ސައޫދީ އަރަބިއްޔާގެ މިނިސްޓްރީ އޮފް ހައްޖު އެންޑް އުމްރާގެ ފަރާތުން ބޭރުގެ ހައްޖުވެރިންނަށް ހާއްސަކޮށްގެން، ހުރިހާ ހިދުމަތެއް އެއް ފުރާޅެއްގެ ދަށުން ލިބޭނެ "އޯލް-އިން-ވަން"ޕެކޭޖެއް ތައާރަފްކޮށްފިއެވެ.
ސައޫދީގެ ރަސްމީ ނޫސް އެޖެންސީން ރިޕޯޓްކޮށްފައިވާ ގޮތުގައި، މި ޕެކޭޖަކީ އަންނަ އަހަރުގެ ހައްޖު މޫސުމަށް ދުރާލައި ތައްޔާރުވުމުގެ ގޮތުންނާއި، ހައްޖުވެރިންނަށް ދެވޭ ހިދުމަތްތައް ހަރުދަނާކުރުމަށް ފަރުމާކޮށްފައިވާ މުހިންމު ނިޒާމެކެވެ.
މި ޕެކޭޖުގެ މައިގަނޑު މަގުސަދަކީ ދަތުރުފެށުމާ ހިސާބުން ފެށިގެން އެނބުރި ގައުމަށް ދިއުމާ ހަމައަށް ހައްޖުވެރިންނަށް ބޭނުންވާ އެންމެހާ އަސާސީ ހިދުމަތްތައް ލުއިފަސޭހަކަމާއެކު އެއް ކޮންޓްރެކްޓެއްގެ ދަށުން ފޯރުކޮށްދިނުމެވެ. އެގޮތުން އިލެކްޓްރޯނިކް ޕްލެޓްފޯމް މެދުވެރިކޮށް ލިބޭ މި ޕެކޭޖުގައި މައިގަނޑު ހަތަރު ހިދުމަތެއް ވަނީ ހިމަނާފައެވެ. އެއީ މުގައްދަސް ބިންތަކުގައި (މިނާ، އަރަފާތު، އަދި މުޒްދަލިފާ) ދެވޭ ހިދުމަތްތަކާއި، މައްކާ އާއި މަދީނާގައި ހުރުމުގެ އިންތިޒާމުތަކާއި، ދަތުރުފަތުރުގެ އިތުރުން ކެއިންބުއިމުގެ ހިދުމަތެވެ. މީގެ އިތުރުން ހައްޖުވެރިންގެ ބޭނުންތަކަށް ބަލައިގެން އިހުތިޔާރީ އެހެނިހެން އިތުރު ހިދުމަތްތައް ވެސް މި ޕެކޭޖުގެ ތެރެއިން ހަމަޖެއްސޭނެ އިންތިޒާމު ވަނީ ހަމަޖައްސާފައެވެ.
ސައޫދީ ސަރުކާރުގެ "ވިޝަން 2030" ގެ ލަނޑުދަނޑިތަކާ އެއްގޮތަށް ތައާރަފުކުރި މި ނިޒާމުގެ ސަބަބުން، ދުނިޔޭގެ އެކި ގައުމުތަކުން ހައްޖު އަންނަ މިޝަންތަކަށާއި އެޖެންސީތަކަށް ވަރަށް ބޮޑު ލުޔެއް ލިބިގެންދާނެއެވެ. އެގޮތުން ޖަމާއަތްތަކުގެ ކެޕޭސިޓީއާއި މާލީ ތަނަވަސްކަމަށް ރިއާޔަތްކޮށް، އެކި ގުރޫޕުތަކަށް އެކަށޭނެ ގޮތަށް ޕްރޮގްރާމްތައް ފަރުމާކުރުމުގެ ފުރިހަމަ ފުރުސަތު މި އުސޫލުގެ ދަށުން ލިބިގެންދާނެ ކަމަށް ހައްޖު މިނިސްޓްރީން ފާހަގަކޮށްފައިވެއެވެ.
ކޮންމެ އަހަރަކު ވެސް ހައްޖުގެ އަޅުކަން ކުރިއަށްދަނީ އިސްލާމީ ކަލަންޑަރުގެ ޛުލްޙިއްޖާ މަހުގެ 8 ވަނަ ދުވަހުން ފެށިގެން 13 ވަނަ ދުވަހުގެ ނިޔަލަށެވެ. އިސްލާމީ ކަލަންޑަރަކީ ހަނދަށް ބަލައިގެން ކަނޑައަޅާ ކަލަންޑަރަކަށް ވުމާއެކު، މީލާދީ ތާރީހުތަކަށް ކޮންމެ އަހަރަކުވެސް ކޮންމެވެސް ވަރެއްގެ ބަދަލުތަކެއް އަންނަ ކަމަށް ވެސް މިނިސްޓްރީން ހަނދާންކޮށްދީފައިވެއެވެ.
