ހދ. ހަނިމާދޫގައި އެމްޓީސީސީން އިމާރާތް ކުރަމުންދާ އާ މިސްކިތުގެ މަސައްކަތް ހަލުވިކަމާއެކު ކުރިއަށްދާ ކަމަށް އެ ކުންފުނިން ހާމަކޮށްފިއެވެ.
މަޝްރޫއުގެ އެންމެ ފަހުގެ އަދާހަމަ ހިއްސާކުރަމުން އެމްޓީސީސީން ބުނީ، މިހާރު ކުރިއަށްދަނީ އިމާރާތުގެ އެންމެ ތިރީ ފަންގިފިލާ ނުވަތަ ގްރައުންޑް ފްލޯ ރާނައި، ސިމެންތި ޖަހައި އޮމާންކުރުމުގެ މުހިންމު މަސައްކަތްތައް ކަމަށެވެ.
ޖުމްލަ 7,933 އަކަމީޓަރުގެ ބޮޑު ސަރަހައްދެއްގައި ބިނާކުރާ މި މިސްކިތަކީ އެއްފަހަރާ 500 މީހުންނަށް ނަމާދު ކުރެވޭނެ ފުރިހަމަ ޖާގައާއެކު ތަރައްގީކުރާ ތަނެކެވެ.
މިދިޔަ އަހަރުގެ އޭޕްރީލް މަހުގެ ތެރޭގައި އެމްޓީސީސީއާ ހަވާލުކޮށްގެން ކުރިއަށްގެންދާ މި މަޝްރޫއަކީ 9.44 މިލިއަން ރުފިޔާ ހަރަދުކޮށްގެން 360 ދުވަހުގެ ތެރޭގައި ނިންމުމަށް އަމާޒުހިފާފައިވާ މަސައްކަތެކެވެ. 2,600 އަށްވުރެ ބޮޑު އާބާދީއެއް ދިރިއުޅޭ ހަނިމާދޫގައި މި މިސްކިތް ނިމި ބޭނުންކުރަން ފެށުމުން، އެ ރަށުގެ ރައްޔިތުންނަށް ދިމާވެފައިވާ ނަމާދުކުރާނެ ޖާގައިގެ ދަތިކަމަށް ބޮޑު ހައްލެއް ލިބި، ދީނީ ތަފާތު ހަރަކާތްތަކާއި އަޅުކަންތައް ފަސޭހަކަމާއެކު އަދާކުރުމުގެ މަގު ތަނަވަސްވެގެންދާނެއެވެ.
