ސިޔާސީ މަޤުޞަދެއް ހާސިލުކުރުމަށްޓަކައި ރަސްމާލެ މަޝްރޫޢާ ގުޅޭގޮތުން ކަންކަން އޮޅޭގޮތަށް ވާހަކަދެއްކުމަކީ ޒިންމާދާރު ގޮތެއް ނޫން ކަމަށް ފަންނާއި ސަގާފަތާއި ތަރިކައާބެހޭ ވަޒީރު ހީނާ ވަލީދު ވިދާޅުވެއްޖެއެވެ.
ސޯޝަލް މީޑީއާ ޕްލެޓފޯމް "އެކްސް" ގައި ކުރެއްވި ޚާއްޞަ ޕޯސްޓްތަކެއްގައި، ވަޒީރު ވަނީ މި ބިޔަ މަޝްރޫޢާ ދެކޮޅަށް ދައްކަމުންދާ ވާހަކަތަކަށް ވަރަށް ބޮޑަށް ރައްދުދެއްވައި، މަޝްރޫޢުގެ ހަޤީޤީ މަންފާތަކާއި ތަފްޞީލުތައް ހާމަކުރައްވާފައެވެ.
ވަޒީރު ފާހަގަކުރެއްވި ގޮތުގައި، ރަސްމާލެ މަޝްރޫޢަކީ ހަމައެކަނ ރާއްޖޭގެ ބޯހިޔާވަހިކަމުގެ ދަތިކަމަށް ހައްލު ހޯދައިދޭ މަޝްރޫޢެއް ނޫނެވެ؛ މިއީ ދިވެހިރާއްޖޭގެ ތާރީޚުގައިވެސް ހިންގާ އެންމެ ބިޔަ ބޭރުގެ އިންވެސްޓްމަންޓެވެ. މި މަޝްރޫޢުގެ ދަށުން ރަސްމާލޭގައި ތަރައްޤީކުރާ ޕްރޮޕަޓީއެއް ވިއްކައިގެން ލިބޭ އާމްދަނީގެ 10 އިންސައްތަ ބިމުގެ އަގުގެ ގޮތުގައި ސީދާ ދައުލަތަށް ލިބޭނެ ކަމަށާއި، އެއީ ތިން ބިލިއަން ޑޮލަރަށްވުރެ ބޮޑު އަދަދެއް ކަމަށް ވިދާޅުވިއެވެ.
މީގެއިތުރުން، މިފަދަ ކޮންމެ ޕްރޮޕަޓީއަކުން ހިންގާ ކޮންމެ ޓްރާންސެކްޝަނަކުން 4 އިންސައްތައިގެ ފީއެއް ސަރުކާރަށް ދައްކަންޖެހޭގޮތަށް ހަމަޖެހިފައިވާއިރު، މިއީ މީގެ ކުރިން ރާއްޖޭގެ ބިންތައް ދިގު މުއްދަތަށް ދޫކުރި އުޞޫލާ ޚިދާފަށް، ދައުލަތަށާއި ރައްޔިތުންނަށް ދިގު މުއްދަތެއްގައި ދެމެހެއްޓެނިވި މަންފާތަކެއް ލިބޭނެހެން ފަރުމާކޮށްފައިވާ ނިންމުމެއްކަން އެމަނިކުފާނު ފާހަގަކުރެއްވިއެވެ. ކުރީގެ ސަރުކާރުތަކުގައި މިފަދަ ތަންތަނުން ލިބެމުންދިޔައީ ހަމައެކަނި ބިމު ކުލި ކަމަށާއި، ބޮޑެތި ވިޔަފާރިތަކުން ސަރުކާރަށް ނުވަތަ ރައްޔިތުންނަށް އިތުރު މަންފާއެއް ނުލިބޭ ކަމަށްވެސް ވިދާޅުވިއެވެ.
ރާއްޖެއަށް އަންނަ މިފަދަ ބޮޑެތި އިންވެސްޓްމަންޓްތަކާ ދެކޮޅަށް ދޮގު ވާހަކަ ފަތުރައި، އިންވެސްޓަރުންގެ ހިތުގައި ބިރުވެރިކަން އުފެއްދުމުގެ ނޭދެވޭ ނަތީޖާ މީގެ ކުރިން "ފާފު އަތޮޅު" މަޝްރޫޢުގެ ދުވަސްވަރުވެސް ފެނިފައިވާކަން ހަނދާންކޮށްދެއްވަމުން ހީނާ ވަނީ، އެފަދަ ފިލާވަޅުތަކުން ހޭލައި، ޤައުމަށް އަންނަ ތަރައްޤީއަށް ހުރަސްނޭޅުމަށް ގޮވާލައްވާފައެވެ. އަދި އީގަލް ހިލްސްއިން ރަސްމާލޭގައި ކުރާ މި އިންވެސްޓްމަންޓުން ދައުލަތަށް ލިބޭނެ ކަމަށް ލަފާކުރެވޭ އާމްދަނީ، ރާއްޖޭގެ 179 ރިސޯޓާއި، 16 ހޯޓަލާއި، 920 ގެސްޓްހައުސްގެ އިތުރުން 165 ސަފާރީން ލިބޭ ޖުމްލަ އާމްދަނީއަށްވުރެވެސް ބޮޑުވާނެ ކަމަށް ވިދާޅުވިއެވެ.
މީގެ އިތުރުން، ބައިނަލްއަޤްވާމީ މައިދާނުގައި ޒަޔަނިސްޓުންނާ ދެކޮޅަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމެވި ވަރުގަދަ ނިންމެވުންތަކަށް އަލިއޅުވާލައްވަމުން ހީނާ ވިދާޅުވީ، އިސްރާއީލްގެ ޕާސްޕޯޓް މަނާކުރެއްވުމާއި ބައިނަލްއަޤްވާމީ ފޯރަމްތަކުގައި ފާޅުގައި އަޑުއުފުއްލަވަމުންދަނީ މި ސަރުކާރުން ކަމަށެވެ. އެހެންކަމުން، ޔަހޫދީންނާ ގާތްގުޅުން ބޭއްވުމަށް މާޒީގައި ފާޅުގައި ގޮވާލާފައިވާ ފަރާތްތަކުން ދައްކާ ވާހަކަތަކަށް ރައްޔިތުން ހެއްލިނުދިއުމަށް އެދިވަޑައިގެންނެވިއެވެ. އަދި ވެރިކަމުގެ ދަހިވެތިކަމާއި ނަފްރަތުގެ އަނދިރިކަމުން އަރައިގަނެ، ޤައުމީ ވިސްނުމުގައި ކުރިއަށް ދިޔުމަށް ހުރިހާ ފަރާތްތަކަކަށް ވަޒީރު އިލްތިމާސްކުރެއްވިއެވެ.
