މެލޭޝިއާގެ ކުރީގެ ބޮޑުވަޒީރު ޑރ. މަހާތީރު މުހައްމަދުގެ އަނބިކަނބަލުން، ޑރ. ސިތީ ހަސްމާ މުހައްމަދު އަލީ އަވަހާރަވުމުގެ ހިތާމައިގައި، ރައީސުލްޖުމްހޫރިއްޔާ ޑރ. މުހައްމަދު މުއިއްޒު މެލޭޝިއާގެ ސަރުކާރަށާއި، އެ ގައުމުގެ ރައްޔިތުންނަށް އަދި މަރުހޫމާގެ އާއިލާއަށް އިޚްލާސްތެރި ތައުޒިޔާގެ މެސެޖެއް ފޮނުއްވައިފިއެވެ.
ދިވެހި ސަރުކާރާއި ރައްޔިތުންގެ ނަމުގައި ފޮނުއްވި މި މެސެޖުގައި ރައީސް މުއިއްޒު ވަނީ، މަރުހޫމާ ޑރ. ސިތީ ހަސްމާއަކީ މެލޭޝިއާގެ ތާރީޚުގައި އެ ގައުމުގެ އިޖުތިމާއީ އަދި ސިއްހީ ދާއިރާއަށް އަގުނުކުރެވޭފަދަ ބޮޑެތި ޚިދުމަތްތަކެއް ކޮށްދެއްވި ގަދަރުވެރި ބޭފުޅެއްކަން ފާހަގަކުރައްވާފައެވެ.
ރައީސުލްޖުމްހޫރިއްޔާގެ މެސެޖުގައި އަލިއަޅުއްވާލައްވާފައިވާ ގޮތުގައި، ޑރ. ސިތީ ހަސްމާއަކީ މެލޭޝިއާގައި އުފެދުނު އެންމެ ފުރަތަމަ އަންހެން މެޑިކަލް ޑޮކްޓަރުންގެ ތެރޭގައި ހިމެނިވަޑައިގަންނަވާ، ތާރީޚީ ގޮތުން ބޮޑު އިސްނެންގެވުމެއް ނެންގެވި ބޭފުޅެކެވެ. މެލޭޝިއާގެ ރަށްފުށު ސަރަހައްދުތަކުގައި ދިރިއުޅޭ އަންހެނުންގެ ސިއްހީ ހާލަތު ރަނގަޅުކުރުމަށާއި، މައިންނާއި ކުޑަކުދިންގެ ސިއްހަތު ރައްކާތެރިކުރުމުގެ ދާއިރާއިން އެކަމަނާ ކޮށްދެއްވި ބުރަ މަސައްކަތްޕުޅުތަކަށް ރައީސް ވަނީ ޚާއްސަ ތައުރީފެއް ކުރައްވާފައެވެ.
އެކަމަނާގެ މުޅި ހަޔާތްޕުޅު ހޭދަކުރެއްވީ މުޖުތަމައުގެ ނިކަމެތިންނާއި އަންހެނުންގެ ހައްގުތައް ކަށަވަރުކޮށްދީ، މިންތީގެ ހަމަހަމަކަން ގާއިމުކުރުމުގެ މުހިންމު ގައުމީ މަސައްކަތްޕުޅުގައެވެ.
މީގެ އިތުރުން، އާއިލާތަކުގެ ފުދުންތެރިކަން އިތުރުކުރުމަށާއި، އަންހެނުން އިގްތިސާދީ ގޮތުންނާއި އިޖުތިމާއީ ގޮތުން ބާރުވެރިކުރުމަށް އެކަމަނާގެ އިސްނެންގެވުމުގެ ދަށުން ހިންގުނު ކާމިޔާބު މަޝްރޫއުތަކުގެ މައްޗަށްވެސް ރައީސްގެ މެސެޖުގައި އަލިއަޅުއްވާލެއްވިއެވެ.
ރައީސް މުއިއްޒު ވިދާޅުވީ، އެކަމަނާ ދޫކުރައްވާފައިވާ އިޖުތިމާއީ ޚިދުމަތްތަކުގެ މާތް އަސަރުތަކަކީ އަންނަން އޮތް ޖީލުތަކަށް ލިބިގެންދިޔަ ބޮޑު ނަމޫނާއެއް ކަމަށާއި، މި ހިތާމަވެރި ދަނޑިވަޅުގައި އެކަމަނާގެ ޒިކުރާ އާކުރެވިގެންދާނީ ނުހަނު ޝުކުރުވެރިކަމާއި އިހުތިރާމާއެކު ކަމަށެވެ.
މެލޭޝިއާގެ ތަރައްގީގައި ކުރީގެ ބޮޑުވަޒީރު ޑރ. މަހާތީރު މުހައްމަދުގެ އަރިހުގައި، ފަސްޓް ލޭޑީގެ ހައިސިއްޔަތުން އެކަމަނާ އަދާކުރެއްވި ހިކުމަތްތެރި ދައުރަކީ މުޅި އިސްލާމީ އުންމަތަށްވެސް ލިބުނު ފަޚުރެކެވެ.
ރައީސުލްޖުމްހޫރިއްޔާގެ މެސެޖު ނިންމަވާލައްވަމުން، މި ބޮޑު ހިތާމަވެރި ދަނޑިވަޅުގައި މަރުހޫމާގެ ހަޔާތްޕުޅާއި، ޚިދުމަތްތަކާއި، އަދި އެކަމަނާ ހިފެހެއްޓެވި ރީތި އުސޫލުތަކުގެ ހަނދާންތަކުން ކުރީގެ ބޮޑުވަޒީރު ޑރ. މަހާތީރު މުހައްމަދަށާއި، އެމަނިކުފާނުގެ އާއިލާއަށް އަދި މެލޭޝިއާގެ އެންމެހާ ރައްޔިތުންނަށް ކެތްތެރިކަމާއި ތަސައްލީ ލިބުމަށް އެދިވަޑައިގެންނެވިއެވެ. އަދި މަރުހޫމާ ޑރ. ސިތީ ހަސްމާ މުހައްމަދު އަލީގެ ފުރާނަފުޅަށް މާތްﷲ ރަހުމަތްލައްވައި، ސައްޔިދުންގެ މަތިވެރި ނިއުމަތް ދެއްވައި، ޖަންނަތުލް ފިރުދައުސްގެ މަތިވެރި ނިއުމަތް މިންވަރު ކުރެއްވުން އެދި އެކަލާނގެ ހަޟްރަތުގައި ދުއާ ދަންނަވާފައިވެއެވެ.
