ދުނިޔޭގެ އިޤްތިޞާދީ މާޙައުލަށް އަންމުންދާ ނޭދެވޭ ބަދަލުތަކާއި ލިބެމުންދާ އެކި އެކި ގޮންޖެހުންތަކުގެ ތެރޭގައި، ޤައުމު ނިކަމެތިވެގެން ދާން ދޫކޮށްލައިގެން ތިބެވެން ނެތްކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންދަވަނީ ހިތްވަރާއެކު ސާބިތުކޮށްދެއްވަމުން ކަމަށް އިޤްތިޞާދީ ތަރައްޤީއާއި ވިޔަފާރިއާބެހޭ ވަޒީރު މުޙައްމަދު ސައީދު ވިދާޅުވެއްޖެއެވެ.
ސޯޝަލް މީޑިއާގައި ހިއްސާކުރެއްވި ޚާއްޞަ ޕޯސްޓެއްގައި ވަޒީރު ފާހަގަކުރެއްވި ގޮތުގައި، ރާއްޖޭގެ ވިޔަފާރިއާއި އިޤްތިޞާދީ ކުރިއެރުމާ އެންމެ ބޮޑަށް ގުޅިފައިވާ އެއް މައި ތަނބަކީ މާލޭ ވިޔަފާރި ބަނދަރެވެ. އެ ބަނދަރުގެ ހާލަތު ބަދަލުކޮށް، ޒަމާނީ ފެންވަރަކަށް ތަރައްގީކުރުމަކީ އަދުގެ އިޤްތިޞާދީ ހަޤީޤަތްތަކާއި ފައިހަމަކުރުމަށްޓަކައި ކޮންމެހެން ކުރަންޖެހިފައިވާ ކަމެކެވެ. މާލޭ ވިޔަފާރި ބަނދަރުގެ ޚިދުމަތްތައް އަވަސްކޮށް، މުދާ ކްލިއަރ ކުރުމުގެ ކާރުބާރު ލުއިކޮށްދިނުމަކީ ވިޔަފާރިވެރިންނަށާއި ޢާންމު ރައްޔިތުންނަށްވެސް ބޮޑު ލުއެއް ލިބިގެންދާނެ ކަމެކެވެ.
މިކަމާ ގުޅޭގޮތުން އިތުރަށް ވާހަކަދައްކަވަމުން ވަޒީރު ސައީދު ވިދާޅުވީ، މާލޭ ވިޔަފާރި ބަނދަރު ޒަމާނީކޮށް، އޭގެ ފެންވަރު މަތިކުރުމުގެ ޚިޔާލު މީގެ އެތައް އަހަރެއް ކުރިން ކަމާބެހޭ އިދާރާތަކުން ދައްކަމުންދިޔަ ކަމަށެވެ. ނަމަވެސް އެތައް ޒަމާނެއް ވެގެންދިޔައިރުވެސް، ރާއްޖޭގެ މައި ވިޔަފާރި ބަނދަރު އޮތީ އެންމެ ފުރަތަމަ އެ ބަނދަރު މާލޭގައި ޤާއިމުކުރެވުނު މިންވަރަށެވެ. އެ މުއްދަތުގެ ތެރޭގައި ގެނެވިފައިވަނީ ހަމައެކަނި ވަރަށް ކުދިކުދި އަދި ވަގުތީ ތަރައްޤީތަކެއް ކަމަށާއި، ބަނދަރުގެ ޖާގައާއި ޓެކްނޮލޮޖީގެ ގޮތުން ކުރިއެރުންތަކެއް ނުލިބޭކަން ވަޒީރު ފާހަގަކުރެއްވިއެވެ.
މި ހުރިހާ ގޮންޖެހުންތަކަކާ އެކުވެސް، މި ހާލަތު މުޅިން ބަދަލުކުރެއްވުމަށް ރައީސް ޑރ. މުޙައްމަދު މުޢިއްޒު އިސްނަންގަވައި، އެކަމުގެ ޢަމަލީ މަސައްކަތްޕުޅު ފަށްޓަވާފައިވާކަން އެމަނިކުފާނު ފާހަގަކުރެއްވިއެވެ.
ރާއްޖޭގެ އިޤްތިޞާދަށް ދިމާވެފައިވާ މިފަދަ ބޮޑެތި މައްސަލަތައް ޙައްލުކުރެއްވުމުގައި ރައީސް ގެންގުޅުއްވަނީ ވަރަށް ހިކުމަތްތެރި އަދި ދުރުވިސްނޭ ސިޔާސަތެއް ކަމަށް ސައީދު ވިދާޅުވިއެވެ. ދުނިޔޭގެ އިޤްތިޞާދަށް އަންނަ ލޮޅުންތަކާއި، ސަރަޙައްދީ އަދި ބައިނަލްއަޤްވާމީ މާޙައުލުގައި ހުރި ގޮންޖެހުންތަކުގެ ސަބަބުން ކުދި ޤައުމުތަކަށް ކުރިމަތިވާ ނުރައްކާތަކުން ޤައުމު ސަލާމަތްކުރުމަށް ވެރިއެއްގެ ހައިސިއްޔަތުން ނަންގަވަންޖެހޭ ސާބިތު ފިޔަވަޅުތައް ރައީސް މުޢިއްޒު ނަންގަވަމުންދާކަން ވަޒީރު ތަކުރާރުކޮށް ފާހަގަކުރެއްވިއެވެ.
ވެރިއެއްގެ ޙަޤީޤީ ޒިންމާއަކީ ދިމާވާ ހުރަސްތަކާއި އުނދަގޫތަކަށް ފުރަގަސްދިނުމުގެ ބަދަލުގައި، އެކަންކަމާ ކުރިމަތިލައި، އިޚްލާޞްތެރި މަސައްކަތްތަކެއް ކޮށްދެއްވައި ޤައުމު އެ ޙާލަތުން މިންޖުކޮށްދިނުންކަން މި ސަރުކާރުން އަމަލުން ދައްކަމުންދާ ކަމަށްވެސް އެމަނިކުފާނު ވިދާޅުވިއެވެ.
