ޖާގަ އިތުރުކޮށް، ލެބޯޓްރީއާއި އެހެނިހެން ޒަރޫރީ ހިދުމަތްތައް އަޕްގްރޭޑް ކުރުމަށްޓަކައި 89 މަޝްރޫއެއް މިހާރުވެސް ކުރިއަށްދާ ކަމަށާއި، މީގެ ކުރީގެ ސަރުކާރުގެ އެ މުއްދަތުގައި އެފަދަ މަޝްރޫއުތަކުގެ އަދަދަކީ 38 ކަމަށްވެސް ވަޒީރު ވިދާޅުވިއެވެ.
މިފަދަ ހުރިހާ މަޝްރޫއުތަކެއް ނިމިގެންދާއިރު، އަތޮޅުތަކުގެ ސިއްހީ އުމްރާނީ ވަސީލަތްތައް ވަރަށް ބޮޑަށް ވަރުގަދަވެ، ކުދި އަދި ބޮޑު ބައްޔަކަށް ފަރުވާ ހޯދުމަށް ވެރިރަށް މާލެއަށް ނުވަތަ ރާއްޖެއިން ބޭރަށް ބަރޯސާވާންޖެހޭ މިންވަރު ވަރަށް ބޮޑަށް ކުޑަވެގެންދާނެ ކަމަށް ވަޒީރު ވިދާޅުވިއެވެ. މިކަމުގެ ސަބަބުން ރައްޔިތުންނަށް ދަތުރުފަތުރުކުރުމުގެ ދަތިކަމާއި ބޮޑެތި ހަރަދުތަކުން ސަލާމަތްވެ، މުޅި ރާއްޖޭގެ ސިއްހީ ނިޒާމަށް އިންގިލާބީ އަދި ދެމެހެއްޓެނިވި ހެޔޮ ބަދަލުތަކެއް އަންނާނެކަމުގެ ފުރިހަމަ ޔަގީންކަން އޮތް ކަމަށް އެމަނިކުފާނު ތަކުރާރުކޮށް ވިދާޅުވިއެވެ.
