ކުރީގެ ސަރުކާރުން ކުރިއަށްގެންދިޔަ "ބިންވެރިޔާ" ސްކީމުގެ ދަށުން ގުޅިފަޅުން ދޫކުރުމަށް ނިންމާފައިވާ ގޯތިތަކުގެ ތެރެއިން 3,000 އަށްވުރެ ގިނަ ރަޖިސްޓްރީއާއި 1,300 އަށްވުރެ ގިނަ ބިން މިހާތަނަށް ހައްގުވެރިންނާ ހަވާލުކޮށް ނިންމާފައެވެ.
މިނިސްޓްރީ އޮފް ހައުސިންގ ލޭންޑް އެންޑް އާބަން ޑިވެލޮޕްމަންޓް އިން އާންމުކޮށްފައިވާ އެންމެ ފަހުގެ ތަފާސްހިސާބުތަކަށް ބަލާއިރު، ގުޅިފަޅުން ދޫކުރަން ހަމަޖެހިފައިވާ ޖުމްލަ 3,548 ޕްލޮޓްގެ ތެރެއިން 3,086 ފަރާތަކަށް (87 އިންސައްތަ) މިހާރު ވަނީ ރަޖިސްޓަރީ ދޫކޮށްފައެވެ. އަދި އަމަލީ ގޮތުން 1,393 ބިން (39.3 އިންސައްތަ) ވެރިފަރާތްތަކާ ހަވާލުކުރެވިފައިވާއިރު، ގޯތި ހަވާލުކުރިކަމުގެ ލިޔުން "ހިޔާވެހި ޕޯޓަލް" މެދުވެރިކޮށް މިހާރު ލިބޭނެއެވެ.
މި މަޝްރޫއުގެ ދަށުން ތިލަމާލެ ބްރިޖްގެ މަސައްކަތަށާއި އެކި ބޭނުންތަކަށް މިވަގުތު ބޭނުންކުރަމުންދާ ސަރަހައްދުތަކުގައިވާ ގޯތިތައް، އެ ބިންތައް ހުސްވިހާ އަވަހަކަށް ހައްގުވެރިންނާ ހަވާލުކުރާނެ ކަމަށް ކަމާބެހޭ ފަރާތްތަކުން މައުލޫމާތުދެއެވެ. މީގެއިތުރުން، މި ސަރުކާރުން ވަނީ ބިންވެރިޔާ ސްކީމުގެ އެއްބަސްވުމަށް ބައެއް މުހިންމު އިސްލާހުތައް ގެނެސްފައެވެ. އެގޮތުން، ރާއްޖޭގެ އެއްވެސް ސަރަހައްދަކުން 600 އަކަފޫޓަށްވުރެ ކުޑަ ގޯއްޗެއް، ފްލެޓެއް ނުވަތަ ސޯޝަލް ހައުސިންއެއް އަމިއްލަ ނަމުގައި ރަޖިސްޓަރީވެފައިވާނަމަ، އެ ތަނެއް އެއްމެދު މިލްކުވެރިންނަށް އެއްވެސް ބަދަލަކާ ނުލައި ދޫކޮށްލަންޖެހޭނެއެވެ. އަދި އެއްމެދު މިލްކުވެރިޔަކު ނެތް ހާލަތްތަކުގައި އެފަދަ ތަންތަން ދައުލަތަށް ދޫކޮށްލަންޖެހޭ ގޮތަށް އާ އެއްބަސްވުމުގައި ވަނީ ހިމަނައިފައެވެ.
ގުޅިފަޅުގެ ލޭންޑް ޔޫސް ޕްލޭނަށް ގެނައި ބަދަލުތަކާ ގުޅިގެން ގޯތީގެ ގުރުއަތު އަލުން ނެގުމަށްފަހު ބިން ހަވާލުކުރުމުގެ މަސައްކަތް ކުރިއަށްދާއިރު، އެ ރަށަކީ ހުރިހާ ހިދުމަތެއް ފުރިހަމަވެފައިވާ ތަނަކަށް ހެދުމަށް ގިނަ ރޭވުންތަކެއް ވަނީ ރޭވިފައެވެ. އެގޮތުން އާންމު ދިރިއުޅުމުގެ ބިންތަކުގެ އިތުރުން ސޯޝަލް ހައުސިން، ތައުލީމީ، ސިއްހީ، އިންޑަސްޓްރިއަލް އަދި ސިޓީ ހޮޓާ ފަދަ ވިޔަފާރިތަކަށް ވަނީ ބިން ކަނޑައަޅައިފައެވެ. އަދި އާންމުންނަށް ހިތްފަސޭހަ މާހައުލެއް ގާއިމުކުރުމުގެ ގޮތުން ޕާކުތަކާއި ކުޅިވަރު ކުޅޭނެ ސަރަހައްދުތައްވެސް އާ ޕްލޭނުގައި ވަނީ ހިމަނައިފައެވެ.
