ދިވެހިރާއްޖޭގައި މިހާތަނަށް އެޗްއައިވީ ޖެހިގެން ރިޕޯޓްކޮށްފައިވަނީ ޖުމުލަ 76 ކޭސްކަމަށް ހެލްތު މިނިސްޓަރު ގީލާ އަލީ ވިދާޅުވެއްޖެއެވެ.
ދިވެހިރާއްޖޭގެ އަޑުން ގެނެސްދިން "އަހަށޭ ބުނާށޭ" ޕްރޮގްރާމްގައި ވާހަކަދައްކަވަމުން މިނިސްޓަރު މިހެން ވިދާޅުވީ، ފަހަކަށް އައިސް ރާއްޖެ ފަދަ ކުޑަ ޤައުމެއް ކަމަށްވާ ފިޖީގައި އެޗްއައިވީ ހަލުވިކަމާއެކު ފެތުރި ކުއްލި ނުރައްކަލުގެ ހާލަތު އިއުލާނުކޮށްފައިވާތީ، ރާއްޖޭގެ މިހާރުގެ ހާލަތާއި އެކަމުގެ ނުރައްކާ އޮތް މިންވަރާ ގުޅޭގޮތުން ޕްރެޒެންޓަރު ކުރެއްވި ސުވާލަކަށް ދެއްވި ޖަވާބުގައެވެ.
މިނިސްޓަރު ފާހަގަކުރެއްވި ގޮތުގައި، ރާއްޖެއިން އެންމެ ފުރަތަމަ އެޗްއައިވީގެ ކޭހެއް ފެނިފައިވަނީ 1991 ވަނަ އަހަރެވެ. އެ ދުވަސްވަރު އެ ބަލި ފެނުމާއެކު މުޖުތަމައުގެ ތެރޭގައި ބޮޑެތި ކަންބޮޑުވުންތަކަކާއި ބިރުވެރިކަމެއް އުފެދިގެންދިޔަ ނަމަވެސް، ފާއިތުވި އަހަރުތަކުގައި ސަރުކާރުންނާއި ކަމާބެހޭ މުވައްސަސާތަކުން އަޅާފައިވާ ހަރުދަނާ ފިޔަވަޅުތަކުގެ ސަބަބުން ހޭލުންތެރިކަން އިތުރުވެ، ބަލި ކޮންޓްރޯލްކުރުމަށް ފަރުވާއާއި އެހެނިހެން ވަސީލަތްތައް ވަނީ ފަހިކުރެވިފައެވެ.
އެގޮތުން، މިއަދު ދިވެހި ކޮންމެ ރައްޔިތަކަށްވެސް މި ބަލި ފެތުރޭ ގޮތްތަކާއި، ރައްކާތެރިވާނެ ގޮތްތަކުގެ އިތުރުން ދުނިޔޭގެ ފެންވަރުގައި މި ބައްޔަށް ހޯދިފައިވާ ފަރުވާގެ ކުރިއެރުންތައް ވަރަށް ސާފުކޮށް އެނގެން އަންނާނެ ކަމަށް ވިދާޅުވިއެވެ.
ރިކޯޑްތަކަށް ބަލާއިރު، މިހާތަނަށް ރާއްޖެއިން 76 މީހަކަށް މި ބަލިޖެހިފައިވާކަމަށް ރިޕޯޓްކޮށްފައިވީ ނަމަވެސް، އޭގެ ތެރެއިން މިވަގުތު ދުނިޔޭގައި ތިބީ 52 މީހުން ކަމަށް މިނިސްޓަރު ވިދާޅުވިއެވެ. އަދި ބައެއް އެހެން ޤައުމުތަކުގައި ބަލި ފެތުރިގެންދާ ފަދަ ނުރައްކާތެރި މިންވަރަކަށް ރާއްޖޭގައި މި ބަލި ފެތުރިފައިނުވާކަން ފާހަގަކުރައްވަމުން، ބަލިޖެހިފައިވާ ކޮންމެ ފަރުދަކަށްވެސް އެ ބަލި ޖެހެން މެދުވެރިވާ ސަބަބުތަކާއި ކަންކަން ކަމާބެހޭ ފަރާތްތަކަށް ސާފުކޮށް އެނގެންޖެހޭ ކަމަށާއި، މި ބަލިން ރައްކާތެރިވުމަށް ޤައުމީ ފެންވަރުގައި ދެމެހެއްޓެނިވި މަސައްކަތްތަކެއް ކުރަމުންދާ ކަމަށް މިނިސްޓަރު ވިދާޅުވިއެވެ.
