ދުނިޔޭގެ ފަތުރުވެރިކަމުގެ ދާއިރާގައި ދެވޭ އެންމެ ޝަރަފުވެރި އެއް އެވޯޑު ކަމަށްވާ ވޯލްޑް ޓްރެވަލް އެވޯޑްސްގެ އިންޑިއަން އޯޝަން ސެގްމެންޓުގެ "އިންޑިއަން އޯޝަންސް ލީޑިންގ އެއަރޕޯޓް 2026" ގެ އެވޯޑް ވެލާނާ އިންޓަނޭޝަނަލް އެއާރޕޯޓް (ވީއައިއޭ) އިން ކާމިޔާބުކޮށްފިއެވެ.
މިއީ އިންޑިއަން އޯޝަން ސަރަހައްދުގެ އެންމެ ކުރިއަރާފައިވާ އެއާޕޯޓުގެ ޝަރަފު ވީއައިއޭ އިން ކާމިޔާބުކުރި 13 ވަނަ ފަހަރެވެ.
ކްރޮސްރޯޑްސް މޯލްޑިވްސްގައި ބޭއްވި ވާރލްޑް ޓްރެވަލް އެވޯޑްސް އޭޝިއާ، އޯޝޭނިއާ އެންޑް އިންޑިއަން އޯޝަން ގާލާ ސެރެމަނީގައި ވީއައިއޭގެ ފަރާތުން މި އެވޯޑާ ހަވާލުވެވަޑައިގަތީ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ސީއީއޯ އަދި މެނޭޖިންގ ޑިރެކްޓަރ އިބްރާހީމް ޝަރީފް މުޙައްމަދެވެ.
މިއަހަރުގެ މި ކެޓަގަރީގައި ވީއައިއޭއާ ވާދަކޮށްފައިވަނީ ސަރަހައްދީ ބޮޑެތި އެއާޕޯޓްތައް ކަމަށްވާ މަޑަގަސްކަރައިގެ އިވާޓޯ އިންޓަރނޭޝަނަލް އެއާރޕޯޓާއި، ރީޔޫނިއަންގެ ރޯލަންޑް ގަރޯސް އެއާރޕޯޓުގެ އިތުރުން، ސީޝެލްސް އިންޓަރނޭޝަނަލް އެއާރޕޯޓާއި މޮރިޝަސްގެ ސަރ ސީވޫސަގުރ ރާމްގޫލަމް އިންޓަރނޭޝަނަލް އެއާރޕޯޓެވެ.
އެމްއޭސީއެލް އިން ހިންގަމުން އަންނަ ވީއައިއޭ އަށް މި އެވޯޑު ލިބުމަކީ، އެއާރޕޯޓުގެ އޮޕަރޭޝަންތަކާއި ދަތުރުވެރިންނަށް ފޯރުކޮށްދޭ ހިދުމަތްތައް ދެމެހެއްޓެނިވި ގޮތެއްގައި ކުރިއަރަމުން އަންނަކަމުގެ އަލިގަދަ ހެއްކެކެވެ. މިއީ ރާއްޖެއަށް ޒިޔާރަތްކުރާ ފަތުރުވެރިންނަށާއި އެންމެހައި ދަތުރުވެރިންނަށް އެންމެ މަތީ ފެންވަރުގެ ހިދުމަތެއް ފޯރުކޮށްދިނުމަށް ކުރަމުންދާ އިޚްލާޞްތެރި މަސައްކަތްތަކަށާއި، ގައުމީ ފަތުރުވެރިކަމުގެ ސިނާއަތަށް ލިބުނު ވަރަށް ބޮޑު ފަޚުރެކެވެ.
މި ކާމިޔާބީ ފާހަގަކުރައްވަމުން އެމްއޭސީއެލްގެ މެނޭޖިންގ ޑިރެކްޓަރ އިބްރާހީމް ޝަރީފް މުޙައްމަދު ވިދާޅުވީ، މިއީ މުވައްޒަފުން ކުރި ބުރަ މަސައްކަތާއި، ވީއައިއޭގެ ތަރައްޤީއަށް ގެންނަމުންދާ ހެޔޮ ބަދަލުތަކުގެ އިތުރުން ޕާޓްނަރުންގެ ފަރާތުން ލިބޭ އަގުހުރި އެއްބާރުލުމުގެ ނަތީޖާ ކަމަށެވެ.
އަދި ރާއްޖޭގެ މައި ދޮރާށީގެ ހައިސިއްޔަތުން، ޚިދުމަތުގެ ފެންވަރު މަތިކޮށް، ދަތުރުވެރިންގެ ތަޖުރިބާ އިތުރަށް ފުރިހަމަކުރުމާއެކު، ވީއައިއޭ އަކީ ބައިނަލްއަގުވާމީ ފެންވަރުގައި ވާދަކުރެވޭނެ ފަދަ ޒަމާނީ އެއާރޕޯޓަކަށް ހެދުމަށް އަބަދުވެސް އިސްކަންދެއްވާނެ ކަމަށް ޝަރީފް ފާހަގަކުރެއްވިއެވެ.
ވީއައިއޭގެ އުމްރާނީ ތަރައްގީއާއި ހިދުމަތްތައް ފުޅާކުރުމުގެ މަސައްކަތްތައް މެދުކެނޑުމެއްނެތި ކުރިއަށްދާއިރު، ޓާމިނަލްގެ އެކި ސަރަހައްދުތަކަށް ޒަމާނީ އައު ވަސީލަތްތައް އިތުރުކުރެވި، އެއާޕޯޓުން ހިދުމަތް ހޯދާ ކޮންމެ ދަތުރުވެރިއަކަށްވެސް ލުއިފަސޭހަ އަދި ހިތްފަސޭހަ މާހައުލެއް ކަށަވަރުވެގެންދާނެ ކަމަށް އެމްއޭސީއެލް އިން ބުނެފައިވެއެވެ.
