މާލީ މުޢާމަލާތްތަކުގައި ތެދުވެރިވުމާއި، މުދާ ހޭދަކުރުމުގައި އިޤުތިޞާދުކުރުމުގެ މުހިންމުކަމުގެ މައްޗަށް އަލިއަޅުވާލައި މިއަދުގެ ހުކުރު ޚުޠުބާ ދެއްވައިފިއެވެ.
ޚުޠުބާގައި ފާހަގަކުރެއްވި ގޮތުގައި، މުދަލުގެ ނިޢުމަތަކީ އިންސާނާ އަބުރުވެރި ދިރިއުޅުމެއް އުޅުމަށާއި ދުންޔަވީ އެންމެހައި ޙާޖަތްތައް ފުއްދުމަށް ﷲ ތަޢާލާ ދެއްވާފައިވާ މަތިވެރި ނިޢުމަތެކެވެ. އެހެންކަމުން މުދާ ގެންގުޅުމުގައި އިސްރާފުނުކޮށް އިޤުތިޞާދުކުރުމާއި، ފަހަށް ރައްކާކުރުމަކީ އިސްލާމްދީން ދައްކައިދީފައިވާ ރީތި މަގެކެވެ. މީގެ އިތުރުން، ބޭނުމެއް ނެތި ނުވަތަ ދަރަނި އަދާކުރެވޭނޭ ގޮތެއް ނެތި ދަރަނި ނެގުމުގައި ޙައްދުފަހަނަޅައި ދިޔުމުގެ މައްސަލައަށް މުޖުތަމަޢު ސަމާލުވާންޖެހޭކަމަށް ޚުޠުބާގައި ވިދާޅުވިއެވެ.
ދަރަނި އަދާކުރުމުގެ މުހިންމުކަން ބަޔާންކުރައްވަމުން، ނަބިއްޔާ صَلَّى اللهُ عَلَيْهِ وَسَلَّمَ ޙަދީޘްކުރައްވާފައިވާ ޙަދީޘްފުޅެއް ޚުޠުބާގައި ފާހަގަކުރެއްވިއެވެ. އެއީ:
(نَفْسُ الْمُؤْمِنِ مُعَلَّقَةٌ بِدَيْنِهِ حَتَّى يُقْضَى عَنْهُ) (މާނައީ: "މުއުމިނާގެ ނަފުސު ވަނީ، އޭނާގެ ދަރަނި އަދާކުރެވިއްޖެއިނ ބާކީވާ އެއްޗަކާ މެދު ސުވާލުކުރެވޭ ހަނދާނުގައި، ނުވަތަ އެ ދަރަނި އަދާކުރެވެންދެން އެ ނަފުސެއް ހިފެހެއްޓިފައި (އެކަލާނގެ ރަޙުމަތާއި ނިޢުމަތުން މަޙުރޫމްވެ) ވެއެވެ."). މީގެ އިތުރުން، ގަނެވިއްކުމާއި މާލީ މުޢާމަލާތްތަކުގައި ތެދުވެރިވެ އަމާނާތްތެރިވުމުގެ މަތިވެރިކަން ބަޔާންކުރައްވައި ރަސޫލާ صَلَّى اللهُ عَلَيْهِ وَسَلَّمَ ޙަދީޘްކުރައްވާފައިވެއެވެ: (التَّاجِرُ الصَّدُوقُ الْأَمِينُ مَعَ النَّبِيِّينَ وَالصَّدِّيقِينَ وَالشُّهَدَاءِ) (މާނައީ: "ތެދުވެރި، އަމާނާތްތެރި ވިޔަފާރިވެރިޔާ ޤިޔާމަތް ދުވަހުން ވާހުށީ ނަބިއްޔުންނާއި، ޞިއްދީޤުންނާއި، ޝަހީދުންނާ އެކުގައެވެ.").
ޚުޠުބާ ނިންމަވާލައްވަމުން ގޮވާލެއްވީ، މާލީ މުޢާމަލާތްތަކުގައި ރިބާއިން ދުރުހެލިވުމަށާއި، ވެވޭ އެއްބަސްވުންތަކަށް ވަފާތެރިވެ، އާއިލާއަށް ކުރަންޖެހޭ ޚަރަދުތައް ފުރިހަމައަށް އަދާކުރުމަށެވެ. އަދި މުޖުތަމަޢުގެ ބަދަހިކަމާއި ތަރައްޤީއަށްޓަކައި ހުރިހާ މާލީ މުޢާމަލާތެއްގައިވެސް އިސްލާމީ ރީތި އަޚުލާޤުގައި ހިފެހެއްޓުމަށް އިލްތިމާސްކުރެއްވިއެވެ.
