ގދ. ތިނަދޫ އިންޑަސްޓްރިއަލް ޒޯންގެ ބިން ހިއްކުމާއި ގޮނޑުދޮށް ހިމާޔަތް ކުރުމުގެ މަޝްރޫޢުގެ މަސައްކަތްތައް ނިމުމަކާ ގާތްވެފައިވާކަން އެމްޓީސީސީން ހާމަކޮށްފިއެވެ.
އެ ކުންފުނިން ވިދާޅުވިގޮތުގައި، މި މުހިންމު މަޝްރޫޢުގެ މިހާތަނަށް 90 އިންސައްތަ މަސައްކަތް ވަނީ އެއްކޮށް ނިމިފައެވެ. އަދި މިވަގުތު އެ މަޝްރޫޢުގެ ދަށުން އެންމެ ފަހުގެ މަރުހަލާގެ މަސައްކަތްތައް ކުރިއަށްދާއިރު، އޭގެ ތެރޭގައި ބަނދަރުގެ ލައިޓް ހަރުކުރުމުގެ މަސައްކަތްތައް ހިމެނެއެވެ.
ގާތްގަނޑަކަށް 125 މިލިއަން ރުފިޔާގެ މި މަޝްރޫޢަކީ ތިނަދޫގެ އިޤްތިސާދީ ތަރައްޤީއަށާއި ވިޔަފާރީގެ ބޭނުންތަކަށް ބިން އިތުރުކޮށްދިނުމުގެ ގޮތުން 2023 ވަނަ އަހަރުގެ ޖެނުއަރީ މަހު އަމަލީ މަސައްކަތް ފަށައިގެން ކުރިއަށްގެންދާ ބޮޑު މަޝްރޫޢެކެވެ. މި މަޝްރޫޢުގެ ދަށުން 10.6 ހެކްޓަރުގެ ބޮޑު ސަރަހައްދެއް ހިއްކާފައިވާއިރު، މީގެ ސަބަބުން ރަށުގެ ސިނާއީ މަސައްކަތްތަކަށް ދިމާވެފައިވާ ބިމުގެ ދަތިކަމަށް ދމެހެއްޓެނިވި ހައްލެއް ލިބިގެންދާނެއެވެ.
މީގެ އިތުރުން، އެ ސަރަހައްދުގެ ގޮނޑުދޮށް ރައްކާތެރިކުރުމަށްޓަކައި 1,521 މީޓަރުގެ ދިގު ރިވެޓްމެންޓެއް ޖެހުމާއި، 555 މީޓަރުގެ ކުއޭ ވޯލް ހަރުކުރުމާއި، ބްރިޖް ރިޓެއިނިންގ ފާރު ހެދުމުގެ އިތުރުން ޒަމާނީ ފެންވަރުގެ ޕޭވްމަންޓެއް ހެދުމުގެ މަސައްކަތްތައް ވެސް މި މަޝްރޫޢުގެ ތެރޭގައި ހިމެނެއެވެ.
މި މަޝްރޫޢު މުޅިން ނިމިގެންދާއިރު، ތިނަދޫ ބަނދަރުގެ މިހާރު އޮތް ޖާގަ ދެގުނައަށް ބޮޑުވެ، މުދާ އުފުލާ ބޮޑެތި ބޯޓުފަހަރަށްވެސް ވަރަށް ފަސޭހައިން ބަނދަރާ ކައިރިކޮށް، މުދާ ބާލައި އެރުވުމުގެ އިންތިޒާމުތައް ފަހިވެގެންދާނެއެވެ. މިއީ ރާއްޖޭގެ އަތޮޅުތެރޭގައި އިޤްތިސާދީ ހަރަކާތްތައް ފުޅާކޮށް، ރައްޔިތުންނަށް ބޭނުންވާ އަސާސީ ވަސީލަތްތައް ޤާއިމުކޮށްދިނުމަށް އެމްޓީސީސީން ކުރަމުންދާ މަސައްކަތްތަކުގެ ތެރެއިން ފާހަގަކޮށްލެވޭ ފަދަ ކާމިޔާބު މަޝްރޫޢެކެވެ.
