ރަސްމާލޭގައި އީގަލް ހިލްސްއިން ތަރައްޤީކުރުމަށް ހަމަޖެހިފައިވާ "މޯލްޑިވްސް ވޯޓަރފްރަންޓް އެންޑް މެރީނާ" މަޝްރޫޢަކީ ދިވެހިރާއްޖޭގެ އިޤްތިޞާދީ މުސްތަޤްބަލަށް އިންޤިލާބީ ބަދަލުތަކެއް ގެނެސްދޭނެ، ތާރީޚީ އަދި ބިޔަ މަޝްރޫޢެއް ކަމަށް މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް އަބްދުއްރައްޒާޤް ޙަލީމް ވިދާޅުވެއްޖެއެވެ.
ސޯޝަލް މީޑިއާ ޕްލެޓފޯމް "އެކްސް" ގައި ހިއްޞާކުރެއްވި ޚާއްޞަ ޕޯސްޓެއްގައި، އެމަނިކުފާނު ވަނީ މި މަޝްރޫޢާ ގުޅޭގޮތުން ދިވެހި ސަރުކާރަށާއި ރައްޔިތުންނަށް ލިބިގެންދާނެ މުހިންމު އަދި ތަފްޞީލީ ފައިދާތަކެއްގެ މައްޗަށް އަލިއޅުވާލައްވާފައެވެ.
އެމަނިކުފާނު ފާހަގަކުރެއްވި ގޮތުގައި، މި މަޝްރޫޢުގެ އެންމެ ފާހަގަކޮށްލެވޭ އެއް ކަމަކީ ދައުލަތް އިތުރު ދަރަންޏަކަށް ނުވެ، 20 ބިލިއަން އެމެރިކާ ޑޮލަރަށްވުރެ ބޮޑު އިންވެސްޓްމަންޓަކާއެކު ކުރިއަށްދާކަމެވެ. މި މެގަ-ޕްރޮޖެކްޓްގެ ދަށުން 3 ކޮޓަރީގެ 5,000 ހައުސިންގ ޔުނިޓް މުޅިން ޑިވެލޮޕަރުގެ ޚަރަދުގައި ބިނާކޮށްދިނުމަށް ހަމަޖެހިފައިވާއިރު، މިއީ ރާއްޖޭގެ ބޯހިޔާވަހިކަމުގެ މައްސަލައަށް ލިބިގެންދާނެ ވަރަށް ބޮޑު ލުޔެކެވެ. މީގެއިތުރުން، މި މަޝްރޫޢުގެ ތެރެއިން ދިވެހި ޒުވާނުންނަށާއި މަސައްކަތްތެރިންނަށް 54,000 އަށްވުރެ ގިނަ އައު އަދި ފެންވަރު ރަނގަޅު ވަޒީފާގެ ފުރުޞަތުތައް އުފެދިގެންދާނެ ކަމަށްވެސް ޙަލީމް ވިދާޅުވިއެވެ.
މަޝްރޫޢުގެ މާލީ ފައިދާތަކަށް އަލިއޅުވާލަމުން ޙަލީމް ވިދާޅުވީ، މަޝްރޫޢުގެ ޑިވެލޮޕްމަންޓް މުއްދަތުގެ ތެރޭގައި އެކަނިވެސް 11 ބިލިއަން ޑޮލަރަށްވުރެ ބޮޑު އަދަދެއް ދައުލަތުގެ ޚަޒާނާއަށް ލިބިގެންދާނެ ކަމަށެވެ. އަދި މި މަޝްރޫޢު ހިންގާނީ ރާއްޖޭގެ ބިމުގެ މިލްކުވެރިކަން އެއްވެސް ފަރާތަކަށް ދޫނުކޮށް، މުޅިންވެސް ދިވެހިރާއްޖޭގެ ޤާނޫނުތަކާއި ޤަވާއިދުތަކުގެ ފުރިހަމަ ހިމާޔަތާއި ބާރުގެ ދަށުން ކަމުގެ ޔަޤީންކަން ދެއްވާފައިވެއެވެ.
އިޤްތިޞާދީ މި އިންވެސްޓްމަންޓުގެ ބޮޑުކަން ހާމަކޮށްދެއްވަމުން ޙަލީމް ވިދާޅުވީ، 2025 ވަނަ އަހަރުގެ މީރާގެ ރެކޯޑުތަކަށް ބަލާއިރު، މިހާރު ރާއްޖޭގައި އޮތް ފަތުރުވެރިކަމުގެ ދާއިރާގެ ޖުމްލަ އިންވެސްޓްމަންޓަކީ 13.7 ބިލިއަން އެމެރިކާ ޑޮލަރު ކަމަށެވެ. ނަމަވެސް، ރަސްމާލޭގެ އީގަލް ހިލްސް އިންވެސްޓްމަންޓުން ދިވެހި ދައުލަތަށް ލިބޭނެ ކަމަށް ލަފާކުރެވޭ އާމްދަނީއަކީ، 179 ރިސޯޓާއި، 16 ހޯޓަލާއި، 920 ގެސްޓްހައުސް އަދި 165 ސަފާރީ އުޅަންދު ހިމެނޭހެން، މުޅި ފަތުރުވެރިކަމުގެ ދާއިރާއިން ދައުލަތަށް ލިބޭ ޖުމްލަ އާމްދަނީއަށްވުރެވެސް މަތިވާނެ އަދަދެއް ކަމަށެވެ. އެމަނިކުފާނު ވިދާޅުވިގޮތުގައި، މި މަޝްރޫޢުގެ ސަބަބުން ދިވެހި ރައްޔިތުންނަށް ކޮންމެ އަހަރަކު ލިބޭނެ އާމްދަނީ މިހާރުގެ މުޅި ފަތުރުވެރިކަމުގެ ސިނާޢަތަށްވުރެވެސް ބޮޑުވެގެންދާނެއެވެ.
ނަމަވެސް، ޤައުމަށް މިފަދަ ބޮޑެތި މަންފާތަކެއް ލިބެން އޮތް ނަމަވެސް، ބައެއް ފަރާތްތަކުން ސިޔާސީ މަޤުޞަދުތަކުގައި މި މަޝްރޫޢާ ދެކޮޅަށް ވާހަކަދައްކައި، ރައްޔިތުންނަށް އޮޅުވާލައި ދޮގު މައުލޫމާތު ފެތުރުމަށް މަސައްކަތްކުރަމުންދާކަން ޙަލީމް ފާހަގަކުރެއްވިއެވެ. ސިޔާސީގޮތުން ޚިޔާލު ތަފާތުވުންތަކެއް ހުރި ނަމަވެސް، ޤައުމުގެ ތަރައްޤީއަށް ހުރަސްއަޅައި، ޤައުމަށް ލިބޭ މިފަދަ ރަނުގެ ފުރުޞަތުތައް ހުއްޓުވަން މަސައްކަތްކުރުމަކީ ޤައުމާމެދު އިޚްލާޞްތެރިކަމެއް ނެތުން ކަމަށް އެމަނިކުފާނު ސިފަކުރެއްވިއެވެ. އަދި މި މަޝްރޫޢަކީ ރާއްޖޭގެ ކުރިމަގަށާއި ޒުވާނުންގެ ފާގަތި މުސްތަޤްބަލަށްޓަކައި ކޮންމެހެން ބޭނުންވާ މުހިންމު ފިޔަވަޅެއްކަން ދިވެހި ރައްޔިތުން މިއަދު ޤަބޫލުކުރާ ކަމަށް ވިދާޅުވެ އެމަނިކުފާނުގެ ވާހަކަފުޅު ނިންމަވާލައްވާފައިވެއެވެ.
