މިފްކޯއިން ބޭރުގެ މާކެޓުތަކަށް އެކްސްޕޯޓުކުރާ މަސް ބަލައިނުގަންނަ ނުވަތަ ރިޖެކްޓުކުރާ މައްސަލަ ހައްލުކުރުމަށް ސަރުކާރުން ވަރަށް ހަރުދަނާ ފިޔަވަޅުތަކެއް އަޅާފައިވާކަމަށް މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.
"އަހާ" ފޯރަމުގައި ވާހަކަދައްކަވަމުން ވަޒީރު ފާހަގަކުރެއްވި ގޮތުގައި، މިއީ މަސްވެރިކަމުގެ ސިނާއަތުގައި ޒަމާނުއްސުރެ ދިމާވަމުން އައިސްފައިވާ އަދި އެކަމުގެ ސަބަބުން ދައުލަތަށާއި ކުންފުންޏަށް ބޮޑެތި ގެއްލުންތަކެއް ލިބެމުންދިޔަ ވަރަށް ނާޒުކު މައްސަލައެކެވެ.
މި މައްސަލައަށް އަލިއަޅުވާލައްވަމުން ވަޒީރު ވިދާޅުވީ، ރައްޔިތުންގެ މަޖިލީހުގެ މެންބަރެއްގެ ގޮތުގައި މަސައްކަތްކުރެއްވި ދުވަސްވަރު ވެސް، އާންމުކޮށް ބޭރުގެ ކުންފުނިތަކުން މަސް ބަލައިނުގަންނަ މިންވަރަށްވުރެ މާ ބޮޑަށް އެކަން ހިނގަމުންދާކަން ފާހަގަކުރެވުނު ކަމަށެވެ. އަދި އެދުވަސްވަރު އެކަން ހިންގާފައިވާ ގޮތަށް ބަލާއިރު، އޭގެ ފަހަތުގައި ވަކި މަސްލަހަތުތަކެއް ހުރިކަމަށް ތުހުމަތުކުރެވޭ ފަދަ ކަންތައްތަކެއް ހުރިކަން އެމަނިކުފާނު ފާހަގަކުރެއްވިއެވެ. މިފަދަ ޒަމާންވީ ބޮޑެތި މައްސަލަތަކާއި ފުނިޖެހިފައިވާ ނެޓްވޯކްތައް ނައްތާލައި، ސިނާއަތް އިސްލާޙުކުރުމަށްޓަކައި ދިވެހިން ކުރާ މަސައްކަތުގައި ހުރިހާ ފަރާތްތަކަކުންވެސް ތެދުވެރިކަމާއި އިޚްލާޞްތެރިކަމާއެކު މަސައްކަތްކުރަންޖެހޭ ކަމަށް ވަޒީރު ވިދާޅުވިއެވެ.
ސަރުކާރުން މިކަމަށް ގެނައި މުހިންމު ބަދަލުތަކުގެ ތަފްޞީލު ދެއްވަމުން ވަޒީރު ވިދާޅުވީ، މިހާރު ރާއްޖެއިން އެއްވެސް ވަރަކަށް އިންސްޕެކްޓް ކުރުމެއްނެތި ނުވަތަ މަސް ބަލައިނުގަންނަ ގޮތަށް މަސް އެކްސްޕޯޓު ނުކުރާނެ ކަމަށެވެ. އަދި އާ އުޞޫލުގެ ދަށުން، މަސްގަންނަ ކުންފުނިން ދިވެހިރާއްޖޭގެ ބަނދަރެއްގައި މަސް ލޯޑުކުރާ ވަގުތު އެ މަސް ރަނގަޅަށް އިންސްޕެކްޓް ކުރެވޭނެ އިންތިޒާމު ހަމަޖައްސާފައިވާނެ ކަމަށެވެ. "އެހེންވީމަ އެހިސާބުން ރިޖެކްޓްވާ އެއްޗެއް ރިޖެކްޓްވަނީ. އޭގެ މާނައަކީ މިފްކޯގެ ބުކްގައި ރިޖެކްޓްވާކަށް މަހެއް ބޭރެއް ނުވާނެ،" ވަޒީރު ވިދާޅުވިއެވެ.
މީގެ އިތުރުން، މިދިޔަ ސަރުކާރުގައި ބާޒާރުގައި މަހުގެ އަގު ހުރި މިންވަރަށް އެއްވެސް ވަރަކަށް ބެލުމެއްނެތި ސިޔާސަތުތައް ކުއްލިއަކަށް ބަދަލުކުރުމުގެ ސަބަބުން، އަމިއްލަ ކުންފުނިތަކަށާއި މުޅި ސިނާއަތަށް ބޮޑެތި ގެއްލުންތަކެއް ލިބިގެންދިޔަ ކަމަށް ވަޒީރު ވިދާޅުވިއެވެ. ނަމަވެސް މިހާރު މަސްވެރިކަމުގެ ސިނާއަތް އަލުން ހަމަމަގަށް އެޅުވުމަށް ސަރުކާރުން ކުރަމުންދާ މަސައްކަތްތަކުން ވަރަށް ހެޔޮ ބަދަލުތަކެއް ފެންނަމުންދާ ކަމަށާއި، މަސްވެރިންނަށް ލިބެމުންދިޔަ ދަތިތަކަށް ދެމެހެއްޓެނިވި ހައްލުތަކެއް ހޯދައިދެމުންދާ ކަމުގެ ޔަޤީންކަން އެމަނިކުފާނު ދެއްވިއެވެ.
