ހދ. ނެއްލައިދޫ ޞިއްޙީ މަރުކަޒު ޒަމާނީ ފެންވަރަށް ތަރައްޤީކޮށް ޢިމާރާތްކުރުމުގެ މަޝްރޫޢުގެ މަސައްކަތްތައް ބާރު ސްޕީޑުގައި ކުރިއަށްދާ ކަމަށް އެމްޓީސީސީއިން ހާމަކޮށްފިއެވެ.
މި މަޝްރޫޢުގެ މިހާރުގެ ޢަމަލީ މަސައްކަތްތަކަށް ބަލާއިރު، ޢިމާރާތުގެ ބިންގާ އެޅުމުގެ ބީމް (ފައުންޑޭޝަން ބީމް) ޝަޓަރިންގް ހަރުކުރުމާއި ދަނޑިމަޑު ނުވަތަ ރީއިންފޯސްމަންޓް ޖެހުމުގެ މަސައްކަތްތައް މިހާރު ވެސް ކުރިއަށް ދާކަމާށް އެމްޓީސީސީއިން ބުންޏެވެ.
ރާއްޖޭގެ އެކި ރަށްރަށުގައި ޞިއްޙީ ޚިދުމަތްތައް ފުޅާކޮށް ތަރައްޤީކުރުމުގެ ސިޔާސަތުގެ ދަށުން، ނެއްލައިދޫ ޞިއްޙީ މަރުކަޒު ތަރައްޤީކުރުމުގެ މި މަޝްރޫޢަކީ ސަރުކާރުން ވަރަށް ބޮޑު އިސްކަމެއް ދީގެން ކުރިއަށް ގެންދާ މުހިންމު މަޝްރޫޢެކެވެ. ރަށްރަށުގެ ޞިއްޙީ މަރުކަޒުތައް ޒަމާނީ ފެންވަރަށް ތަރައްޤީކުރުމަށް ސަރުކާރުން އެމްޓީސީސީއާއި ޙަވާލުކޮށްފައިވާ މަޝްރޫޢުގެ ދަށުން މި މަސައްކަތް ފަށާފައިވަނީ 2025 ވަނަ އަހަރުގެ މާރިޗު މަހުގެ ތެރޭގައެވެ. މި މަޝްރޫޢަށް ބޭނުންވާ ބަޖެޓާއި މާލީ ޚަރަދުތައް ހަމަޖައްސާފައިވަނީ ސަރުކާރުގެ ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީ.އެސް.އައި.ޕީ) ބަޖެޓުގެ ތެރެއިންނެވެ.
މި މަޝްރޫޢު ކަނޑައެޅިފައިވާ ތާވަލާ އެއްގޮތަށް ނިމުމުން، ނެއްލައިދޫގެ ރައްޔިތުންނަށް ޞިއްޙީ ޚިދުމަތް ހޯދުމުގައި ކުރިމަތިވަމުންދާ ދަތިތަކަށް ދާއިމީ ލުޔެއް ލިބިގެންދާނެ ކަމަށް ކަމާބެހޭ ފަރާތްތަކުން ލަފާކުރެއެވެ. އަދި މި ޒަމާނީ އިމާރާތާއެކު މަރުކަޒުގެ ޖާގަ ބޮޑުވެ، ޚިދުމަތުގެ ފެންވަރު ވަރަށް ބޮޑަށް ރަނގަޅުވެގެންދާނެ ކަމަށް އިންތިޒާރު ކުރެވެއެވެ.
