ރާއްޖޭގައި މެރިކަލްޗާ ނުވަތަ ކަނޑުގެ ދިރުންތައް އާލާކޮށްގެން ކުރިއަށްގެންދާ ވިޔަފާރީގެ މަސައްކަތްތައް ފުޅާކުރުމަށްޓަކައި ކަނޑައަޅާފައިވާ ޚާއްޞަ ސަރަޙައްދުތައް މުޅިން ހުޅުވާލައި، އެ ދާއިރާގެ މަޝްރޫޢުތައް ޢަމަލީގޮތުން ފެށޭނީ ފަޅުރަށްރަށާ ބެހޭ އައު ޤާނޫނުގެ ދަށުން އެކުލަވާލަންޖެހޭ ޤަވާއިދުތައް މުޅިން ނިމިގެން ކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.
ސަރުކާރުން ބޭއްވި "އަހާ" ފޯރަމުގައި ވާހަކަފުޅު ދައްކަވަމުން ވަޒީރު ޝިޔާމް ފާހަގަކުރެއްވި ގޮތުގައި، ޤައުމީ ފެންވަރެއްގައި ރާއްޖޭގެ ކާބޯތަކެތީގެ ރައްކާތެރިކަން ކަށަވަރުކުރުމަށްޓަކައި އެންމެ ބޮޑު އިސްކަމެއް ދޭންޖެހިފައިވަނީ ބޭރުން އެތެރެކުރެވޭ ކާބޯތަކެތީގެ ބާވަތްތައް ރާއްޖޭގައި އުފައްދައި، ބޭރު ފައިސާ ރާއްޖެއިން ބޭރުވުން ހުއްޓުވުމަށެވެ. އަދި މި މުހިންމު އަމާޒަށް ވާސިލުވުމަށްޓަކައި ދަނޑުވެރިކަމާއި މެރިކަލްޗާގެ ސިނާއަތަށް ބޮޑެތ އިންވެސްޓްމަންޓްތަކެއް ބޭނުންވާކަމަށާއި، މި ދާއިރާތަކަށް ހުރި ހުރަސްތައް ނައްތާލައި ލުއިފަސޭހަ އުޞޫލުތަކެއް ޤާއިމުކުރުމަށް ސަރުކާރުން ޚާއްޞަ އިސްކަމެއް ދީގެން މަސައްކަތްކުރަމުންދާ ކަމަށް އެމަނިކުފާނު ވިދާޅުވިއެވެ.
މެރިކަލްޗާ ތަރައްޤީކުރުމަށްޓަކައި ވަޒީރުންގެ މަޖިލީހުން މިހާރު 13 ސަރަޙައްދެއް ކަނޑައަޅުއްވާފައިވާކަން ހާމަކުރައްވަމުން ވަޒީރު ވިދާޅުވީ، އެ ސަރަޙައްދުތަކުގައި ތަފާތު މަޝްރޫޢުތައް ހިންގުމަށް ޝައުޤުވެރިކަން ފާޅުކޮށް ގިނަ ޕްރޮޕޯސަލްތަކެއް މިހާރުވެސް ވުޒާރާއަށް ލިބިފައިވާ ކަމަށެވެ. ނަމަވެސް އެ ހުށަހެޅުންތައް ދިރާސާކޮށް، ރަސްމީކޮށް ކުރިއަށް ގެންދެވޭނީ ޤާނޫނާ ގުޅޭ ޤަވާއިދުތައް އެކުލަވާލެވިގެން ކަމަށާއި، އަމާޒަކީ އެ މަސައްކަތްތައް ނިންމައި ވީއެންމެ އަވަހަކަށް އިންވެސްޓަރުންނަށް ފުރުޞަތު ހުޅުވާލުން ކަމަށް ވިދާޅުވިއެވެ.
މީގެ އިތުރުން، ދަނޑުވެރިކަން ކުރިއެރުވުމަށްޓަކައި މީހުން ދިރިއުޅޭ 10 ރަށަކާއެކު ޚާއްޞަ މަސައްކަތްތަކެއް ފެށިފައިވާކަން ފާހަގަކުރައްވަމުން ވަޒީރު ވިދާޅުވީ، މީގެ ކުރިން ފަޅުރަށްތަކުގައި ހިންގާފައިވާ ދަނޑުވެރިކަމުގެ މަޝްރޫޢުތަކަށް ދިމާވި އިދާރީ އަދި ޤާނޫނީ ގޮންޖެހުންތަކަށް އައު ޤާނޫނުގެ ސަބަބުން ދާއިމީ އަދި ހަރުދަނާ ހައްލެއް ލިބިގެންދާނެ ކަމަށެވެ. މިފަދަ ބަދަލުތަކުގެ ސަބަބުން ރާއްޖޭގެ އިޤްތިޞާދު ހަރުދަނާވެ، ޒުވާނުންނާއި އާންމު ރައްޔިތުންނަށް ދަނޑުވެރިކަމާއި މެރިކަލްޗާގެ ދާއިރާއިން އައު ވަޒީފާތަކާއި ވިޔަފާރީގެ ފުރުޞަތުތައް ފަހިވެގެންދާނެ ކަމުގެ ޔަޤީންކަން ވަޒީރު ދެއްވިއެވެ.
