އެމްޓީސީސީން ކުރިއަށްގެންދާ ބިން ހިއްކުމުގެ މަޝްރޫޢުތައް އިތުރަށް ހަލުވިކޮށް، ޚިދުމަތުގެ ފެންވަރު މަތިކުރުމުގެ ގޮތުން މި އަހަރު ނިމުމުގެ ކުރިން ޒަމާނީ ފެންވަރުގެ ބޮޑު ޑްރެޖަރެއް ރާއްޖެ ގެނައުމަށް ހަމަޖެހިފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ޕީއެސްއެމްގެ "ނޭޝަންސް ޗެޓް" ޕޮޑްކާސްޓުގައި ވާހަކަފުޅުދައްކަވަމުން އެމަނިކުފާނު ވަނީ ސަރުކާރުގެ ތަރައްޤީގެ މަޝްރޫޢުތަކަށް މެދުވެރިވި ގޮންޖެހުންތަކާއި، އެ ކަންކަމުން އަރައިގަތުމަށް ސަރުކާރުން ގެންގުޅުއްވާ ސްޓްރެޓެޖީތަކުގެ މައްޗަށް އަލިއަޅުއްވާލައްވާފައެވެ.
ރައީސް ވިދާޅުވިގޮތުގައި، ސަރުކާރުން ރޭއްވި ގޮތަށް ތަރައްޤީގެ މަޝްރޫޢުތައް ހަލުވިމިނުގައި ކުރިއަށް ގެންދިއުމަށް ދިމާވި އެންމެ ބޮޑު ހުރަހަކަށްވީ މެދުއިރުމަތީގައި ފެށިގެންދިޔަ ހަނގުރާމައިގެ ސަބަބުން މުޅި ދުނިޔެއަށް ކުރިމަތިވި އިޤްތިޞާދީ ދަތިކަމާއި ރާއްޖެއަށް ކުރިމަތިވި މާލީ ތާށިކަމެވެ. އެއްވެސް ޤައުމަކުން ކުރިން އަންދާޒާނުކުރާ މި ކާރިސާގެ ސަބަބުން ސަރުކާރުގެ ޚަރަދުކުރުމުގެ ސިޔާސަތުތަކަށް ބަދަލުތަކެއް ގެންނަންޖެހުނު ނަމަވެސް، މިހާރު އެ ދަތިތަކުން ގިނަގުނަ އަރައިގަނެވިފައިވާ ކަމަށް ރައީސް ޔަޤީންކޮށްދެއްވިއެވެ.
މިވަގުތު ސަރުކާރުން އެންމެ ބޮޑު އިސްކަމެއް ދެއްވަމުންދަނީ ދައުލަތުގެ ބޮޑެތި މަޝްރޫޢުތައް ހިންގާ ކުންފުނިތައް، ޚާއްޞަކޮށް ރާއްޖޭގައި އެންމެ ފުޅާދާއިރާއެއްގައި މަޝްރޫޢުތައް ހިންގާ އެމްޓީސީސީގެ ޤާބިލުކަން އިތުރުކޮށް ހަރުދަނާކުރުމަށް ކަމަށް އެމަނިކުފާނު ފާހަގަކުރެއްވިއެވެ. އެގޮތުން، އެ ކުންފުންޏަށް ބޭރު ފައިސާ (ޑޮލަރު) ލިބޭނެ މަގުތައް ފަހިކޮށްދިނުމުގެ މަސައްކަތްތައް ނިމިފައިވާކަން ފާހަގަކުރައްވައި، ލަސްތަކެއްނުވެ މަޝްރޫޢުތަކަށް ބޭނުންވާ ބޮޑުހިލަޔާއި އެހެނިހެން ސާމާނު ވެސް ލިބެމުންދާނެ ކަމަށް ވިދާޅުވިއެވެ.
އެމްޓީސީސީގެ ބިން ހިއްކުމުގެ ޤާބިލުކަން އިތުރުކުރުމުގެ ގޮތުން ގެންނަން ނިންމާފައިވާ އައު ޑްރެޖަރަކީ މިހާރު އެ ކުންފުނީގައި ބޭނުންކުރާ މަހާޖައްރާފަށްވުރެ ތިން ގުނަ ބޮޑު، މުޅިން އައު ހޮޕާ ޑްރެޖަރެއް ކަމަށް ރައީސް ވިދާޅުވިއެވެ. މި ޑްރެޖަރު މިއަހަރު ނިމުމުގެ ކުރިން ރާއްޖެއަށް ގެނެވުމާއެކު، މިހާރު ނުފެށި ހުރި ބިން ހިއްކުމުގެ ހުރިހާ މަޝްރޫޢެއް ވަރަށް ބާރުމުވެ؛ކެއްގައި ފެށިގެންދާނެ ކަމުގެ ފުރިހަމަ ޔަޤީންކަން އެމަނިކުފާނު ދެއްވިއެވެ.
