ދުނިޔޭގެ ފަތުރުވެރިކަމުގެ ދުވަހާ ގުޅުވައިގެން، ސެޕްޓެމްބަރު މަހުގެ 27 ވަނަ ދުވަހު ކްރޮސްރޯޑްސް މޯލްޑިވްސްގައި ބޭއްވި ޝަރަފުވެރި "ވޯލްޑް ޓްރެވަލް އެވޯޑްސް އޭޝިއާ، އޯޝޭނިއާ އެންޑް އިންޑިއަން އޯޝަން ގާލާ ސެރެމަނީ 2026" ގައި ދިވެހިރާއްޖެއިން ފަޚުރުވެރި ބޮޑެތި ކާމިޔާބީތަކަކާއެކު ޖުމްލަ ފަސް އެވޯޑެއް ކާމިޔާބުކޮށްފިއެވެ.
ދުނިޔޭގެ ފަތުރުވެރިކަމުގެ ދާއިރާގައި "އޮސްކާ" ގެ ގޮތުގައި ފާހަގަކޮށްލެވޭ މި ޝަރަފުވެރި އެވޯޑު ދިނުމުގެ ހަފުލާ ރާއްޖޭގައި ބޭއްވުމަކީ މުޅި ސިނާއަތަށް ލިބުނު ވަރަށް ބޮޑު ކުރިއެރުމެކެވެ.
މި ހަފުލާގައި ސަރަހައްދީ ފެންވަރުގައި ރާއްޖެއިން ހޯދާފައިވާ މަތިވެރި ކާމިޔާބީތަކުގެ ތެރޭގައި ހިމެނެނީ:
-
އިންޑިއަން އޯޝަންސް ލީޑިންގ ޑެސްޓިނޭޝަން 2026
-
އިންޑިއަން އޯޝަންސް ލީޑިންގ ޑައިވް ޑެސްޓިނޭޝަން 2026
-
އިންޑިއަން އޯޝަންސް ލީޑިންގ ގްރީން ޑެސްޓިނޭޝަން 2026
-
އިންޑިއަން އޯޝަންސް ލީޑިންގ ހަނީމޫން ޑެސްޓިނޭޝަން 2026
މީގެ އިތުރުން، ރާއްޖޭގެ ފަތުރުވެރިކަން މާކެޓުކޮށް އިޝްތިހާރު ކުރުމުގެ މައި ކުންފުނި ކަމަށްވާ މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ/ވިޒިޓް މޯލްޑިވްސް) އަށް ވަނީ "އިންޑިއަން އޯޝަންސް ލީޑިންގ ޓޫރިސްޓް ބޯޑު 2026" ގެ ޝަރަފުވެރި ލަގަބު ލިބިފައެވެ. މި ރަސްމިއްޔާތުގައި ދުނިޔޭގެ 40 އަށްވުރެ ގިނަ ގައުމުގެ ފަތުރުވެރިކަމުގެ ދާއިރާގެ އިސްވެރިންނާއި، ޓޫރިސްޓް ބޯޑުތަކުގެ ވެރިންނާއި، ބައިނަލްއަޤުވާމީ އެއާލައިންތަކާއި އަދި ފަތުރުވެރިކަމާ ގުޅުންހުރި މީޑީއާތަކުން ވަނީ ބައިވެރިވެފައެވެ.
މި ރަސްމިއްޔާތުގައި ވާހަކަފުޅު ދައްކަވަމުން ޓޫރިޒަމް މިނިސްޓަރ އިބްރާހިމް ފައިސަލް ވިދާޅުވީ، 1972 ވަނަ އަހަރު އެންމެ ދެ ރިސޯޓާއެކު ފެށުނު ރާއްޖޭގެ ފަތުރުވެރިކަން މިއަދު މިވަނީ ދުނިޔޭގެ އެންމެ ކާމިޔާބު އަދި އެންމެ ފުރިހަމަ ވާހަކައަށް ވެފައި ކަމަށެވެ. އަދި ރާއްޖެ އިޝްތިހާރު ކުރުމުގައި ވިޒިޓް މޯލްޑިވްސްއިން ކުރަމުންދާ އަގުހުރި މަސައްކަތްތަކާއި، ދެމެހެއްޓެނިވި ފަތުރުވެރިކަން ކުރިއެރުވުމަށް ސަރުކާރާއި އަމިއްލަ ފަރާތްތަކުން ގުޅިގެން ކުރަމުންދާ މަސައްކަތްތަކުގެ މައްޗަށް އެމަނިކުފާނު އަލިއަޅުއްވާލެއްވިއެވެ. މި ހަފުލާގައި ވޯލްޑް ޓްރެވަލް އެވޯޑްގެ ފައުންޑަރ އަދި ޕްރެޒިޑެންޓް ގްރެހަމް ކުކްއާއި، ޓޫރިޒަމް ދާއިރާގެ އިސް ބޭފުޅުން ވަނީ ބައިވެރިވެވަޑައިގެންފައެވެ.
ވިޒިޓް މޯލްޑިވްސްގެ ސީއީއޯ އަދި މެނޭޖިންގ ޑައިރެކްޓަރ ޢަބްދުﷲ ޒިޔާޘް ވިދާޅުވީ، މި ކާމިޔާބީއަކީ ދިވެހި ފަތުރުވެރިކަމުގެ ސިނާއަތުގެ ވަރުގަދަކަމާއި މުއްސަނދިކަން ވަރަށް ފުރިހަމައަށް ރަމްޒުކޮށްދޭ ކަމެއް ކަމަށެވެ. އަދި މިއީ ދުނިޔޭގެ އެކި ކަންކޮޅުތަކުން އަންނަ ފަތުރުވެރިންނަށް ރާއްޖެއިން ފޯރުކޮށްދޭ ފެންވަރު ރަނގަޅު ހިދުމަތްތަކާއި، ތަފާތު ތަޖުރިބާތަކުގެ ނަތީޖާ ކަމަށް އޭނާ ފާހަގަކުރެއްވިއެވެ. މި ފަހަރުގެ އެވޯޑާއެކު ރާއްޖޭގެ ކާމިޔާބީތަކުގެ ސިލްސިލާ އިތުރަށް ވަރުގަދަވެގެން ގޮސްފައިވާއިރު، ރާއްޖެއަކީ 2020 އިން ފެށިގެން 2025 އަށް ޖެހިޖެހިގެން ހަ އަހަރު ދުނިޔޭގެ އެންމެ ކުރިއަރާފައިވާ މަންޒިލް (ވޯލްޑްސް ލީޑިންގ ޑެސްޓިނޭޝަން) ގެ މަގާމު ހޯދާފައިވާ ގައުމެއްކަން ފާހަގަކޮށްލެވެއެވެ.
މި ރަސްމިއްޔާތުގައި ދިވެހިރާއްޖޭގެ 15 އަށްވުރެ ގިނަ ފަތުރުވެރިކަމުގެ ލަގްޒަރީ ބްރޭންޑްތަކާއި ރިސޯޓުތަކުން ވަނީ އެކި ދާއިރާތަކުން ޝަރަފުވެރި އެވޯޑުތައް ހާސިލުކޮށްފައެވެ. އޭގެ ތެރޭގައި ރިސޯޓް، ލަގްޒަރީ ހޮސްޕިޓަލިޓީ، އޭވިއޭޝަން، ޑައިވިންގ، އާއިލީ އަދި ހަނީމޫން ދަތުރުތަކުގެ އިތުރުން ޕްރައިވެޓް އައިލެންޑް، ސުޕަރޔޮޓް ފަތުރުވެރިކަން އަދި ޒިންމާދާރު ފަތުރުވެރިކަމުގެ ދާއިރާތައް ހިމެނެއެވެ.
ފުރަތަމަ ފަހަރަށް 1993 ވަނަ އަހަރު ތައާރަފުކުރި ވޯލްޑް ޓްރެވަލް އެވޯޑްސްއަކީ ދަތުރުފަތުރާއި ފަތުރުވެރިކަމުގެ ސިނާއަތުގައި ދެވޭ އެންމެ މަތިވެރި އަދި އެންމެ ޝަރަފުވެރި އެވޯޑެވެ.
