ލ. ކުނަހައްދޫ ވޮލީކޯޓުގައި ފެންސު ޖެހުމާއި ކޯޓު ތަރައްގީ ކުރުމުގެ އަމަލީ މަސައްކަތްތައް އެމްޓީސީސީއިން ބާރުމުދުވެއްޖެ ކަމަށް އެ ކުންފުނިން ހާމަކޮށްފިއެވެ.
ޒުވާނުންގެ މެދުގައި ކުޅިވަރަށް ލޯބިކުރާ ފަރާތްތަކަށް ލުއިފަސޭހަ ކޮށްދިނުމާއި، ރަށްރަށުގައި ކުޅިވަރުގެ އިންފްރާސްޓްރަކްޗަރ ހަރުދަނާކުރުމުގެ ސިޔާސަތުގެ ދަށުން ކުރިއަށްގެންދާ މި މަޝްރޫޢަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ލ. އަތޮޅުގެ ރަށްތަކަށް ކުރެއްވި ދަތުރުފުޅުގައި އެމްޓީސީސީއާ ހަވާލުކުރެވުނު މުހިންމު މަޝްރޫޢެކެވެ.
މި މަޝްރޫޢުގެ އެއްބަސްވުމުގައި ކުޅިވަރާބެހޭ ވުޒާރާގެ ފަރާތުން ސޮއިކުރެއްވީ ވަޒީރު އަބްދުﷲ ރާފިއުއެވެ. އަދި އެމްޓީސީސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު، ސީޕީ (ރިޓަޔާޑް) އަހްމަދު ސައުދީއެވެ. ޖުމްލަ 1.24 މިލިއަން ރުފިޔާގެ އަގަކަށް ހަވާލުކޮށްފައިވާ މި މަޝްރޫޢު ނިންމުމަށް ކަނޑައަޅާފައިވަނީ 120 ދުވަހުގެ މުއްދަތެކެވެ.
މި މަޝްރޫޢުގެ ދަށުން ކުނަހައްދޫ ވޮލީކޯޓު ޒަމާނީ ފެންވަރަކަށް ތަރައްގީކުރުމަށްޓަކައި، ކޮންކްރީޓްގެ މަސައްކަތްތަކާއި، ދަގަނޑުގެ މަސައްކަތްތަކުގެ އިތުރުން ކަރަންޓުގެ ނިޒާމު ގާއިމުކުރުމުގެ މަސައްކަތް ކުރެވޭނެއެވެ. މީގެއިތުރުން ކޯޓުގައި ޓާފް އެޅުމާއި، ވޮލީ ކުޅުމަށް ބޭނުންވާ އެކި ބާވަތުގެ އިކުއިޕްމެންޓް ހަރުކުރުމުގެ މަސައްކަތްވެސް މި މަޝްރޫޢުގެ ތެރެއިން ކުރިއަށްދާނެއެވެ. މިފަދަ މަޝްރޫޢުތަކުގެ ސަބަބުން ކުނަހައްދޫގެ ޒުވާނުންނަށް ހިތްފަސޭހަކަމާއެކު ކުޅިވަރު ކުޅެވޭނެ ރައްކާތެރި އަދި ފުރިހަމަ މާހައުލެއް ޤާއިމުވެގެންދާނެ ކަމަށް އެމްޓީސީސީން ފާހަގަކުރެއެވެ.
