ވިލިމާލޭގެ ފަޅުތެރެ ތަރުތީބުކޮށް، ސާފުތާހިރުކަމާއެކު ބެލެހެއްޓުމަށް މާލެ ސިޓީ ކައުންސިލުން ކުރިއަށްގެންދާ ހާއްސަ މަސައްކަތްތަކުގެ ތެރެއިން، އުސޫލުތަކާ ހިލާފަށް ފަޅު ބޭނުންކުރަމުންދިޔަ 12 އުޅަނދެއް ޖޫރިމަނާކޮށްފިއެވެ.
ސިޓީ ކައުންސިލުން މައުލޫމާތު ދެއްވާގޮތުގައި، މި ފިޔަވަޅު އަޅާފައިވަނީ ގަވާއިދުން ހުއްދަ ނަގައިގެން ފަޅު ބޭނުންކުރާ އުޅަނދުފަހަރަށް ދަތިވާގޮތަށް، އުސޫލުތަކާ ހިލާފަށް ގިނަ ދުވަސްތަކެއް ވަންދެން ފަޅުތެރޭގައި އަޅާފައި ހުރި އުޅަނދުތަކަކަށެވެ.
މީގެ ތެރޭގައި ބޭނުންނުކޮށް ގިނަ ދުވަސްވެފައިވާ އުޅަނދުތަކާއި، ފަޅު ކުލި ނުދައްކައި ގަވާއިދާ ހިލާފަށް އަޅާފައިވާ އުޅަނދުތައް ހިމެނެއެވެ.
މާލެ ސިޓީ ކައުންސިލްގެ ބެލުމުގެ ދަށުން ބަލަހައްޓަމުން އަންނަ ވިލިމާލޭގެ ފަޅުތެރޭގެ އިންތިޒާމުތައް ހަމަޖައްސައި، އުޅަނދުފަހަރު އެހެލުމާއި އަޅާފައި ބެހެއްޓުމުގައި ދިމާވާ ތޮއްޖެހުމުގެ މައްސަލައަށް ހައްލެއް ހޯދައިދިނުމަކީ ކައުންސިލުން އިސްކަންދޭ ކަމެކެވެ.
ފަޅުތެރޭގެ ތަރުތީބު ގެއްލޭގޮތަށް ހުންނަ އުޅަނދުތަކާމެދު ފިޔަވަޅު އަޅަން ފަށާފައިވަނީ، އާންމުކޮށް ފަޅު ބޭނުންކުރާ އޮޑިވެރިންނާއި އުޅަނދުފަހަރުގެ އޮޕަރޭޓަރުންނަށް ކުރިމަތިވާ ދަތިތަކަށް ދާއިމީ ހައްލެއް ހޯދައިދީ، ފަޅުގެ ސަލާމަތީ ކަންކަން ވަރުގަދަކުރުމުގެ މަގުސަދުގައެވެ.
މީގެއިތުރުން، އުޅަނދުތައް ގަވާއިދާ ހިލާފަށް ބެހެއްޓުމުގެ ސަބަބުން ކަނޑުދަތުރުފަތުރަށް ނުރައްކާވުމުގެ ފުރުސަތު ބޮޑުވާތީ، އެކަންކަން ހުއްޓުވުމަށް ސިޓީ ކައުންސިލުން އަންނަނީ ހާއްސަ މޮނިޓަރިން މަސައްކަތްތަކެއް ކުރަމުންނެވެ.
ކައުންސިލުން ވަނީ ފަޅު ބޭނުންކުރުމުގައި ކަނޑައެޅިފައިވާ ގަވާއިދުތަކާއި އުސޫލުތަކަށް ހުރިހާ ފަރާތްތަކުންވެސް ފުރިހަމައަށް އިހުތިރާމްކުރުމަށް އިލްތިމާސްކޮށްފައެވެ. އަދި ހުއްދައާ ނުލައި ފަޅު ބޭނުންކުރުމާއި، ގަވާއިދާ ހިލާފަށް އަޅާފައި ހުންނަ އުޅަނދުތައް ނެގުމަށް އެންގުމުންވެސް ނުނަގާ ހުންނަ އުޅަނދުތަކާމެދު ކުރިއަށް އޮތް ތަނުގައިވެސް ގަވާއިދުގެ މަތިން ވަކިވަކިން ފިޔަވަޅު އަޅައި، ޖޫރިމަނާކުރަމުންދާނެ ކަމުގެ އިންޒާރު ސިޓީ ކައުންސިލުން ވަނީ ދީފައެވެ.
