ގއ. މާމެންދޫގައި އައުޓްޑޯ ވޮލީކޯޓެއް ތަރައްގީކުރުމުގެ މަޝްރޫޢުގެ މަސައްކަތްތައް ހަލުވިކަމާއެކު ކުރިއަށްދާ ކަމަށް އެމްޓީސީސީން ހާމަކޮށްފިއެވެ.
އެ ކުންފުނިން ވިދާޅުވިގޮތުގައި، މި މަޝްރޫޢުގެ ދަށުން މިވަގުތު އެންމެ ބާރަށް ކުރިއަށްދަނީ ކޯޓަށް ބޭނުންވާ ލައިޓް ޕޯސްޓް ފުޓިން ކޮންކްރީޓް ކުރުމުގެ މަސައްކަތާއި، ކޯޓަށް ވަންނަ ދޮރުގެ ވެލްޑިންގެ މަސައްކަތްތަކެވެ. މި މަޝްރޫޢަކީ މާމެންދޫގެ ޒުވާނުންނަށާއި ކުޅިވަރަށް ލޯބިކުރާ ފަރާތްތަކަށް ވަރަށް ބޭނުންތެރި، ފެންވަރު ރަނގަޅު ކުޅިވަރު މާހައުލެއް ގާއިމުކޮށްދިނުމަށް ހިންގޭ މުހިންމު މަޝްރޫޢެކެވެ.
ރާއްޖޭގެ އަތޮޅުތެރޭގެ އެކި ރަށްރަށުގައި ކުޅިވަރުގެ ވަސީލަތްތައް ތަރައްގީކޮށް، ވޮލީ ކޯޓުތައް ގާއިމުކުރުމަށް ސަރުކާރުން ކުރަމުންދާ މަސައްކަތްތަކުގެ ދަށުން، މިވަގުތުވެސް ރާއްޖޭގެ 10 ރަށެއްގައި ޒަމާނީ ފެންވަރުގެ ވޮލީ ކޯޓު ހެދުމުގެ މަސައްކަތް އަންނަނީ ބާރު ދުވެއްޔެއްގައި ކުރިއަށްދަމުންނެވެ.
މިފަދަ މަޝްރޫޢުތަކުގެ ސަބަބުން ރަށްރަށުގެ ޒުވާނުންނަށް ކުޅިވަރުގެ ރޮނގުން ކުރިއަށްދިއުމަށް އިތުރު ފުރުސަތުތައް ފަހިވެގެންދާނެއެވެ.
ރައްޔިތުންގެ ސިއްހީ ދުޅަހެޔޮކަމާއި ދިރިއުޅުމުގެ ފެންވަރު މަތިކުރުމަށް ސަރުކާރުން ވަރަށް ބޮޑު އިސްކަމެއް ދެއްވަމުން ގެންދަވާކަން ފާހަގަކޮށްލެވެއެވެ. އެގޮތުން، ރަށްރަށުގައި ފުޓްބޯޅަ ދަނޑުތަކާއި ބަސްކެޓްބޯޅަ ކޯޓު ފަދަ އެކި ކުޅިވަރު ކުޅޭނެ ތަންތަން ގާއިމުކުރުމުގެ އިތުރުން، އާންމުންނަށް ފަސޭހައިން ކަސްރަތުކޮށްލެވޭނެ އައުޓްޑޯ ޖިމްތައް ވެސް ރާއްޖޭގެ އެކި ކަންކޮޅުތަކުގައި ދަނީ ތަރައްގީކުރަމުންނެވެ.
