މަގުމަތީގެ އަމާންކަން ބެލެހެއްޓުމަށާއި އާންމު ރައްޔިތުންނަށް ނުރައްކާވާ ގޮތަށް ބާރު ސްޕީޑުގައި އަދި ގަވާއިދާ ހިލާފަށް ދުއްވަމުންދިޔަ އުޅަނދުތަކާ ދެކޮޅަށް ފުލުހުން ހިންގާ ހަރަކާތްތަކުގެ ތެރެއިން، ފާއިތުވި ދެ އަހަރާއި ދިހަ މަސް ދުވަހުގެ ތެރޭގައި 1،906 ސައިކަލު ޓޯކޮށްފައިވާ ކަމަށް ދާހިލީ ސަލާމަތާއި މަސައްކަތްތެރިކަމާއި ފަންނިއްޔާތާ ބެހޭ ވަޒީރު އަލީ އިހުސާނު ވިދާޅުވެއްޖެއެވެ.
ރޭ ކުރިއަށްދިޔަ "އަހާ" ފޯރަމުގައި މަގުތަކުގެ އަމާންކަން ކަށަވަރުކުރުމާއި އެކްސެޑެންޓުތައް މަދުކުރުމަށް ސަރުކާރުން އަޅަމުންދާ ފިޔަވަޅުތަކާ ގުޅޭގޮތުން އާންމުންގެ ފަރާތުން ކުރި ސުވާލަކަށް ޖަވާބުދެއްވަމުން ވަޒީރު ފާހަގަކުރެއްވި ގޮތުގައި، މާލޭގެ އިތުރުން ރާއްޖޭގެ އެކި ކަންކޮޅުތަކުގައި އާދަޔާ ހިލާފު ބާރު ދުވެލީގައި ވެހިކަލް ދުއްވުމުގެ މައްސަލައަކީ ބޮޑު ކަންބޮޑުވުމެކެވެ. މިފަދަ ނުރައްކާތެރިކަން ކުޑަކުރުމަށްޓަކައި ހުރިހާ ސިޓީއެއްގައި ޓްރެފިކް ފުލުހުންގެ ހިދުމަތް ފުޅާކޮށް ޤާއިމުކުރުމަކީ މިހާރު ސަރުކާރުން އެންމެ އިސްކަމެއްދީގެން ކުރަމުންދާ މަސައްކަތްޕުޅެއް ކަމަށް އެމަނިކުފާނު ވިދާޅުވިއެވެ.
ލައިސެންސް ދޫކުރުމުގެ ނިޒާމާއި މަގުމަތީގެ އަސާސީ އުސޫލުތަކަށް އަލިއަޅުއްވާލައްވަމުން ވަޒީރު ވިދާޅުވީ، ބައެއް އެކްސިޑެންޓުތައް ހިނގާފައިވާ ގޮތަށް ބަލާއިރު ވެހިކަލް ދުއްވާ ފަރާތްތަކަށް މަގުމަތީގެ އެންމެ ބޭސިކް އާދަކާދަތަކާއި ޤަވާއިދުތައްވެސް ނޭނގޭކަން ފާހަގަކުރެވިފައިވާ ކަމަށެވެ. މިއީ ލައިސެންސް ދޫކުރުމުގެ މަރުހަލާތަކުގައި ހުރި ގޮންޖެހުންތަކެއްކަން ހާމަވާ ކަމެއް ކަމަށާއި، މީގެ އިތުރުން މަސްތުގެ ހާލަތުގައި ތިބެގެން ވެހިކަލް ދުއްވުން ފަދަ ނުރައްކާތެރި ކަންކަން އިތުރުވަމުންދާތީ ފުލުހުން މިހާރު ދަނީ އެކަމަށް ޚާއްޞަ ސަމާލުކަމެއްދީގެން ވަރަށް ހަރުކަށި ފިޔަވަޅުތައް އަޅަމުން ކަމަށް ވިދާޅުވިއެވެ.
މި ސަރުކާރުގެ ސިޔާސަތުގެ ދަށުން، އެހެން މީހުންގެ ފުރާނައަށާއި މުދަލަށް ނުރައްކާވާ ގޮތަށް އަމަލުކުރާ ފަރާތްތަކާ މެދު އަޅާފައިވާ ފިޔަވަޅުތަކުގެ ތަފާސްހިސާބު ހިއްސާކުރައްވަމުން ވަޒީރު ވިދާޅުވީ، ޓޯ ކުރެވުނު 1،906 ސައިކަލުގެ މައްސަލައިގައި 15 ދުވަހާއި 20 ދުވަހާ ދެމެދުގެ މުއްދަތަކަށް އުޅަނދުތައް ހިފަހައްޓައި، ބޮޑެތި އަދަދުތަކުން ޖޫރިމަނާކޮށްފައިވާ ކަމަށެވެ. އަދި ބައެއް ހާދިސާތަކުގައި ޤާނޫނާ ޚިލާފަށް ހިންގާފައިވާ ކަންކަމާ ގުޅިގެން ޖިނާއީ ތަޙުޤީޤުތައް ހިންގައި ދަޢުވާކުރުމަށް ޕްރޮސިކިއުޓަރ ޖެނެރަލްގެ އޮފީހަށްވެސް ފޮނުވާފައިވާނެ ކަމަށް ވަޒީރު ވިދާޅުވިއެވެ.
މަގުތަކުގެ ސަލާމަތާއި ރައްކާތެރިކަން ދެމެހެއްޓުމަށްޓަކައި ކުރިއަށް އޮތް ތަނުގައި ޓްރެފިކް ފުލުހުންގެ ނިޒާމު އިތުރަށް ހަރުދަނާކޮށް، ޤާނޫނުތަކާއި ޤަވާއިދުތައް ތަންފީޒުކުރުމުގެ ދާއިރާ މުޅި ރާއްޖެއަށް ފުޅާކުރެވޭނެ ކަމުގެ ފުރިހަމަ ޔަޤީންކަން ވަޒީރު ވަނީ ދެއްވާފައެވެ.
