ރަސްމާލޭގައި 20 ބިލިއަން ޑޮލަރުގެ ވޯޓާ ފްރަންޓް އަދި މެރީނާ މަޝްރޫއު ކުރިއަށް ގެންދިއުމުގައި ދިވެހިރާއްޖޭގެ ގާނޫނުއަސާސީއާއި ގާނޫނުތަކާ ހިލާފު އެއްވެސް ކަމެއް ސަރުކާރުން ނުކުރާނެ ކަމަށް ބަންޑާރަ ނައިބް އަހްމަދު އުޝާމް ވިދާޅުވެއްޖެއެވެ.
މި މަޝްރޫއު ކުރިއަށް ގެންދިއުމުގައި ދިވެހިރާއްޖޭގެ ގާނޫނުއަސާސީއާއި ގާނޫނުތަކާ ހިލާފު އެއްވެސް ކަމެއް ސަރުކާރުން ނުކުރާނެ ކަމަށް ބަންޑާރަ ނައިބް ވަނީ ތަކުރާރުކޮށް ވިދާޅުވެފައެވެ.
ދުނިޔޭގެ ފެންވަރުގެ ފަތުރުވެރިކަމާއި، އަތިރިމަތީގެ ހިތްގައިމު ދިރިއުޅުމާއި، މެރީނާ މަންޒިލެއްގެ ގޮތުގައި ތަރައްގީކުރާ މި މަޝްރޫއަކީ ބައިނަލްއަގްވާމީ ފެންވަރުގެ މެހެމާންދާރީއާއި، މަތީ ފަންތީގެ ބޯހިޔާވަހިކަމާއި، ދުނިޔޭގެ މަޝްހޫރު ބްރޭންޑްތަކުގެ ރެސިޑެންސްތައް ހިމެނޭނެ ވަރަށް ފުރިހަމަ މަޝްރޫއެކެވެ. މީގެ އިތުރުން، ފެންވަރު ރަނގަޅު މެރީނާއަކާއި، މުނިފޫހިފިލުވުމާއި، ކެއިންބުއިމާއި، ވިޔަފާރިކުރުމާއި، ދުޅަހެޔޮކަމާއި، ތައުލީމީ އަދި ސިއްހީ ހިދުމަތްތަކުގެ އިތުރުން އިޖުތިމާއީ އެކި ވަސީލަތްތައް އެއްފުރާޅެއްގެ ދަށުން ލިބޭނެ ފުރިހަމަ މަންޒިލަކަށް މިތަން ވެގެންދާނެއެވެ.
މި މަޝްރޫއުގެ މަސައްކަތް ހަވާލުކޮށްފައިވަނީ އެކުވެރި އަރަބި އިމާރާތް (ޔޫއޭއީ)ގެ އަބޫދާބީގެ މަޝްހޫރު އީގަލް ހިލްސްއާއެވެ. މިއީ ޑައުންޓައުން ދުބާއީ އާއި ބުރްޖް ޚަލީފާ ބިނާކުރުމުގެ މޭސްތިރިޔާ މުޙައްމަދު އަލް ޢައްބާރުގެ ކުންފުންޏެކެވެ. އިދިކޮޅު ފަރާތްތަކުން މި މަޝްރޫއާ ގުޅޭގޮތުން ދައްކަމުންދާ ވާހަކަތަކަށް ރައްދުދެއްވަމުން، ބަންޑާރަ ނައިބް ވަނީ ރިސޯޓްތައް ކުއްޔަށް ދޫކުރާ މުއްދަތު 99 އަހަރަށް ބަދަލުކޮށްފައިވަނީ ކުރީގެ ރައީސް އަބްދުﷲ ޔާމީން އަބްދުލް ޤައްޔޫމްގެ ވެރިކަމުގައި ކަން ހަނދާންކޮށްދެއްވާފައެވެ. އަދި ރާއްޖޭގެ ޓޫރިޒަމް ޤާނޫނަށް އެކި ވެރިކަމުގައި އައިސްފައިވާ ބަދަލުތަކުގެ މައްޗަށް އަލިއަޅުއްވާލައްވައި، ރަސްމާލޭގެ މަޝްރޫއު ކުރިއަށްދާނީ މުޅިން އާ ގާނޫނެއްގެ ދަށުން ކަމަށް ވިދާޅުވިއެވެ.
މިގޮތުން، ރަސްމާލޭގައި ހިންގުމަށް ރާވާފައިވާ މަޝްރޫއު ގަވަން ކުރާނީ މިހާރު އެކުލަވާލަމުން އަންނަ ރިއަލް އެސްޓޭޓް ޤާނޫނުގެ ދަށުންނެވެ. މިހާތަނަށް ސޮއިކޮށްފައިވަނީ ހަމައެކަނި ލެޓަ އޮފް އިންޓެންޓް (ކޮމާޝަލް ޓާމްސް އެގްރީމެންޓް) އެއްގައި ކަމަށާއި، މަޝްރޫއު ފެށުމުގެ ކުރިން ޑެފިނިޓިވް އެގްރީމެންޓްތަކުގައި ސޮއިކުރުމުގެ އިތުރުން ގާނޫނުތައް މަޖިލީހުން ފާސްކުރަންޖެހޭނެ ކަމަށް އުޝާމް ފާހަގަކުރެއްވިއެވެ.
ރައީސް ޔާމީން މިއަދު ހަނދުމަފުޅުނެތީ ކަމަށް ވެދާނެ. އެހެންނަމަވެސް ރިޒޯޓުތައް ކުއްޔަށް ދޫކުރާ މުއްދަތު 99 އަހަރަށް ބަދަލުކޮށްފައިވަނީ ރައީސް ޔާމީންގެ ވެރިކަމުގައި.
ދިވެހިރާއްޖޭގައި އެންމެ ފުރަތަމަ ޓޫރިޒަމާ ބެހޭ ޤާނޫނެއް އެކުލަވާލެވުނީ 1999 ވަނަ އަހަރު. އޭރު ޤާނޫނުގެ ދަށުން… https://t.co/8EsaBnfvul
— Ahmed Usham (@a_usham) September 29, 2026
މިއީ ރާއްޖޭގެ ތާރީހުގައިވެސް ހިންގޭ އެންމެ ބޮޑު ތަރައްގީގެ މަޝްރޫއެވެ. ރާއްޖޭގެ ޖީޑީޕީއަށްވުރެ ދެގުނައަށްވުރެ ބޮޑު މި މަޝްރޫއުގެ ސަބަބުން ކޮންސްޓްރަކްޝަން، ވިޔަފާރި، އަދި ޓެކްނޮލޮޖީގެ ދާއިރާއަށް އިންގިލާބީ ކުރިއެރުމެއް ލިބިގެންދާނެއެވެ. ޖުމްލަ 1,150 ހެކްޓަރުގެ ބިން ހިއްކުމަށް ހަމަޖެހިފައިވާ މި މަޝްރޫއުގެ ތެރެއިން މިހާރުވެސް 716 ހެކްޓަރުގެ ބިން ވަނީ ހިއްކައި ނިންމާފައެވެ. އަދި މާލޭގެ ރައްޔިތުންނަށް ހާއްސަކޮށްގެން 15,000 ގޯތި ހިމެނޭހެން ޖުމްލަ 65,000 ހައުސިން ޔުނިޓު މި ސަރަހައްދުގައި ގާއިމުކުރުމަށް ވަނީ ނިންމާފައެވެ.
މި މަޝްރޫއުގެ ސަބަބުން ރާއްޖޭގެ އިގްތިސާދަށް އަންނާނެ ކަމަށް ލަފާކުރެވޭ ބޮޑެތި ބަދަލުތަކުގެ ސަބަބުން، ދިވެހިރާއްޖޭގެ މުސްތަގުބަލަށް ކުރެވޭ އުއްމީދުތައް އިތުރުވެގެންދާނެ ކަމަށް ބެލެވެއެވެ.
