ރާއްޖޭގައި ނުރައްކާތެރި ކެމިކަލް ވިއްކުމާއި ގުދަންކުރުމުގެ ހުއްދައަށް އެދުމަށާއި، "މަކުޑި" ޕޯޓަލް މެދުވެރިކޮށް އެފަދަ ތަންތަން ރަޖިސްޓްރީ ކުރުމަށް ދީފައިވާ މުއްދަތު، ދިފާއީ ވުޒާރާއިން އިތުރުކޮށްދީފިއެވެ.
އެ ވުޒާރާއިން ނެރުނު އިއުލާނެއްގައިވާ ގޮތުން، ކެމިކަލް ގުދަންކުރާ އަދި ވިއްކާ ފަރާތްތަކަށް ރަޖިސްޓްރީވުމަށް ކުރިން ދިން ފުރުސަތު ހަމަވިއިރު، ވަރަށް މަދު ފަރާތަކުން އެކަމަށް އެދި ހުށަހަޅާފައިވާތީ، މިއަދުން ފެށިގެން އިތުރު އެއް މަސްދުވަހުގެ މުއްދަތެއް ވަނީ ދީފައެވެ.
އަލަށް ދިން މި އިތުރު މުއްދަތުގެ ތެރޭގައި ވެސް ޤަވާއިދުން ރަޖިސްޓްރީ ނުކޮށް ކެމިކަލްގެ ވިޔަފާރި ހިންގާ ފަރާތްތަކާ މެދު "ނުރައްކާތެރި ކެމިކަލާބެހޭ ޤަވާއިދު" ގެ ދަށުން ވަރަށް ހަރުކަށި ފިޔަވަޅުތަކެއް އަޅާނެ ކަމުގެ އިންޒާރު ދިފާއީ ވުޒާރާއިން ވަނީ ދީފައެވެ. އަދި މި ކަނޑައެޅުނު މުއްދަތުގެ ތެރޭގައި ރަޖިސްޓްރީ ނުކުރާ ފަރާތްތަކަށް ކުރިއަށް އޮތް ތަނުގައި ރާއްޖެއަށް ކެމިކަލް އެތެރެކުރުމުގެ ހުއްދަ އެއްގޮތަކަށްވެސް ނުދެވޭނެ ކަމަށް އެ ވުޒާރާއިން ވަނީ ބުނެފައެވެ.
ދިފާއީ ވުޒާރާގެ ތަފާސްހިސާބުތަކަށް ބަލާއިރު، ގްރޭޓާ މާލެ ސަރަހައްދުގައި އެކަނިވެސް ކެމިކަލް ގުދަންކުރާ 144 ތަނެއްގެ އިތުރުން، ކެމިކަލް ވިއްކާ 62 ފިހާރައެއް ދަނީ ހިންގަމުންނެވެ. މާލޭގައި މީގެކުރިން ހިނގާފައިވާ ނުރައްކާތެރި އަލިފާނުގެ ބޮޑެތި ހާދިސާތަކަކީ ކެމިކަލް ގުދަންތަކުގައި ރޯވުމުގެ ސަބަބުން ހިނގާފައިވާ ކަންކަންކަން ފާހަގަކޮށް، 2019 ވަނަ އަހަރު މާލޭ ހެންވޭރުގައި ހުރި ކެމިކަލް ގުދަނެއްގައި ހިނގި ނުރައްކާތެރި ހާދިސާގައި ފުރާނައަށް ގެއްލުންވެ، ބޮޑެތި މާލީ ގެއްލުންތަކެއް ވުމާ ގުޅިގެން ސަރުކާރުން ވަނީ މާލޭގައި ހުރި ކެމިކަލް ގުދަންތައް ކ. ތިލަފުއްޓަށް ބަދަލުކުރުމުގެ މަޝްރޫއުތައްވެސް ފަށާފައެވެ.
ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމުގެ ގޮތުން، ކެމިކަލް ގެންގުޅޭ އަދި ގުދަންކުރާ ތަންތަން ހުންނަނީ ޤަވާއިދާ އެއްގޮތަށްތޯ ބެލުމަށް އެމްއެންޑީއެފް ފަޔާ އެންޑް ރެސްކިއު ސަރވިސްއިން "އޮޕަރޭޝަން ހިރާސް ފާސް" ގެ ނަމުގައި ހާއްސަ އިންސްޕެކްޝަންތަކެއްވެސް މީގެކުރިން ވަނީ ހިންގާފައެވެ. ސަރުކާރުގެ މައިގަނޑު އަމާޒަކީ މިފަދަ ހަރުދަނާ ފިޔަވަޅުތަކާއި ޤަވާއިދުތަކުގެ ތެރެއިން މާލެއާއި އަތޮޅުތަކުގެ ރައްޔިތުންނަށް ނުރައްކާތެރި ހާދިސާތަކުން ރައްކާތެރިވެވޭނެ މާހައުލެއް ޤާއިމުކޮށްދިނުމެވެ.
