ގއ. މާމެންދޫ ފިޓްނެސް އެންޑް ރިކްރިއޭޝަން ސެންޓަރު ތަރައްގީކުރުމުގެ މަޝްރޫއުގެ މަސައްކަތްތައް ބާރު ދުވެއްޔެއްގައި ކުރިއަށްގޮސް، ޖުމްލަ މަސައްކަތުގެ 80 އިންސައްތަ މިހާރު ނިމިފައިވާ ކަމަށް ޒުވާނުން ބާރުވެރިކުރުވުމާއި ކުޅިވަރާއި ހަށިހެޔޮކަމާ ބެހޭ ވުޒާރާއިން ހާމަކުރައްވައިފިއެވެ.
އެ ވުޒާރާއިން މިއަދު މައުލޫމާތު ދެއްވިގޮތުގައި، މި ސެންޓަރުގެ އެންމެ ބޮޑު އެއް ބައި ކަމަށްވާ ސިވިލް ވޯކްގެ މަސައްކަތްތައް މުޅިން ނިމި، މިހާރު އެ މަރުކަޒުގެ އެތެރޭގެ ނުވަތަ އިންޓީރިއާގެ މަސައްކަތްތައް ވަރަށް ބާރަށް ދަނީ ކުރިއަށެވެ. ސަރުކާރުގެ ކުންފުންޏެއް ކަމަށްވާ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އާ ހަވާލުކޮށްގެން ކުރިއަށްގެންދާ މި މުހިންމު މަޝްރޫއަކީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިދިޔަ އަހަރު ގއ. އަތޮޅަށް ކުރެއްވި ރަސްމީ ދަތުރުފުޅެއްގެ ތެރެއިން އެމަނިކުފާނުގެ އިރުޝާދުގެ މަތިން އަމަލީގޮތުން ފައްޓަވާފައިވާ މަޝްރޫއެކެވެ.
ރާއްޖޭގެ ކޮންމެ ރަށެއްގެ ޒުވާނުންނަށާއި ރައްޔިތުންނަށް ދުޅަހެޔޮ ސިއްހަތެއްގައި ތިބުމުގެ ފުރުސަތު ހޯދައިދިނުމުގެ ގޮތުން، މީހުން ދިރިއުޅޭ ހުރިހާ ރަށެއްގައި ފިޓްނަސް އެންޑް ރެކްރިއޭޝަން ސެންޓަރުތައް ޤާއިމުކޮށްދެއްވުމަކީ ރައީސް ޑރ. މުޢިއްޒުގެ ވަރަށް ޚާއްސަ ރިޔާސީ ވައުދުފުޅެކެވެ. މި ވައުދުފުޅާ އެއްގޮތަށް ރާއްޖޭގެ އެކި ކަންކޮޅުތަކުގައި ކުޅިވަރާއި ހަށިހެޔޮކަމުގެ އެކިއެކި ވަސީލަތްތައް ތަރައްގީކުރުމުގެ މަސައްކަތް ސަރުކާރުން އަންނަނީ މެދުކެނޑުމެއްނެތި ކުރަމުންނެވެ. އެގޮތުން ޒުވާނުންނަށް ކުޅިވަރު ކުޅެވޭނެ އައު ފުޓްބޯޅަ ދަނޑުތަކާއި، އިންޑޯ އަދި އައުޓްޑޯ ކޯޓުތަކުގެ އިތުރުން ސްޕޯޓްސް ކޮމްޕްލެކްސްތަކާއި ސްވިމިން ޓްރެކްތައް ބިނާކުރުމުގެ ބިޔަ މަޝްރޫއުތައް ސަރުކާރުގެ ކަމާބެހޭ ވުޒާރާތަކުން ދަނީ ރާއްވަމުންނާއި ހިންގަމުންނެވެ.
މާމެންދޫގައި މި ޤާއިމުކުރެވޭ ފިޓްނެސް ސެންޓަރުގެ މަސައްކަތްތައް މުޅިން ނިމި، ޚިދުމަތަށް ހުޅުވިގެންދިއުމާއެކު، އެ ރަށުގެ ޒުވާނުންނަށާއި ކުޅިވަރަށް ލޯބިކުރާ ފަރާތްތަކަށް ހަށިހެޔޮކަން ދެމެހެއްޓުމަށް ބޭނުންވާ ފުރިހަމަ ވަސީލަތްތަކެއް ލިބިގެންދާނެ ކަމަށް ކުޅިވަރާ ބެހޭ ވުޒާރާއިން ފާހަގަކުރައްވައެވެ.
