ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި ސްޓޭޓް ބޭންކް އޮފް އިންޑިއާ (އެސްބީއައި) މެދުވެރިކޮށް ނެގި 150 މިލިއަން ޑޮލަރުގެ ޓްރެޝަރީ ބިލް ފެސިލިޓީގެ ތެރެއިން ދައްކަން ބާކީ އޮތް ފަހު 50 މިލިއަން ޑޮލަރު މިއަދު އަދާކޮށް، އެ ދަރަނި އެއްކޮށް ހަލާސްކުރި ނަމަވެސް ރާއްޖެއަށް ބޭނުންވާ ތެލާއި، ކާޑުގެ ބާވަތްތަކާއި، ބޭހުގެ އިތުރުން މުހިންމު އެހެނިހެން އަސާސީ މުދާ މެދުނުކެނޑި ލިބޭނެ އިންތިޒާމުތައް ވަނީ ފުރިހަމައަށް ހަމަޖައްސައިފައި ކަމަށްފިނޭންސް މިނިސްޓްރީން ވިދާޅުވެެއްޖެއެވެ.
ބަޖެޓަށް ބޭނުންވާ ފައިސާ ހޯދުމަށް ނެގި މި ފެސިލިޓީ ދައްކައި ނިންމާފައިވަނީ ރައީސް ޑރ. މުހައްމަދު މުއިއްޒުގެ ސަރުކާރުން ތިން މަރުހަލާއަކަށް ބަހާލައިގެންނެވެ. އެގޮތުން 2024 ވަނަ އަހަރުގެ ޖެނުއަރީ މަހު 50 މިލިއަން ޑޮލަރު އަދި މި އަހަރުގެ މެއި 11 ގައި 50 މިލިއަން ޑޮލަރު ދައްކާފައިވާއިރު، ބާކީ އޮތް 50 މިލިއަން ޑޮލަރު މިއަދު ދެއްކުމުން އެ ފެސިލިޓީ ވަނީ އެއްކޮށް ނިމުމަކަށް އައިސްފައެވެ. މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ އެންމެ ފަހުގެ ހިސާބުތަކަށް ބަލާއިރު، އޮގަސްޓް 2026 ގެ ނިޔަލަށް ރާއްޖޭގެ ރަސްމީ ރިޒާވްގައި 644 މިލިއަން ޑޮލަރު ހުއްޓެވެ.
ފިނޭންސް މިނިސްޓްރީން ވަނީ ދަރަނި އަދާކުރުމުގެ ސަބަބުން މުދާ އެތެރެކުރަން ބޭރު ފައިސާ ނުލިބިދާނެ ކަމަށް ބުނެ ފަތުރަމުންދާ ހަބަރުތައް ދޮގުކުރައްވައިފައެވެ. ސަރުކާރުން އެންމެ އިސްކަމެއް ދެނީ ޒަރޫރީ މުދަލާއި އަސާސީ ހިދުމަތްތައް މެދުނުކެނޑި ރައްޔިތުންނަށް ފޯރުކޮށްދިނުމަށް ކަމަށްވާތީ، މާލީ ދަތިތަކެއް ކުރިމަތިވެދާނެ ކަމަށް ބުނެ ދެކެވޭ ވާހަކަތަކުގައި އެއްވެސް އަސާސެއް ނެތް ކަމަށް އެ މިނިސްޓްރީން ފާހަގަކުރެއެވެ. ސަރުކާރުގެ ދަރަނި ބެލެހެއްޓުމުގެ ސިޔާސަތަކީ ދުރާލައި ރޭވުންތެރިކަމާއެކު ތައްޔާރުވުން ކަމަށާއި، ސޮވެރިން ޑިވެލޮޕްމަންޓް ފަންޑަށް ގަވާއިދުން ފައިސާ ޖަމާކުރަމުން އަންނަ ކަމަށް ބުނެފައިވެއެވެ.
ރާއްޖޭގެ މާލީ ހާލަތު ވަރުގަދަކޮށް ބޭރު ފައިސާގެ ރިޒާވް އިތުރުކުރުމަށް ބައިނަލްއަގުވާމީ މާލީ އިދާރާތަކާއެކު އެދެވޭ މަޝްވަރާތަކެއް ކުރެވެމުންދާ ކަމަށް ފިނޭންސް އިން ބުނެއެވެ. މީގެ އިތުރުން، މެލޭޝިއާގެ ބޮޑުވަޒީރު އަންވަރު އިބްރާހިމް ދާދިފަހުން ރާއްޖެއަށް ކުރެއްވި ފުރަމާނަ ދަތުރުފުޅުގައި އެމްއެމްއޭއަށް 100 މިލިއަން ޑޮލަރުގެ ފެސިލިޓީއެއް ދިނުމަށް އެއްބަސްވެފައިވާއިރު، ރައީސް މުއިއްޒު ވަނީ ވޯލްޑް ބޭންކާއި ސައޫދީ ފަންޑް ފޯ ޑިވެލޮޕްމަންޓުގެ އިސްވެރިންނާ ބައްދަލުކުރައްވައި މާލީ އެހީތެރިކަން ހޯއްދެވުމުގެ މަޝްވަރާތައް ކުރިއަށް ގޮންދަންވާފައެވެ.
