ދަސްވެނިވާ ދަރިވަރުން ހަމައެކަނި މައުލޫމާތުން މުއްސަނދި ބަޔަކަށް ވުމުގެ ބަދަލުގައި، އިލްމީ ތެދުވެރިކަމާއި ރިވެތި އަހުލާގު އިސްކުރާ ނަމޫނާ ޖީލަކަށް ވުމަށް ފަންނާއި ސަގާފަތާއި ތަރިކައާ ބެހޭ ވަޒީރު ހީނާ ވަލީދު އިލްތިމާސްކުރައްވައިފިއެވެ.
ވިލާ ކޮލެޖުގެ މިއަހަރުގެ ދަސްވެނިވުމުގެ ފުރަތަމަ ދަންފަޅި ޝަރަފުވެރިކޮށްދެއްވައި، މިނިސްޓަރ ހީނާ ވަނީ ގައުމެއްގެ ތަރައްގީއަށް ފިކުރީ ވިސްނުމާއި އިލްމީ ސިކުނޑިތައް އުފެއްދުމާއެކު، ހަރުދަނާ އަހުލާގީ ގިޔަމްތަކެއްގެ މަތީގައި ސާބިތުވެތިބުން ކޮންމެހެން ބޭނުންވާނެކަން ފާހަގަ ކުރައްވާފައެވެ.
މިނިސްޓަރގެ ވާހަކަފުޅުގައި، އިންސާނީ ކަރާމާތަށް ހުރުމަތްތެރިކޮށް ހިތުމާއި، އެކަކު އަނެކަކުގެ ޚިޔާލަށް އިހުތިރާމްކުރުމުގެ އިތުރުން، ކަންކަމުގެ ހަގީގަތް ހޯދައި ބެލުމުގެ ތަހުޒީބީ ސިފަތައް މުޖުތަމައުގައި އަށަގަންނުވަންޖެހޭކަމަށް ވިދާޅުވިއެވެ. އަދި އިލްމުވެރިންނަކީ އެފަދަ ކަންކަމުގައި މުޖުތަމައަށް ފެންނާނެ ނަމޫނާއަކަށް ވާންޖެހޭނެކަން ފާހަގަކުރައްވަމުން، ގައުމެއްގައި އިލްމީ ރޫހެއް ބިނާކޮށް އީޖާދީ ފިކުރުތައް އާލާކުރެވެނީ ތައުލީމީ އަދި ތަރުބަވީ ނިޒާމުގެ ތެރެއިންކަމަށް ބަޔާންކުރެއްވިއެވެ. މިގޮތުން ޖީލުތައް ބިނާކުރުމުގެ އެންމެ އިސް މަސްއޫލިއްޔަތު އެޅިފައިވަނީ ތައުލީމީ ދާއިރާގެ ޚިދުމަތްތެރިންގެ ކޮނޑުގައިކަން އެމަނިކުފާނު ފާހަގަކުރެއްވިއެވެ.
މި ފުރުސަތުގައި، ހާސިލުކުރި ސަނަދަކީ ހަމައެކަނި ލިޔުމެއްގެ ގޮތުގައި ނުދެކި، އޭގެ ބޭނުން ހެޔޮގޮތުގައި ހިފައި ގައުމަށް ޚިދުމަތްކުރުމަށް ދަސްވެނިންނަށް ވަޒީރު ނަސޭހަތްތެރިވެވަޑައިގެންނެވިއެވެ. އަދި ގައުމުގެ އިޖްތިމާއީ ފޭރާމާއި އަހުލާގީ މިންގަނޑުތައް ހެޔޮ މަގަށް އެޅުވުމަށްޓަކައި، އަމިއްލަ އިސްނެގުމާ އެކު މަސައްކަތްކުރާ ގާބިލު މޭސްތިރިންނަށް ވުމަށް ބާރުއަޅުއްވައި، މިއަދުގެ ދަސްވެނިންނަކީ މުސްތަގުބަލުގައި ގައުމަށް ދިމާވާ ގޮންޖެހުންތަކަށް ވިސްނުންތެރިކަމާއެކު ހައްލު ހޯދައިދޭނެ ކަމުގެ ފުރިހަމަ ޔަގީންކަން އޮތް ބައެއް ކަމަށް ވިދާޅުވަމުން ވަޒީރުގެ ވާހަކަފުޅު ނިންމަވާލެއްވިއެވެ.
