އަމީނީ މަގުގައި މަރާމަތުކުރި ސަރަޙައްދު އަންނަ އާދިއްތަ ދުވަހު އާންމު ދަތުރުފަތުރަށް ހުޅުވާލާނެ ކަމަށް ބިނާރާއި ގެދޮރުވެރިކަމާ ޢުމްރާނީ ތަރައްޤީއާ ބެހޭ ވުޒާރާއިން ހާމަކޮށްފިއެވެ.
އެމްޓީސީސީއާ ހަވާލުކޮށްގެން ކުރިއަށްގެންދާ މި މަޝްރޫއުގެ ދަށުން ދުއްވުމަށް ހުޅުވާލަނީ ދިވެހިރާއްޖޭގެ އަޑުން ފެށިގެން ދަރުމަވަންތަ ހޮސްޕިޓަލާ ހަމައަށް އޮތް ސެގްމަންޓް 1 ގެ ސަރަހައްދެވެ.
މަގުގެ އަޑީގެ ނެޓްވޯކްތައް އަލުން ތަރުތީބުކޮށް، ތާރުއެޅުމުގެ މަސައްކަތް ނިމި މިހާރު ކުރިއަށްދަނީ ޓްރެފިކް ނިޝާންތައް ކުރެހުމާއި ފިނިޝިންގ މަސައްކަތްތަކެވެ. މި ސަރަހައްދު ހުޅުވާލުމަށްފަހު ދެން ފަށާނީ އިއްޒުއްދީން މަގުން ފެށިގެން ކޯރުކެނޑި ހިނގުމާ ހަމައަށް އޮންނަ ސެގްމަންޓް 3 ގެ މަސައްކަތެވެ. މީގެއިތުރުން، މާލޭގެ ހުޅަނގުކޮޅުން ބޭރުމަގު ތަރައްގީކުރުމުގެ މަޝްރޫއުގެ ފެންހިންދާ ނިޒާމުގެ މަސައްކަތަށް ވެސްޓް ޕާކް ސަރަހައްދުން ބައެއް މިހާރު ވަނީ ބަންދުކޮށްފައެވެ.
