8000ށް ވުރެ ގިނަ ދަރިވަރުންނާއެކު މިއަހަރުގެ އެސްއެސްސީ އަދި އޯލެވެލް އިމްތިހާން ރާއްޖޭގެ ކަންކޮޅުތަކުގައި މިއަދު ރަސްމީކޮށް ފަށައިފިއެވެ.
ތަޢުލީމާ ބެހޭ ވުޒާރާއިން ހާމަކުރައްވާފައިވާ ގޮތުގައި، މިއަދު ހެނދުނު 9:30 ގައި ފެށުނު މި އިމްތިހާނުތައް އަންނަ ނޮވެމްބަރު މަހުގެ 12 ވަނަ ދުވަހުގެ ނިޔަލަށް ކުރިއަށްދާނެއެވެ. މިއަދުގެ އިމްތިހާނު ފަށާފައިވަނީ އެސްއެސްސީ އިމްތިހާނުގެ ދިވެހި މާއްދާގެ ޕޭޕަރު އެކަކުންނެވެ.
މި އަހަރުގެ އިމްތިހާނުތަކުގައި ބައިވެރިވާ ދަރިވަރުންގެ އަދަދަށް ބަލާއިރު، އައި.ޖީ.އެސް.ސީ (އޯލެވެލް) އިމްތިހާނުގައި ޖުމްލަ 8،111 ދަރިވަރުން ބައިވެރިވިއެވެ. އަދި ދިވެހިރާއްޖޭގެ ސްކޫލް ސެޓްފިކެޓް (އެސްއެސްސީ) އިމްތިހާނުގައި 7،776 ދަރިވަރުން ބައިވެރިވެއެވެ. ދަރިވަރުންނަށް ފަސޭހަކަމާއެކު އިމްތިހާނުގައި ބައިވެރިވެވޭނެ އިންތިޒާމު ހަމަޖެއްsުމުގެ ގޮތުން، މާލޭގެ 25 ސެންޓަރަކާއި އަތޮޅުތަކުގެ 246 ސެންޓަރެއްގައި މި އިމްތިހާނު ކުރިއަށްދާނެއެވެ.
މިއަހަރުގެ އިމްތިހާނުތަކާ ގުޅިގެން ތަޢުލީމީ ދާއިރާއިން ފާހަގަކުރާގޮތުގައި، މިއީ ތަޢުލީމީ ކަލަންޑަރަށް ގެނެވުނު މުހިންމު ބަދަލަކަށްފަހު ކުރިއަށްދާ އިމްތިހާނެކެވެ. މީގެ ކުރިން ބައެއް އަހަރުތަކުގައި އިމްތިހާނުތައް ބާއްވަމުން އައީ އަހަރުގެ ކުރީކޮޅު ކަމަށްވީ ނަމަވެސް، މި އަހަރުން ފެށިގެން އޯލެވެލް އަދި އެސްއެސްސީ އިމްތިހާނުތައް ބާއްވަމުންދާނީ ކޮންމެ އަހަރެއްގެވެސް އޮކްޓޫބަރު އަދި ނޮވެމްބަރު މަހުގެ ތެރޭގައެވެ.
މި ބަދަލުގެ ސަބަބުން ދަރިވަރުންނަށް ކިޔެވުމަށް ފުރިހަމަ ވަގުތު ލިބި، އިމްތިހާނަށް ތައްޔާރުވުމަށް އިތުރު ލުއިފަސޭހަތަކެއް ލިބިގެންދާނެ ކަމަށް ތަޢުލީމީ މާހިރުން ޤަބޫލުކުރައްވައެވެ. އިމްތިހާނުގައި ބައިވެރިވާ ހުރިހާ ދަރިވަރުންނަށް ކާމިޔާބީއަށް އެދެމެވެ.
