ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) ގެ ޑިރެކްޓަރުންގެ ބޯޑަށް އާ މެންބަރެއްގެ ގޮތުގައި ދ. މީދޫ، އަސަރީގެ، އަޙްމަދު ނިޒާމް އައްޔަނުކުރައްވައިފިއެވެ.
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ހާމަކުރި ގޮތުގައި، މިއަދުން ފެށިގެން ނިޒާމް މި މަގާމަށް އައްޔަނުކުރެއްވީ ސަރުކާރު ހިއްސާވާ ކުންފުނިތަކުގެ ހިންގުން އިތުރަށް ހަރުދަނާކޮށް، ކުންފުނީގެ ލަނޑުދަނޑިތައް ހާސިލުކުރުން އަވަސްކުރުމުގެ މަގުސަދުގައެވެ.
ނިޒާމް ބޯޑަށް އައްޔަނުކުރެއްވުމާއެކު، ސްޓެލްކޯގެ ޑިރެކްޓަރުންގެ ބޯޑު މިހާރު ވަނީ ފުރިހަމަވެފައެވެ. ބޯޑުގެ އިސްވެރިންގެ ގޮތުގައި ތިއްބެވީ ޗެއާމަން މުޙައްމަދު ލަޠީފް އާއި، މެނޭޖިން ޑިރެކްޓަރ އަލީ އަޒްވާރުގެ އިތުރުން ޑެޕިއުޓީ މެނޭޖިން ޑިރެކްޓަރ ޢާއިޝަތު މުޒްނާއެވެ. ދެން ބޯޑުގައި ހިމެނިވަޑައިގަންނަވާ ފަސް ޑިރެކްޓަރުންނަކީ އަލީ އަންވަރު، އަޙްމަދު ހާޝިމް، މަރިޔަމް ސާޖިދާ، އަޙްމަދު އަސްލަމް އަދި އަލަށް ގުޅިވަޑައިގެންނެވި އަޙްމަދު ނިޒާމެވެ.
އާ މެންބަރަކު ބޯޑަށް އައްޔަނުކުރެއްވުމާ ގުޅިގެން ސްޓެލްކޯގެ ބޯޑާއި އިސްވެރިންގެ އިތުރުން މުވައްޒަފުންގެ ނަމުގައި ނިޒާމަށް ވަނީ މަރުހަބާ ކިޔާފައެވެ. މާލެއާއި އަތޮޅުތެރޭގައި ކަރަންޓުގެ އިތުރުން ފެނާއި ނަރުދަމާގެ ހިދުމަތް ފޯރުކޮށްދިނުމުގައި މުހިންމު ދައުރެއް އަދާކުރާ ސްޓެލްކޯއިން ގަބޫލުކުރާ ގޮތުގައި، ހިންގުމަށް އެކުލަވާލެވޭ މިފަދަ ބަދަލުތަކުގެ ސަބަބުން ކުންފުނީގެ ހިދުމަތްތައް އިތުރަށް ފުޅާވެ، ރައްޔިތުންނަށް ދެވޭ ހިދުމަތުގެ ފެންވަރު އިތުރަށް ރަނގަޅުވެގެންދާނެއެވެ.
